ಮಂಗಳವಾರ, ಏಪ್ರಿಲ್ 13, 2021
23 °C

ಕೊರೆಯುವ ಚಳಿಗೆ ನಲುಗಿದ ಜನ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ವಿಜಾಪುರ: ಜಿಲ್ಲೆಯಲ್ಲಿ ಕಳೆದ ಮೂರು ದಿನಗಳಿಂದ ಬೀಸುತ್ತಿರುವ ಕೊರೆಯುವ ಚಳಿ ಗಾಳಿ ಜನತೆಯನ್ನು ನಲಿಗಿಸಿದೆ. ಎರಡು ದಿನ 13ಡಿಗ್ರಿ ಸೆಲ್ಸಿಯಸ್ ದಾಖಲಾಗಿದ್ದ ಕನಿಷ್ಠ ತಾಪಮಾನ ಶುಕ್ರವಾರ 11.8 ಡಿಗ್ರಿ ಸೆಲ್ಸಿಯಸ್‌ಗೆ ಕುಸಿದಿದೆ. ಇನ್ನೂ ಕೆಲ ದಿನ ಈ ಚಳಿ ಮುಂದುವರೆಯಲಿದೆ.



ವಿಜಾಪುರ ಉರಿಬಿಸಿಲ ನಾಡು. ಇಲ್ಲಿ ಇರುವುದು `ಬೇಸಿಗೆ~ ಮತ್ತು `ಕಡು ಬೇಸಿಗೆ~ ಎರಡೇ ಕಾಲ ಎಂಬ ಮಾತು ಜನಜನಿತ. ಕಳೆದ ಒಂದೆರಡು ವರ್ಷಗಳಿಂದ ಈ ಮಾತು ಸುಳ್ಳಾಗುತ್ತಿದೆ. ಹವಾಮಾನ ವೈಪರಿತ್ಯದ ಪರಿಣಾಮ ವಿಜಾಪುರ ಜಿಲ್ಲೆಯ ಮೇಲೂ ಉಂಟಾಗುತ್ತಿದೆ. ಅತೀ ಹೆಚ್ಚು ಬಿಸಿಲು-ಅತೀ ಹೆಚ್ಚು ಚಳಿಗೆ ಈ ಜಿಲ್ಲೆಯ ಜನ ಸಾಕ್ಷಿಯಾಗುತ್ತಿದ್ದಾರೆ.



ಈಗಿನ ಚಳಿಯಿಂದ ಹೆಚ್ಚು ನಲಗುತ್ತಿರುವವರು ಶಾಲಾ ಮಕ್ಕಳು. ದಸರಾ-ದೀಪಾವಳಿ ರಜೆಯಲ್ಲಿ ಮಜಾ ಉಡಾಯಿಸಿದ್ದ ಮಕ್ಕಳಿಗೆ ಈಗಷ್ಟೇ ಶಾಲೆಗಳು ಪುನರರಾಂಭಗೊಂಡಿವೆ. ರಜಾ ಅವಧಿಯಲ್ಲಿ ಬೆಳಿಗ್ಗೆ ಬಹು ಹೊತ್ತಿನವರೆಗೆ ಹಾಯಾಗಿ ಮಲಗಿರುತ್ತಿದ್ದ ಮಕ್ಕಳು ಶಾಲೆಗಳ ಸಮಯಕ್ಕೆ ಸರಿಯಾಗಿ ನಸುಕಿನಲ್ಲಿ ಏಳುವುದನ್ನು ಮತ್ತೆ ರೂಢಿಸಿಕೊಳ್ಳುವ ಮೊದಲೇ ಚಳಿ ದಾಳಿ ಇಟ್ಟಿದೆ.



`ನಗರದ ಬಹುತೇಕ ಪೂರ್ವ ಪ್ರಾಥಮಿಕ ಮತ್ತು ಪ್ರಾಥಮಿಕ ಶಾಲೆಗಳ ತರಗತಿಗಳು ಬೆಳಿಗಿನ ಅವಧಿಯಲ್ಲಿಯೇ ನಡೆಯುತ್ತಿವೆ. ಮಕ್ಕಳನ್ನು ಹಾಸಿಗೆಯಿಂದ ಎಬ್ಬಿಸುವುದೇ ದೊಡ್ಡ ಪ್ರಯಾಸದ ಕೆಲಸ. ಸುಖನಿದ್ರೆಯಲ್ಲಿರುವ ಮಕ್ಕಳನ್ನು ಎಬ್ಬಿಸಲು ಹರಸಾಹಸ ಮಾಡಬೇಕಾಗುತ್ತದೆ~ ಎನ್ನುತ್ತಾರೆ ಬಹುಪಾಲು ಪಾಲಕರು.



ಅತಿ ಹೆಚ್ಚು ಉಷ್ಣತೆ ಮತ್ತು ಅತಿ ಕಡಿಮೆ ಚಳಿಯ ಪರಿಣಾಮ ಜನತೆಯ ಚರ್ಮ ಸುಕ್ಕುಗಟ್ಟುತ್ತಿದೆ. ಹೀಗಾಗಿ ಬಹುತೇಕರು ಕೋಲ್ಡ್ ಕ್ರೀಮ್, ಲೋಷನ್‌ಗಳ ಮೊರೆ ಹೋಗುತ್ತಿದ್ದಾರೆ.



