ಕವಿತೆ: ವಿಷಯ ನಿಮ್ಮಲ್ಲೇ ಇರಲಿ
ಗಾಳಿಯ ಅಂಚಿನಲ್ಲಿ
ಒಂದು ಮಾತು
ಉಸಿರಿನೊಂದಿಗೆ
ಆಕಾರ ಕುದುರಿಸುತ್ತಿದೆ
ಮೊನ್ನೆಯಷ್ಟೆ ಬಸ್ಸಿನಿಂದಿಳಿದರಲ್ಲ
ಯಾಕಿಷ್ಟು ಬೇಗ ಹೊರಟುಬಿಟ್ಟರು
ನಿನ್ನೆ ಪೇಟೆಯಲ್ಲಿ ಕಂಡಾಗಲೂ ಯಾವುದೋ
ಬೀಗದ ಕೈ ಕಳಕೊಂಡವರಂತೆ
ಅಧೋವದನರಾಗಿ ಅಲೆಯುತ್ತಿದ್ದರು
ವಿಷಯಗಳು ನಿರಾಕಾರವನ್ನು ಅರಸುತ್ತ
ನಡುರಾತ್ರಿಯ ಬಿಕೋ ಬೀದಿಗಳಲ್ಲಿ
ಗಸ್ತು ಹಾಕುವವು
ಒಂದು ದಪ್ಪ ಬಾಗಿಲ ಮಿಡ ಸರಿಸಿದ ಸದ್ದು
ಇನ್ನೆಲ್ಲೋ ಒಂದು ಅಸ್ಪಷ್ಟ ಉಲುಹು
ಒಂದು ಪಾತ್ರೆಯ ಮುಚ್ಚಳ ಎಲ್ಲೋ
ಬಿದ್ದು
ರಿವ್ವ ರಿವ್ವ ರಿವ್ವ ಎಂದು
ನೀರವಗೊಳ್ಳುವ ತನಕದ ಉತ್ಕಂಠೆ
ಒಲೆ ಹಿಂದಿನ ಮಸಿಗೋಡೆಯ ಮೇಲೆ
ದೇವರದೆ ಕಂಬನಿ ಕಲೆ
ಊದುಗೊಳವೆಯಲಿ ಇನ್ನೂ ಉಸಿರಿದೆ
ಏನೋ ಕೇಳಲೆಂದೆ ಬಂದಿದ್ದ ಹಣ್ಣು ತರುಣ
ಇನ್ಯಾರೋ ಇದ್ದರೆಂದು ಮಾತೆ ಆಡದೆ ಹೋದ
ಇನ್ನೇನು ನಿಮ್ಮ ಕಿಟಕಿಗೇ ಬರುತ್ತಿರುವ
ಹಳದಿ ಸಿಗ್ನಲ್‌ ಕಂಗಳ ಹಸಿದ ಬಾಲ ದೇವತೆಗಳು
ನೀವೆಷ್ಟೇ ಕಣ್‌ತಪ್ಪಿಸಿದರೂ ಎಷ್ಟೇ ಸ್ಮಾರ್ಟ್‌ ಆಗಿ
ಇನ್‌ಶರ್ಟ್‌ ಮಾಡಿ ಇನ್‌ಕಂ ಟ್ಯಾಕ್ಸ್‌ ಕಟ್ಟಿದರೂ
ಇಗೋ ಸೀದ ಬಂದು ನಿಮ್ಮ ಆತ್ಮದ
ಚಿಂದಿಯ ಒಂದು ಹರುಕಿನಲ್ಲಿ
ಖಾಯಂ ಇದ್ದು ಬಿಡುವರು
ವಿಷಯ ನಿಮ್ಮಲ್ಲೇ ಇರಲಿ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.