13,000 ಅಂಶ ದಾಟಿದ ನಿಫ್ಟಿ; ಈವರೆಗಿನ ಗರಿಷ್ಠ ಮಟ್ಟದಲ್ಲಿ ಸೆನ್ಸೆಕ್ಸ್‌

ವಿದೇಶಿ ಹೂಡಿಕೆದಾರರು ಭಾರತದ ಷೇರುಪೇಟೆಯತ್ತ ಮುಖ ಮಾಡಿರುವುದು ಹಾಗೂ ಜಾಗತಿಕ ಷೇರುಪೇಟೆಗಳಲ್ಲೂ ಸಕಾರಾತ್ಮ ವಹಿವಾಟು ದಾಖಲಾಗಿರುವುದರಿಂದ ಹೂಡಿಕೆದಾರರಲ್ಲಿ ಖರೀದಿ ಉತ್ಸಾಹ ಹೆಚ್ಚಿದೆ. ಎಚ್‌ಡಿಎಫ್‌ಸಿ ಬ್ಯಾಂಕ್‌, ಮಾರುತಿ, ಒಎನ್‌ಜಿಸಿ ಹಾಗೂ ಆಕ್ಸಿಸ್‌ ಬ್ಯಾಂಕ್‌ ಉತ್ತಮ ಗಳಿಕೆ ದಾಖಲಿಸಿವೆ.

ರಾಷ್ಟ್ರೀಯ ಷೇರುಪೇಟೆ ಸಂವೇದಿ ಸೂಚ್ಯಂಕ ನಿಫ್ಟಿ ಬೆಳಿಗ್ಗೆ 11:15ರ ವರೆಗೂ 90 ಅಂಶ ಏರಿಕೆಯೊಂದಿಗೆ 13,016 ಅಂಶ ಮುಟ್ಟಿದೆ. ಸೆನ್ಸೆಕ್ಸ್‌ 309 ಅಂಶ ಹೆಚ್ಚಳವಾಗಿ ಈವರೆಗಿನ ಗರಿಷ್ಠ ಮಟ್ಟ 44,386 ಅಂಶಗಳಲ್ಲಿ ವಹಿವಾಟು ಮುಂದುವರಿದಿದೆ.

ಎಚ್‌ಡಿಎಫ್‌ಸಿ, ಆಕ್ಸಿಸ್‌, ಐಸಿಐಸಿಐ, ಕೊಟ್ಯಾಕ್ ಮಹೀಂದ್ರಾ, ಎಸ್‌ಬಿಐ ಸೇರಿದಂತೆ ಬಹುತೇಕ ಬ್ಯಾಂಕ್‌ ವಲಯದ ಷೇರುಗಳ ಮೌಲ್ಯ ಶೇ 1ರಿಂದ ಶೇ 2.7ರಷ್ಟು ಹೆಚ್ಚಳ ಕಂಡಿದೆ. ಇನ್ಫೊಸಿಸ್, ಬಜಾಜ್‌ ಆಟೊ ಸೇರಿದಂತೆ ಕೆಲವು ಷೇರುಗಳು ನಷ್ಟ ಅನುಭವಿಸಿವೆ.

ಸೋಮವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್‌ ಶೇ 0.44ರಷ್ಟು ಗಳಿಕೆಯೊಂದಿಗೆ 44,077.15 ಅಂಶ ಹಾಗೂ ನಿಫ್ಟಿ ಶೇ 0.52ರಷ್ಟು ಏರಿಕೆಯಾಗಿ 12,926.45 ಅಂಶಗಳಲ್ಲಿ ವಹಿವಾಟು ಮುಕ್ತಾಯವಾಗಿತ್ತು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ನಿನ್ನೆ ₹4,738.44 ಕೋಟಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ.