ಕೂಲಿ..ನಲಿ: ನಾಟಿ ಮಾಡುವಾಗ ಕಂಡ ಚಿತ್ರಗಳ ಸೌಂದರ್ಯ

ಗುಳೆ, ವಲಸೆ ಇಂತಹ ಪದಗಳನ್ನು ನಾವು ಕೇಳಿದ್ದೇವೆ. ಕೆಲವು ತಿಂಗಳ ಮಟ್ಟಿಗೆ ಒಂದು ಪ್ರದೇಶದಿಂದ ಇನ್ನೊಂದು ಪ್ರದೇಶಕ್ಕೆ ತಾತ್ಕಾಲಿಕವಾಗಿ ವಲಸೆ ಹೋಗುವವರೂ ಇದ್ದಾರೆ; ಹಕ್ಕಿಗಳು ಋತುಮಾನಕ್ಕೆ ತಕ್ಕಹಾಗೆ ವಲಸೆ ಹೋಗಿ ಬರುತ್ತವಲ್ಲ ಹಾಗೆ. ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮುಂಗಾರು ತಲೆಯಿಟ್ಟ ಕೆಲವು ದಿನಗಳವರೆಗೆ ಭತ್ತದ ನಾಟಿಯ ಸಿರಿಗಾಲ. ಇಲ್ಲಿಗೆ ಉತ್ತರ ಕರ್ನಾಟಕದ ಹಲವು ಊರುಗಳಿಂದ ಭತ್ತ ನಾಟಿ ಮಾಡಲೆಂದೇ ರೈತರು ಬರುತ್ತಾರೆ. ಎಕರೆಗೆ ಕಾರ್ಮಿಕರಿಗೆ ₹ 4,500 ಕೂಲಿ. ಅದರಲ್ಲಿ ಮಧ್ಯವರ್ತಿಗಳ ಕೈಸೇರುವುದು ₹ 1,000. ಏನಿಲ್ಲವೆಂದರೂ 3,000 ಎಕರೆಯಲ್ಲಿ ಭತ್ತದ ನಾಟಿ ಮಾಡಿ, ಎರಡು ತಿಂಗಳಲ್ಲಿ ಒಂದಿಷ್ಟು ದುಡಿದುಕೊಂಡು ಹೋಗುತ್ತಾರೆ. ಹೀಗೆ ಕೂಲಿಗೆ ಬರುವ ಎಷ್ಟೋ ಜನರಿಗೆ ಸ್ವಂತ ಜಮೀನಿದೆ. 2011ರಿಂದ ಶುರುವಾದ ಇಂತಹ ಕೂಲಿ ವಲಸೆ ಈ ವರ್ಷವೂ ಮುಂದುವರಿದಿದೆ. ನಾಟಿ ಮಾಡುವಾಗ ಕಂಡ ಚಿತ್ರಗಳು ಸೌಂದರ್ಯ ಕಾಣಿಸಿದರೂ ಬದುಕಿನ ಹುದುಗಿದ ಅರ್ಥವನ್ನೂ ದಾಟಿಸುವಂತಿವೆ. ಕುಂದಾಪುರ, ಕೋಟ, ಸಾಹೇಬ್ರ ಕಟ್ಟೆ, ಉಡುಪಿ, ಮಣಿಪುರ, ರಾಂಪುರ, ಕಾಪು, ಪಡುಬಿದ್ರಿ, ಕಟೀಲು, ಬಜ್ಪೆ, ಕಾವೂರು, ಕಾಸರಗೋಡು ಭಾಗಗಳಲ್ಲಿ ಈಗ ಇಂತಹ ಚಿತ್ರಗಳು ಕಣ್ಣಿಗೆ ಕಟ್ಟುತ್ತವೆ. ಚಿತ್ರಗಳು ಹಾಗೂ ಮಾಹಿತಿ: ಫಕ್ರುದ್ದೀನ್ ಎಚ್.