`ಬಂಗಾಳ ಕೊಲ್ಲಿಯಲ್ಲಿ ವಾಯುಭಾರ ಕುಸಿತ ಉಂಟಾಗಿರುವುದರಿಂದ ಉತ್ತರ ದಿಕ್ಕಿನಿಂದ ತಂಪು ಗಾಳಿ ಬೀಸುತ್ತಿದೆ. ಹೀಗಾಗಿ ನಮ್ಮಲ್ಲಿ ಚಳಿ ಹೆಚ್ಚಾಗಿದೆ. ಇನ್ನು 2-3 ದಿನ ಈ ಚಳಿ ಮುಂದುವರೆಯಲಿದೆ. ತಮಿಳು ನಾಡಿನಲ್ಲಿ ನೀಲಂ ಚಂಡಮಾರುತ ಉಂಟಾದ ಸಂದರ್ಭದಲ್ಲಿಯೂ ನಮ್ಮಲ್ಲಿ ಚಳಿ ಹೆಚ್ಚಿತ್ತು. ವಾಯುಭಾರ ಕುಸಿದರೆ ನಮ್ಮಲ್ಲಿ ಉಷ್ಣತೆ ಕಡಿಮೆಯಾಗುತ್ತದೆಯೇ ಹೊರತು ಮಳೆ ಆಗುವುದಿಲ್ಲ~ ಎಂದು ಇಲ್ಲಿಯ ಹಿಟ್ಟಿನಹಳ್ಳಿಯ ಪ್ರಾದೇಶಿಕ ಕೃಷಿ ಸಂಶೋಧನಾ ಕೇಂದ್ರದ ಹವಾಮಾನ ತಜ್ಞ ಡಾ.ಎಚ್. ವೆಂಕಟೇಶ ಹೇಳುತ್ತಾರೆ.



`ಒಂದು ವಾರಗಳ ವರೆಗೆ ಕನಿಷ್ಠ ತಾಪಮಾನ 10 ಡಿಗ್ರಿ ಸೆಲ್ಸಿಯಸ್‌ಗಿಂತ ಕಡಿಮೆ ಇದ್ದರೆ ಜೋಳದ ಬೆಳೆಗೆ ತೊಂದರೆಯನ್ನುಂಟು ಮಾಡುತ್ತದೆ. ಅದನ್ನು ಹೊರತು ಪಡಿಸಿದರೆ ಈ ಹವಾಮಾನ ವೈಪರಿತ್ಯ ಇತರ ಬೆಳೆಗಳ ಮೇಲೆ ಪರಿಣಾಮ ಬೀರದು~ ಎನ್ನುತ್ತಾರೆ ಅವರು.



`2007ರ ನವೆಂಬರ್ ತಿಂಗಳಲ್ಲಿ ಎರಡು ದಿನಗಳ ಕಾಲ 5.4 ಡಿಗ್ರಿ ಸೆಲ್ಸಿಯಸ್ ಹಾಗೂ 2011ರ ಡಿಸೆಂಬರ್ 27ರಂದು 8 ಡಿಗ್ರಿ ಸೆಲ್ಸಿಯಸ್ ಕನಿಷ್ಠ ಉಷ್ಣಾಂಶ ದಾಖಲಾಗಿತ್ತು. ಎರಡು ದಿನಳಿಂದ ಕನಿಷ್ಠ ತಾಪಮಾನ 13 ಡಿಗ್ರಿ ಸೆಲ್ಸಿಯಸ್ ಇದ್ದು, ಶುಕ್ರವಾರ 11.8ರಷ್ಟು ದಾಖಲಾಗಿದೆ. ಈ ವರ್ಷ ದಾಖಲಾದ ಕನಿಷ್ಠ ತಾಪಮಾನ ಇದು~ ಎಂಬುದು ಅವರ ವಿವರಣೆ.



ಜಿಲ್ಲೆಯಲ್ಲಿ ಸತತ ಮೂರು ಹಂಗಾಮಿನಲ್ಲಿ ಭೀಕರ ಬರ. ಕುಡಿಯುವ ನೀರಿಗೂ ತತ್ವಾರ ಉಂಟಾಗಿತ್ತು. ಕೆರೆ-ಕಟ್ಟೆಗಳು ಬರಿದಾಗಿದ್ದವು. ಆಲಮಟ್ಟಿ ಜಲಾಶಯದಲ್ಲಿಯ ನೀರಿನ ಮಟ್ಟವೂ ಗಣನೀಯವಾಗಿ ಕುಸಿದಿತ್ತು. ಬೆಳೆ ಒಣಗಿತ್ತು. ಇತ್ತೀಚಿಗೆ ಆದ ಮಳೆಯಿಂದ ಬೆಳೆಗಳು ಜೀವ ಹಿಡಿದುಕೊಂಡಿವೆ. ಆದರೂ, ಜಿಲ್ಲೆಯಲ್ಲಿ ಚಳಿ ಹೆಚ್ಚಿರುವುದು ಜನತೆಗೆ ಅಚ್ಚರಿ ತಂದಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.