ಹುನಗುಂದ: ಜೀವನದುದ್ದಕ್ಕೂ ಮೌಢ್ಯಾಚರಣೆ ಜಂಜಾಟದ ಕತ್ತಲೆಯ ಒತ್ತಡಕ್ಕೆ ಒಳಗಾಗದೆ ಲಿಂಗ ಪೂಜೆಯಿಂದ ಬಸವ ಬೆಳಕಿನಲ್ಲಿ ನೆಮ್ಮದಿ ಜೀವನ ನಡೆಸಬೇಕು ಎಂದು ಚಿತ್ತರಗಿ ಸಂಸ್ಥಾನಮಠ ಇಳಕಲ್ ಗುರುಮಹಾಂತ ಸ್ವಾಮೀಜಿ ಹೇಳಿದರು.
ಇಲ್ಲಿನ ತಾಲ್ಲೂಕು ಶರಣ ಸಾಹಿತ್ಯ ಪರಿಷತ್, ಕದಳಿ ಮಹಿಳಾ ವೇದಿಕೆ ಮತ್ತು ತಾಲ್ಲೂಕು ಕರ್ನಾಟಕ ಶರಣ ಸಾಹಿತ್ಯ ಪರಿಷತ್ ಸಹಯೋಗದಲ್ಲಿ ಶರಣಮ್ಮ ಲೆಕ್ಕಿಹಾಳ ನಿವಾಸದಲ್ಲಿ ಗುರುವಾರ ನಡೆದ 24ನೇ ಮನ ಮನೆಗಳಿಗೆ ವಚನ ಸೌರಭ ಮತ್ತು ಮಾಸಿಕ ಶರಣ ಚಿಂತನ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
ಬಡವರು ಜೀವನಪೂರ್ತಿ ಸಾಲ ಮಾಡಿ ಲಕ್ಷ್ಮಿ ಪೂಜೆ ಮಾಡುವುದರಿಂದ ಹಣ ಗಳಿಕೆ ಆಗದೆ ತತ್ವ ನಿಷ್ಠ ಕಾಯಕದಿಂದ ಹಣಗಳಿಸಿ ಶ್ರೀಮಂತರಾಗಬೇಕು. ಲಿಂಗಪೂಜೆಯಿಂದ ಎಲ್ಲ ಭಾಗ್ಯ ಪಡೆಯಬಹುದು ಎಂದು ಹೇಳಿದರು.
ವಿಶ್ರಾಂತ ಶಿಕ್ಷಕ ಮಹಾಂತೇಶ ತೆನಹಳ್ಳಿ ಮಾತನಾಡಿ, ಗಳಿಸಿ ಉಳಿಸುವುದು ಹಣ ಒಂದೆ ಅಲ್ಲ. ಜ್ಞಾನ, ಆರೋಗ್ಯ, ಆಸ್ತಿ ಅಂತಸ್ತುಗಳನ್ನು ಕೊನೆ ಕಾಲದಲ್ಲಿ ಯಾರೂ ಒಯ್ಯುಯುವುದಿಲ್ಲ. ಆದರೆ ಗಳಿಸಿ ಉಳಿಸಿದ್ದನ್ನು ದಾಸೋಹಕ್ಕೆ ಬಳಸಬೇಕು ಎಂದರು.
