ಧರ್ಮ ಹೆಣ್ಣಿಗೆ ಸಾಧನಮಾರ್ಗವಾಗಿಯೂ ಕಾಣುವುದಿದೆ. ತನ್ನೊಳಗಿನ ಶಕ್ತಿಗಳನ್ನು ಶೋಧಿಸುತ್ತಾ, ತನ್ನಿರುವಿಕೆಯ ಗುರುತುಗಳನ್ನು ಹಲವು ಆಯಾಮಗಳಲ್ಲಿ ಪ್ರಕಟಿಸುವುದು ಈ ತಲೆಮಾರಿನ ಹೆಣ್ಣಿನ ಧರ್ಮವಾಗಿದೆ. ತಾಯಿ, ಮಗಳು, ಸಂಗಾತಿ, ಸಹೋದರಿ, ಗೆಳತಿ, ಗುರು – ಹೀಗೆ ವ್ಯಕ್ತಿತ್ವದ ಎಲ್ಲ ಸಾಧ್ಯತೆಗಳನ್ನು ನಿಕಷಕ್ಕೆ ಒಡ್ಡುತ್ತಾ ಸಾಗುವ ಅವಳ ಈ ಗುಣ ಆಕೆಯಲ್ಲಿ ಅಂತಸ್ಥವಾಗಿರುವ ಕರುಣೆ, ಮಮತೆ, ಪ್ರೇಮ, ಸ್ನೇಹ, ಅಂತಃಕರಣವೆಂಬ ಧರ್ಮಪ್ರಜ್ಞೆಯ ಪ್ರತೀಕಗಳೇ ಹೌದು.