ವೇದವ್ಯಾಸರ ಶಿವಪುರಾಣಸಾರ: ಪುಣ್ಯಫಲಗಳ ಆಗರ ಶಿವಪುರಾಣ

ಭೂಲೋಕದಲ್ಲಿ ಅನೇಕ ಶಾಸ್ತ್ರಗಳೂ ಪುರಾಣಗಳೂ ಬೇಕಾದಷ್ಟಿವೆ. ಆದರೆ, ಶಿವಪುರಾಣ ಅವುಗಳಿಗಿಂತ ಸರ್ವಶ್ರೇಷ್ಠವಾದುದು. ಶಿವಪುರಾಣ ಅದೆಷ್ಟು ಪರಮ ಪವಿತ್ರವಾದುದೆಂದರೆ, ಒಂದು ಕ್ಷಣ ಶಿವಪುರಾಣ ಕೇಳಿದರೂ ಮುಕ್ತಿಯೇ ಸಿಕ್ಕಿಬಿಡುತ್ತೆ. ಅಂಥದರಲ್ಲಿ ಶಿವಪುರಾಣವನ್ನ ಸಂಪೂರ್ಣ ಕೇಳುವುದು, ಹೇಳುವುದು ಮಾಡುವುದರಿಂದ ಅದೆಷ್ಟು ಪುಣ್ಯ ಸಿಗುತ್ತೆ ಅನ್ನೋದನ್ನ ಊಹಿಸಬಹುದು. ಇದಕ್ಕಾಗಿ ಸದ್ಗತಿ ಬಯಸುವವರು ಪ್ರತಿನಿತ್ಯ ಶಿವಪುರಾಣದ ಒಂದು ಶ್ಲೋಕವನ್ನಾಗಲೀ, ಅಥವಾ ಅರ್ಧಶ್ಲೋಕವನ್ನಾಗಲೀ, ಭಕ್ತಿಯಿಂದ ಪಠಿಸಬೇಕು. ಶಿವಪುರಾಣವನ್ನು ಯಾರು ಪ್ರತಿನಿತ್ಯ ಭಕ್ತಿಯಿಂದ ಪಠಿಸುವರೋ, ಅಥವಾ ಅರ್ಥಾನುವಾದ ಮಾಡುವರೋ, ಅವರು ಪುಣ್ಯಾತ್ಮರೆಂಬುದರಲ್ಲಿ ಯಾವ ಸಂಶಯವೂ ಇರುವುದಿಲ್ಲ. ಸಾಕ್ಷಾತ್ ಶಿವನ ಸ್ವರೂಪವಾದ ಶಿವಪುರಾಣವನ್ನ ಎಷ್ಟೇ ಕಷ್ಟವಾದರೂ ಬಿಡದೆ ಕೇಳಿ, ಶಿವನನ್ನ ಒಲಿಸಿಕೊಳ್ಳಬೇಕು.

ವೇದ, ಇತಿಹಾಸ, ಶಾಸ್ತ್ರ ಮೊದಲಾದ ಉತ್ತಮ ಗ್ರಂಥಗಳಲ್ಲೆಲ್ಲಾ ಶಿವಪುರಾಣವೇ ಬಹಳ ಶ್ರೇಷ್ಠವಾದದ್ದು. ಮೋಕ್ಷವನ್ನ ಬಯಸುವವರು, ಶಿವಪುರಾಣವನ್ನ ಅಧ್ಯಯನ ಮಾಡಬೇಕು. ಶಿವಪುರಾಣವನ್ನ ಬಹಳ ಭಕ್ತಿಯಿಂದ ಕೇಳಬೇಕು. ಸ್ವಯಂಪಠನ ಮಾಡಿದರಂತೂ ಇನ್ನೂ ವಿಶೇಷ ಫಲ ಸಿಗುವುದು. ಇಂಥ ಸರ್ವ ಶ್ರೇಷ್ಠವಾದ ಶೈವಪುರಾಣವನ್ನ ಕೇಳುವವರಿಗೆ ಧರ್ಮಾದಿ ಚತುರ್ವಿಧ ಪುರುಷಾರ್ಥಗಳು ದೊರೆಯುವುದು. ಶಿವಪುರಾಣ ಗ್ರಂಥವನ್ನ ನಿತ್ಯ ಪಟ್ಟೆವಸ್ತ್ರಗಳಿಂದ ಯಾರು ಅಲಂಕರಿಸಿ ಪೂಜಿಸುವರೋ, ಅವರು ಯಾವಾಗಲೂ ಸುಖವಾಗಿರುತ್ತಾರೆ. ಉತ್ತಮ ಶಾಸ್ತ್ರಗ್ರಂಥವಾದ ಶೈವಪುರಾಣವನ್ನ ಕೇಳುವ ಮನುಷ್ಯರು ಸಾಕ್ಷಾತ್ ರುದ್ರಸ್ವರೂಪರೇ ಆಗುವರು. ಇದರಲ್ಲಿ ಯಾವುದೇ ಸಂಶಯವಿಲ್ಲ ಅಂತ ಸೂತಮುನಿ ಸ್ಪಷ್ಟವಾಗಿ ಹೇಳುತ್ತಾನೆ.

