ಹುಡುಗಿ ಹುಡುಕಾಟ

ನನಗೆ ಈಗಲೂ ಪ್ರೀತಿಯಲ್ಲಿ ನಂಬಿಕೆ ಇದೆ. ಹಣೆಬರಹವನ್ನೂ ನಂಬುತ್ತೇನೆ. ಒಂದು ಪರಿಪೂರ್ಣ ಪ್ರೇಮಕತೆ ವಿಶ್ವದಲ್ಲಿ ಸಿಗುವುದು ದುರ್ಲಭವಾಗಿದೆ... ಹೀಗೆಲ್ಲ ಮಾತನಾಡುತ್ತಿರುವುದು ಶಾಹಿದ್ ಕಪೂರ್.



ಅನೇಕ ಹುಡುಗಿಯರೊಡನೆ ಇರುವ ಕತೆಗಳನ್ನೆಲ್ಲ ಹಿಂದಿಕ್ಕಿ ಈಗ `ಏಕ್ ಕಹಾನಿ ತೇರಿ ಮೇರಿ~ ಚಿತ್ರದಲ್ಲಿ ತೊಡಗಿಸಿಕೊಂಡಿದ್ದಾರೆ.



2004ರಲ್ಲಿ ತೆರೆಕಂಡ `ಫಿದಾ~ ಚಿತ್ರದ ಚಿತ್ರೀಕರಣದ ಸಂದರ್ಭದಲ್ಲಿ ಕರೀನಾ ಕಪೂರ್ ಜೊತೆಗೆ ಆರಂಭವಾದ ಪ್ರೇಮ ಕತೆ, 2007ರ ಚಿತ್ರ `ಜಬ್ ವಿ ಮೆಟ್~ ಚಿತ್ರದೊಂದಿಗೆ `ದಿ ಎಂಡ್~ ಕಂಡಿತ್ತು. ನಂತರ ಶಾಹಿದ್ ಹೆಸರು `ಕಿಸ್ಮತ್ ಕನೆಕ್ಷನ್~ ಚಿತ್ರ ಬಿಡುಗಡೆಯಾದಾಗ ವಿದ್ಯಾ ಬಾಲನ್ ಜೊತೆಗೆ, `ಕಮೀನೆ~ ಬಿಡುಗಡೆಯಾದಾಗ ಪ್ರಿಯಾಂಕಾ ಚೋಪ್ರಾ ಜೊತೆಗೆ, `ಬದ್ಮಾಶ್ ಕಂಪೆನಿ~ ಚಿತ್ರದೊಂದಿಗೆ ಅನುಷ್ಕಾ ಶರ್ಮಾ ಜೊತೆಗೆ ಹೀಗೆ ಒಬ್ಬೊಬ್ಬರೊಡನೆಯೂ ಬೆಸೆಯುತ್ತಲೇ ಹೋಯಿತು. ಈ ಬಗ್ಗೆ ಬಾಲಿವುಡ್‌ನಲ್ಲಿ ಗುಸುಗುಸು ಆರಂಭವಾಗಿ ತಣ್ಣಗಾಗುತ್ತಿದ್ದವು. ಪ್ರಿಯಾಂಕಾ ಎಚ್ಚರ ತಪ್ಪಿದಾಗ ಶಾಹಿದ್ ಅಮ್ಮ ಹೋಗಿ ಮಾತನಾಡಿಸಿ ಬಂದರು. ಮುಂದಿನ ವರ್ಷ ಅವರ ಮದುವೆಯಂತೆ ಎಂಬ ಗಾಳಿ ಸುದ್ದಿಯೂ ಹರಡಿತು. 31ರ ಹರೆಯದ ಚೂಪುಕಂಗಳ ಈ ಹುಡುಗ ಮಾತ್ರ ಯಾವ ಪ್ರೀತಿಯ ಬಗ್ಗೆಯೂ ಮಾತನಾಡಲಿಲ್ಲ.



ಈಗ ಸಂತನಂತೆ ನಿಜವಾದ ಪ್ರೀತಿಯ ಹುಡುಕಾಟದಲ್ಲಿದ್ದೇನೆ ಎಂದು ಮಾತನಾಡುತ್ತಿದ್ದಾನೆ. ವಿಶ್ವದಲ್ಲಿ ಯಾರಿಗೂ ಸತ್ಯವಾದ ಪ್ರೀತಿ ದೊರೆಯುವುದೇ ಇಲ್ಲ. ಸತ್ಯವಾಗಿಯೂ ಪ್ರೀತಿಸಿದವರದ್ದೆಲ್ಲ ಪರಿಪೂರ್ಣ ಕತೆಯೂ ಅಲ್ಲ ಎಂದೆಲ್ಲ ಹೇಳಿದ್ದಾನೆ. ಸದ್ಯ ಮದುವೆಗೆ ಸಿದ್ಧ ಎಂದು ಘೋಷಿಸಿರುವ ಈ ಹುಡುಗ ಸೂಕ್ತ ಹುಡುಗಿಗಾಗಿ ಹುಡುಕಾಡುತ್ತಿದ್ದಾನಂತೆ.