ನವದೆಹಲಿ: ಚಿನ್ನ ಮತ್ತು ಬೆಳ್ಳಿಯ ಆಭರಣ ತಯಾರಿಕೆಯಲ್ಲಿ ಬಳಸುವ ಪಿನ್‌, ವೈರ್‌, ಮಣಿಗಳಂತಹ ವಸ್ತುಗಳ ಮೇಲಿನ ಆಮದು ಸುಂಕವನ್ನು ಹಣಕಾಸು ಸಚಿವಾಲಯ ಶೇ 10ರಿಂದ ಶೇ 15ಕ್ಕೆ ಹೆಚ್ಚಿಸಿದೆ. ಇದಲ್ಲದೇ ಈ ಲೋಹಗಳಿಂದ ತಯಾರಿಸಿದ ನಾಣ್ಯಗಳ ಮೇಲಿನ ಕಸ್ಟಮ್ ಸುಂಕವನ್ನೂ ಹೆಚ್ಚಿಸಲಾಗಿದೆ. ಜನವರಿ 22ರಿಂದ ಅನ್ವಯ ಆಗುವಂತೆ ಇದು ಜಾರಿಗೆ ಬಂದಿದೆ.
ಈ ಸುಂಕವು ಮೂಲ ಕಸ್ಟಮ್ ಸುಂಕ ಶೇ 10 (ಬಿಸಿಡಿ) ಮತ್ತು ಕೃಷಿ ಮೂಲಸೌಕರ್ಯ ಅಭಿವೃದ್ಧಿ ಸೆಸ್ (ಎಐಡಿಸಿ) ಶೇ 5 ಒಳಗೊಂಡಿರುತ್ತದೆ. ಆದರೆ, ಸಮಾಜ ಕಲ್ಯಾಣ ಸೆಸ್‌ನಿಂದ (ಎಸ್‌ಡಬ್ಲ್ಯುಎಸ್) ವಿನಾಯಿತಿ ನೀಡಲಾಗಿದೆ.
ಮೂಲಭೂತ ಕಸ್ಟಮ್ಸ್‌ ಸುಂಕ ಶೇ 10 ಮತ್ತು ಕೃಷಿ ಮೂಲಸೌಕರ್ಯ ಅಭಿವೃದ್ಧಿ ಸೆಸ್ ಶೇ 5ರಷ್ಟು ಇದರಲ್ಲಿ ಸೇರಿವೆ.