ವೇದವ್ಯಾಸರೇ ತಮ್ಮ ಸ್ಕಂದಪುರಾಣದಲ್ಲಿ ಹೇಳಿರುವ ಶಿವಪುರಾಣ ಮಹಾತ್ಮೆಯ ಮೊದಲ ಅಧ್ಯಾಯದಲ್ಲಿ ಶಿವಮಹಿಮೆ ವರ್ಣನೆ ಇದ್ದರೆ, ಎರಡನೇ ಅಧ್ಯಾಯದಲ್ಲಿ ಕೆಟ್ಟ ಬುದ್ಧಿಯ ಜನ ಹೇಗೆ ಶಿವಪುರಾಣ ಕೇಳಿ ಪುನೀತರಾಗುತ್ತಾರೆಂಬ ವಿವರ ಇದೆ. ಇದನ್ನ ದೇವರಾಜನೆಂಬ ದುಷ್ಟ ಬ್ರಾಹ್ಮಣನ ಕಥೆ ಮೂಲಕ ತಿಳಿಸಲಾಗಿದೆ. ಮೂರು ಮತ್ತು ನಾಲ್ಕನೇ ಅಧ್ಯಾಯದಲ್ಲಿ ಪಾಪಿಯಾದ ಚಂಚುಲೆ ಶಿವಸಾನ್ನಿಧ್ಯ ಪಡೆದ ಕಥೆ ಇದೆ. ಐದನೇ ಅಧ್ಯಾಯದಲ್ಲಿ ಕೈಲಾಸವಾಸಿಯಾದ ಚಂಚುಲೆ ಜಗನ್ಮಾತೆ ಪಾರ್ವತಿ ಮೂಲಕ ಪಿಶಾಚಿಯಾಗಿದ್ದ ತನ್ನ ಪತಿ ಬಿಂದುಗನನ್ನ ಪುನೀತನನ್ನಾಗಿಸಿ, ಕೈಲಾಸಕ್ಕೆ ಕರೆಸಿಕೊಂಡ ದೃಷ್ಟಾಂತವಿದೆ. ಆರನೇ ಅಧ್ಯಾಯದಲ್ಲಿ ಶಿವಪುರಾಣ ಪ್ರವಚನವನ್ನ ಎಲ್ಲಿ, ಹೇಗೆ, ಹೇಳಬೇಕು, ಕೇಳಬೇಕು – ಎಂದು ತಿಳಿಸಲಾಗಿದೆ. ಅಂತಿಮವಾದ ಏಳನೇ ಅಧ್ಯಾಯದಲ್ಲಿ ಶಿವಪುರಾಣ ಕೇಳಿ, ಹೇಗೆ ಅದನ್ನ ಸಾರ್ಥಕ ಪಡಿಸಿಕೊಳ್ಳಬೇಕೆಂಬ ವಿವರ ತಿಳಿಸಲಾಗಿದೆ. ಹೀಗಾಗಿ ನಾವು ವೇದವ್ಯಾಸರ ಶಿವಪುರಾಣದ ಏಳು ಸಂಹಿತೆಗಳನ್ನು ತಿಳಿಯುವ ಮುನ್ನ, ಸ್ಕಂದಪುರಾಣದಲ್ಲಿ ಹೇಳಲಾಗಿರುವ ಶಿವಪುರಾಣದ ಮಹಿಮೆಯನ್ನ ತಿಳಿಯಬೇಕು. ಮುಂದೆ ನಾವು ಸ್ಕಂದಪುರಾಣದ ಏಳು ಅಧ್ಯಾಯಗಳಲ್ಲಿ ತಿಳಿಸಿರುವ ಶಿವಪುರಾಣದ ಮಹಿಮೆಯನ್ನು ತಿಳಿಯೋಣ.