ಸೋಮವಾರ, ಮೇ 10, 2021
21 °C

ಕುಗ್ಗದ ಹಳೆಗನ್ನಡ ಪ್ರಭಾವ: ಸ.ರಘುನಾಥ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಉತ್ತನೂರು ರಾಜಮ್ಮ ವೇದಿಕೆ (ಮುಳಬಾಗಲು): ಹಳೆಗನ್ನಡ ಕಾವ್ಯ ಓದಲು ಕಷ್ಟ ಎಂಬ ಅಭಿಪ್ರಾಯದ ನಡುವೆಯೇ ಅದು ತನ್ನ ಪ್ರಭಾವವನ್ನು ಆಧುನಿಕ ಸಂದರ್ಭದಲ್ಲೂ ಉಳಿಸಿಕೊಂಡಿದೆ ಎಂದು ಲೇಖಕ, ಅನುವಾದಕ ಸ.ರಘುನಾಥ ಅಭಿಪ್ರಾಯಪಟ್ಟರು.



ಪಟ್ಟಣದಲ್ಲಿ ಬುಧವಾರದಿಂದ ಆರಂಭವಾಗಿರುವ ತಾಲ್ಲೂಕು ಮಟ್ಟದ ಎರಡನೇ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಹಳೆಗನ್ನಡ ಕಾವ್ಯ ಕುರಿತ ಗೋಷ್ಠಿಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ಹಳೆಗನ್ನಡ ಹುಟ್ಟಿದ್ದು ನಲ್ಮೆಯ ನೆಲೆಯಲ್ಲಿ. ಪಂಪನ ಕಾಲದಲ್ಲಿ ಗಟ್ಟಿ ನೆಲೆ ಕಂಡ ಆ ಕಾವ್ಯದ ಪ್ರಭಾವದಿಂದ ಕುವೆಂಪು, ಗೋಪಾಲಕೃಷ್ಣ ಅಡಿಗ, ರಾಮಚಂದ್ರಶರ್ಮ, ಪುತಿನ ಒಳಗೊಂಡಂತೆ ಕನ್ನಡದ ಎಲ್ಲ ಆಧುನಿಕ ಲೇಖಕರು ಮುಕ್ತರಾಗಲು ಸಾಧ್ಯವಾಗಲಿಲ್ಲ ಎಂದು ಹೇಳಿದರು.



ಪ್ರೊ.ಬಿ.ಆರ್.ದೇವರಾಜ್ ಜನ್ನನ ಅಮೃತಮತಿ ಪ್ರಸಂಗದ ಕುರಿತು, ಪ್ರೊ.ಸಿ.ಎ.ರಮೇಶ್ ಹಳೆಗನ್ನಡ ಕಾವ್ಯದ ಓದಿನ ರೀತಿ-ನೀತಿಗಳ ಕುರಿತು ಮಾತನಾಡಿದರು. ನಂತರ ಶ್ರೀನಿವಾಸಪುರ ತಾಲ್ಲೂಕಿನ ಕಶೆಟ್ಟಿಪಲ್ಲಿ ಶಾಲೆ ಮಕ್ಕಳು ಹಳೆಗನ್ನಡ ರೂಪಕ ಪ್ರಸ್ತುತಪಡಿಸಿದರು.



ನಂತರ ನಡೆದ ಸ್ಥಳೀಯ ಸಾಹಿತ್ಯ ಗೋಷ್ಠಿಯಲ್ಲಿ ವಿಜ್ಞಾನ ಲೇಖಕ ವಿ.ಎಸ್.ಎಸ್.ಶಾಸ್ತ್ರಿ ಅಧ್ಯಕ್ಷತೆ ವಹಿಸಿದ್ದರು. ಡಿವಿಜಿ ಕೃತಿಗಳಲ್ಲಿ ವಿಜ್ಞಾನ ಕುರಿತು ಪ್ರೊ.ಎಂ.ಆರ್.ನಾಗರಾಜ್, ಉತ್ತನೂರು ರಾಜಮ್ಮ ಅವರ ಬದುಕು-ಬರಹ ಕುರಿತು ಮಂಜುಕನ್ನಿಕಾ, ದಾಸಸಾಹಿತ್ಯಕ್ಕೆ ಶ್ರೀಪಾದರಾಜರ ಕೊಡುಗೆ ಕುರಿತು ಉತ್ತನೂರು ನಾರಾಯಣಾಚಾರ್ ಮಾತನಾಡಿದರು. ಸಂಜೆ ನಡೆದ ನಗೆಹಬ್ಬದ ಕಾರ್ಯಕ್ರಮದಲ್ಲಿ  ರಿಚರ್ಡ್ ಲೂಯಿಸ್, ಪ್ರೊ.ಕೃಷ್ಣೇಗೌಡ ಮತ್ತು ಮೈಸೂರು ಆನಂದ್ ತಂಡ ಸಭಿಕರನ್ನು ನಗೆಗಡಲಿನಲ್ಲಿ ಮುಳುಗಿಸಿದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.