ದಿನದ ಬಿಡುವಿನ ಬಳಿಕ ಮತ್ತೆ ಏರಿಕೆಯಾದ ಪೆಟ್ರೋಲ್‌, ಡೀಸೆಲ್‌ ದರ
ಬೆಂಗಳೂರು: ಸತತ 21 ದಿನಗಳು ಏರಿಕೆಯಾಗಿದ್ದ ಪೆಟ್ರೋಲ್‌ ಮತ್ತು ಡೀಸೆಲ್‌ ದರ ಭಾನುವಾರದಂದು ಬ್ರೇಕ್‌ ತೆಗೆದುಕೊಂಡಿತ್ತು. ಸೋಮವಾರ ಮತ್ತೆ ಓಟ ಮುಂದುವರಿದಿದ್ದು, ಲೀಟರ್ ಪೆಟ್ರೋಲ್‌ಗೆ ₹0.05 ಹಾಗೂ ಲೀಟರ್ ಡೀಸೆಲ್‌ಗೆ ₹0.13ರಷ್ಟು ಬೆಲೆ ಏರಿಕೆಯಾಗಿದೆ.
ಈ ಮೂಲಕ ದೆಹಲಿಯಲ್ಲಿ ಪ್ರತಿ ಲೀಟರ್ ಪೆಟ್ರೋಲ್‌ಗೆ ₹80.43 ಹಾಗೂ ಡೀಸೆಲ್‌ಗೆ ₹80.53 ಆಗಿದೆ. ಪೆಟ್ರೋಲ್‌ಗಿಂತಲೂ ಡೀಸೆಲ್‌ ದರ ಹೆಚ್ಚಳ ಸಹ ಮುಂದುವರಿದಿದೆ. ಬೆಂಗಳೂರಿನಲ್ಲಿ ಲೀಟರ್ ಪೆಟ್ರೋಲ್‌ಗೆ ₹83.02 ಮತ್ತು ಡೀಸೆಲ್‌ಗೆ ₹76.56 ಇದೆ.
ನಿತ್ಯ ತೈಲ ದರ ಪರಿಷ್ಕರಿಸುವ ಪ್ರಕ್ರಿಯೆಯನ್ನು ತೈಲ ಮಾರಾಟ ಕಂಪನಿಗಳು ಜೂನ್ 7ರಿಂದ ಪುನರಾರಂಭಿಸಿದವು. ಅಂದಿನಿಂದ ದೇಶದಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ಪ್ರತಿ ಲೀಟರ್‌ಗೆ ಸುಮಾರು ₹10ರಷ್ಟು ಏರಿಕೆ ಕಂಡಿದೆ. ಡೀಸೆಲ್‌ ದರ ಏರಿಕೆಯು ಸರಕು ಸಾಗಣೆ ವೆಚ್ಚದ ಮೇಲೆ ನೇರ ಪರಿಣಾಮ ಬೀರಬಹುದಾಗಿದೆ.
2017ರ ಮೇನಿಂದ ಪ್ರತಿ ದಿನ ದರ ಪರಿಷ್ಕರಣೆ ಕ್ರಮ ಅನುಸರಿಸಲಾಗುತ್ತಿದೆ.
ಡೀಸೆಲ್‌ಗೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ವಿಧಿಸಿರುವ ಸುಂಕದಿಂದಾಗಿ ಗ್ರಾಹಕರು ಮೂಲ ಬೆಲೆಯ ಶೇ 255ರಷ್ಟು ಹಾಗೂ ಪೆಟ್ರೋಲ್‌ಗೆ ಶೇ 275ರಷ್ಟು ತೆರಿಗೆ ಪಾವತಿಸುವಂತಾಗಿದೆ. ಎರಡೂ ತೆರಿಗೆಗಳ ಪ್ರಮಾಣವು ಪೆಟ್ರೋಲ್‌ ಪಂಪ್‌ಗಳಲ್ಲಿ ಗ್ರಾಹಕರು ಪ್ರತಿ ಲೀಟರ್ ಖರೀದಿ ವೇಳೆ ತೆರುವ ಒಟ್ಟು ಬೆಲೆಯ ಶೇ 69ರಷ್ಟಾಗುತ್ತದೆ. ಇಷ್ಟೊಂದು ಪ್ರಮಾಣದ ತೆರಿಗೆ ವಿಶ್ವದಲ್ಲೇ ಹೆಚ್ಚಿನದ್ದು.
ತೈಲ ಬೆಲೆ ಕುಸಿತದ ಲಾಭ ಪಡೆಯಲು ಸರ್ಕಾರ ಮಾರ್ಚ್‌ನಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲಿನ ಸುಂಕ ಪ್ರತಿ ಲೀಟರ್‌ಗೆ ₹3ರಂತೆ ಹೆಚ್ಚಿಸಿತ್ತು. ಮೇ 6 ರಂದು ಮತ್ತೆ ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲೆ ಕ್ರಮವಾಗಿ ₹10 ಮತ್ತು ₹13ರಂತೆ ಎಕ್ಸೈಸ್‌ ಡ್ಯೂಟಿ ವಿಧಿಸಿತ್ತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.