ವಾಷಿಂಗ್ಟನ್‌: ಅಮೆರಿಕದಲ್ಲಿ 11 ದಿನಗಳ ಕಾಲ ತಡೆಹಿಡಿಯಲಾಗಿದ್ದ ಜಾನ್ಸನ್ ಆ್ಯಂಡ್ ಜಾನ್ಸನ್ ಕೋವಿಡ್‌ ಲಸಿಕೆ ನೀಡಿಕೆಯನ್ನು ಪುನರಾರಂಭಿಸಲಾಗಿದ್ದು, ಅತಿ ವಿರಳವಾಗಿ ಕಾಣಿಸಿಕೊಂಡ ರಕ್ತ ಹೆಪ್ಪುಗಟ್ಟುವ ಸಮಸ್ಯೆಯನ್ನು ಕಡೆಗಣಿಸಲು ನಿರ್ಧರಿಸಲಾಗಿದೆ.
ಈ ಲಸಿಕೆ ಪಡೆದ 80 ಲಕ್ಷ ಜನರ ಪೈಕಿ 15 ಮಂದಿಗೆ ರಕ್ತ ಹೆಪ್ಪುಗಟ್ಟುವ ಸಮಸ್ಯೆ ಕಾಣಿಸಿತ್ತು. ಮೂವರು ಮೃತಪಟ್ಟಿದ್ದರು. ಹೀಗೆ ಸಮಸ್ಯೆ ಎದುರಿಸಿದವರೆಲ್ಲ 50 ವರ್ಷದೊಳಗಿನ ಮಹಿಳೆಯರಾಗಿದ್ದರು. ಇನ್ನು ಮುಂದೆ ಸಂಭಾವ್ಯ ರಕ್ತ ಹೆಪ್ಪುಗಟ್ಟುವ ವಿಷಯ ತಿಳಿಸಿಯೇ, ಜನರ ಆಯ್ಕೆಗೆ ಅವಕಾಶ ನೀಡಿ ಜಾನ್ಸನ್ ಆ್ಯಂಡ್ ಜಾನ್ಸನ್ ಲಸಿಕೆ ನೀಡಲಾಗುವುದು ಎಂದು ಅಮೆರಿಕದ ರೋಗ ನಿಯಂತ್ರಣ ಕೇಂದ್ರದ (ಸಿಡಿಸಿ) ನಿರ್ದೇಶಕ ಡಾ.ರೊಚೆಲ್‌ ವೆಲೆನ್‌ಸ್ಕಿ ತಿಳಿಸಿದ್ದಾರೆ.
ಈ ಲಸಿಕೆಯಿಂದ ಬಹಳಷ್ಟು ಪ್ರಯೋಜನ ಇದ್ದು, ಕೋವಿಡ್‌ ನಿಯಂತ್ರಿಸುವಲ್ಲಿ ಬಹಳ ಪರಿಣಾಮಕಾರಿಯಾಗಲಿದೆ, ಹೀಗಾಗಿ ಈ ಲಸಿಕೆಗೆ ನಿಷೇಧ ಹೇರಬಾರದು ಎಂಬುದು ಬಹುತೇಕ ತಜ್ಞರ ಅಭಿಪ್ರಾಯವಾಗಿತ್ತು. ಹೀಗಾಗಿ ಕಳೆದ ವಾರ ಯೂರೋಪ್‌ ರಾಷ್ಟ್ರಗಳಲ್ಲಿ ತೆಗೆದುಕೊಂಡಂತಹ ನಿರ್ಧಾರವನ್ನೇ ಅಮೆರಿಕವೂ ಈಗ ಕೈಗೊಂಡಿದೆ.
