ರಿಲಯನ್ಸ್‌, ಬಿಪಿಸಿಎಲ್‌ಗೆ ಸೌದಿಯ ಹೆಚ್ಚುವರಿ ತೈಲ?
ಅಕ್ಷರ ಗಾತ್ರ :ಆ |ಆ |ಆ
ಸಿಂಗಪುರ: ಸೌದಿ ಅರೇಬಿಯಾದ ಪ್ರಮುಖ ಇಂಧನ ಕಂಪನಿ ಅರಾಮ್ಕೊ, ಏಪ್ರಿಲ್‌ನಿಂದ ಉತ್ಪಾದನೆ ಮಾಡಲಿರುವ ಹೆಚ್ಚುವರಿ ತೈಲವು ಭಾರತ ಮತ್ತು ಚೀನಾದ ಕಂಪನಿಗಳಿಗೆ ಲಭ್ಯವಾಗಲಿದೆ ಎಂದು ಮೂಲಗಳು ಹೇಳಿವೆ.
ಹೆಚ್ಚುವರಿ ತೈಲವನ್ನು ತಮಗೆ ನೀಡುವಂತೆ ಕೊರಿಯಾ, ತೈವಾನ್‌ ಮತ್ತು ಚೀನಾದ ಕಂಪನಿಗಳು ಮಾಡಿದ್ದ ಮನವಿಯನ್ನು ಅರಾಮ್ಕೊ ತಿರಸ್ಕರಿಸಿದೆ. ಹೀಗಾಗಿ ಭಾರತ ಮತ್ತು ಚೀನಾದ ಕಂಪನಿಗಳಿಗೆ ಒಪ್ಪಿಗೆ ನೀಡುವ
ಸಾಧ್ಯತೆ ಇದೆ.
ವಿಶ್ವದಲ್ಲಿಯೇ ಅತಿದೊಡ್ಡ ತೈಲಗಾರ ಹೊಂದಿರುವ ರಿಲಯನ್ಸ್‌ ಇಂಡಸ್ಟ್ರೀಸ್‌ ಲಿಮಿಟೆಡ್‌ (ಆರ್‌ಐಎಲ್‌) ಮತ್ತು ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಲಿಮಿಟೆಡ್‌ (ಬಿಪಿಸಿಎಲ್‌) ಕಂಪನಿಗಳಿಗೆ ತಲಾ 20 ಲಕ್ಷ ಬ್ಯಾರಲ್‌ಗಳಷ್ಟು ಕಚ್ಚಾ ತೈಲವನ್ನು ಸೌದಿ ಅರೇಬಿಯಾ ಪೂರೈಕೆ ಮಾಡಲಿದೆ.
ಈ ಕುರಿತು ಅರಾಮ್ಕೊ ಕಂಪನಿ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ರಷ್ಯಾದ ವಿರುದ್ಧ ತೈಲ ದರ ಸಮರ ಆರಂಭಿಸಿರುವ ಸೌದಿ ಅರೇಬಿಯಾ, ಏಪ್ರಿಲ್‌ನಿಂದ ಕಡಿಮೆ ದರಕ್ಕೆ ತೈಲ ಪೂರೈಸಲು ಉತ್ಪಾದನೆ ಹೆಚ್ಚಳ ಮತ್ತು ದರ ಇಳಿಕೆ ನಿರ್ಧಾರವನ್ನೂ ಈಗಾಗಲೇ ಘೋಷಿಸಿದೆ.
‘ರಷ್ಯಾ ಮತ್ತು ಅಮೆರಿಕದ ಶೆಲ್‌ ಕಂಪನಿಯ ವಿರುದ್ಧ ಸೌದಿ ಅರೇಬಿಯಾ ದರ ಸಮರಕ್ಕೆ ಪ್ರಯತ್ನಿಸುತ್ತಿದೆ’ ಎಂದು ಉತ್ತರ ಏಷ್ಯಾದ ತೈಲ ಸಂಸ್ಕರಣಾಗಾರದ ವರ್ತಕರೊಬ್ಬರು ಹೇಳಿದ್ದಾರೆ.
ಕಚ್ಚಾ ತೈಲ ದರ ಇಳಿಕೆ
ಕೊರೊನಾ-2 ಹರಡುವಿಕೆ ತಡೆಯುವ ಉದ್ದೇಶದಿಂದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು ಯುರೋಪ್‌ ಪ್ರಯಾಣದ ಮೇಲೆ ನಿರ್ಬಂಧ ಹೇರಿದ್ದಾರೆ. ಇದರಿಂದಾಗಿ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ದರ ಶೇ 5.6ರಷ್ಟು ಇಳಿಕೆ ಕಂಡಿತು.
ಕಡಿಮೆ ದರಕ್ಕೆ ತೈಲ ಪೂರೈಕೆ ಮಾಡುವ ಸೌದಿ ಅರೇಬಿಯಾದ ನಿರ್ಧಾರವೂ ದರ ಇಳಿಕೆಗೆ ಕಾರಣವಾಗಿದೆ.
ಬ್ರೆಂಟ್‌ ತೈಲ ದರ ಶೇ 5.6ರಷ್ಟು ಇಳಿಕೆಯಾಗಿ ಒಂದು ಬ್ಯಾರಲ್‌ಗೆ 33.78 ಡಾಲರ್‌ಗಳಿಗೆ ತಲುಪಿದೆ. ಅಮೆರಿಕದ ಕಚ್ಚಾ ತೈಲ ದರ ಶೇ 5.4ರಷ್ಟು ಇಳಿಕೆ ಕಂಡು ಒಂದು ಬ್ಯಾರಲ್‌ಗೆ 31.21 ಡಾಲರ್‌ಗಳಷ್ಟಾಗಿದೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
