ಕೈ ಬೀಸಿ ಕರೆಯುತ್ತಿದೆ ಡ್ರಾಗನ್ ಹಣ್ಣಿನ ತೋಟ

ಮಳಿಗೆಗಳಿಗೆ ಭೇಟಿ ನೀಡುವ ಸ್ಥಳದ ಸಮೀಪದಲ್ಲಿ ಈ ತಾಕು ಇದೆ. ಜನರು ಕುತೂಹಲದಿಂದ ಈ ಬೆಳೆ ವೀಕ್ಷಿಸುತ್ತಿದ್ದಾರೆ.
‘ಗಿಡದಿಂದ ಗಿಡಕ್ಕೆ 8 ರಿಂದ 10 ಅಡಿ ಅಂತರದಲ್ಲಿ ಕಂಬಗಳನ್ನು ನಿರ್ಮಿಸಲಾಗಿದೆ. ಅದರ ಮೇಲೆ ಸಿಮೆಂಟ್ ರಿಂಗುಗಳನ್ನು ಅಳವಡಿಸಿ, ಗಿಡವು ನಾಲ್ಕೂ ಕಡೆಗಳಿಂದ ಹಬ್ಬುವ ರೀತಿಯಲ್ಲಿ ಕಲ್ಲುಚಪ್ಪಡಿಗಳನ್ನು ಆಧಾರವಾಗಿಟ್ಟು ಕಡಿಮೆ ನೀರು ಮತ್ತು ಕಡಿಮೆ ಗೊಬ್ಬರವನ್ನು ಬಳಸಿ ಈ ಬೆಳೆಯನ್ನು ಬೆಳೆಯಲಾಗಿದೆ’ ಎಂದು ಐಐಎಚ್ಆರ್ ಸಂಸ್ಥೆಯ ಪ್ರಧಾನ ವಿಜ್ಞಾನಿ ಡಾ.ಬಿ.ನಾರಾಯಣಸ್ವಾಮಿ ತಿಳಿಸಿದರು.

‘ಗಿಡನೆಟ್ಟ 6 ತಿಂಗಳಿಗೆ ಹೂವು ಬಿಡಲು ಆರಂಭವಾಗುತ್ತದೆ. ಒಂದು ಗಿಡದಿಂದ 16 ರಿಂದ 18 ಡ್ರಾಗನ್ ಹಣ್ಣುಗಳನ್ನು ಬೆಳಯಬಹುದಾಗಿದೆ. ಇಂದು ಮಾರುಕಟ್ಟೆಯಲ್ಲಿ ಕೆ.ಜಿಗೆ ₹120ರಿಂದ ₹250 ಬೆಲೆ ಇದೆ. ಒಂದು ಹಣ್ಣಿನ ತೂಕ 400 ಗ್ರಾಂನ ವರೆಗೆ ಇರುತ್ತದೆ’ ಎಂದರು.

‘ಆರೋಗ್ಯದ ದೃಷ್ಟಿಯಿಂದ ಈ ಹಣ್ಣು ಉಪಯುಕ್ತವಾಗಿದ್ದು, ಬಿಳಿ ರಕ್ತಕಣಗಳ ಸಂಖ್ಯೆಯನ್ನು ಹೆಚ್ಚಿಸುವಲ್ಲಿ ಸಹಕಾರಿ ಎಂಬುದು ವೈದ್ಯಕೀಯವಾಗಿ ಸಾಬೀತಾಗಿದೆ’ ಎಂದು ತಿಳಿಸಿದರು.

‘ರಾಜ್ಯದಲ್ಲಿ 18ರಿಂದ 20 ರೈತರು ಈ ಹಣ್ಣು ಬೆಳೆಯುತ್ತಿದ್ದಾರೆ. ಒಂದು ಎಕರೆಯಲ್ಲಿ 8ರಿಂದ 8 ಅಡಿಗೆ 400ರಿಂದ 800 ಗಿಡಗಳನ್ನು ಬೆಳಸಲು ಸಾಧ್ಯವಿದೆ. ಹಣ್ಣು ಬೆಳೆದ ನಂತರ ಗಿಡಗಳನ್ನು ಮಾರಾಟ ಮಾಡಿ ಲಾಭ ಗಳಿಸಬಹುದಾಗಿದೆ. ಸದ್ಯದ ಪರಿ ಸ್ಥಿತಿಯಲ್ಲಿ ಈ ಬೆಳೆಗೆ ಹೆಚ್ಚಿನ ಬೇಡಿಕೆಯಿದೆ’ ಎಂದು ಅವರು ಮಾಹಿತಿ ನೀಡಿದರು.