Invest Karnataka: ಹೂಡಿದ್ದೆಷ್ಟು, ಉದ್ಯೋಗ ಸಿಕ್ಕಿದ್ದೆಷ್ಟು?

2022ರ ನವೆಂಬರ್‌ನಲ್ಲಿ ನಡೆದಿದ್ದ ‘ಇನ್ವೆಸ್ಟ್‌ ಕರ್ನಾಟಕ’ ಸಮಾವೇಶಕ್ಕೆ ಬಿಜೆಪಿ ಸರ್ಕಾರ ₹74.99 ಕೋಟಿ ಖರ್ಚು ಮಾಡಿತ್ತು. ಇದರಲ್ಲಿ ದೇಶ, ವಿದೇಶದ ಸುಮಾರು 15 ಸಾವಿರ ಪ್ರತಿನಿಧಿಗಳು ಭಾಗಹಿಸಿದ್ದರು. ಸಮಾವೇಶದ ಏಕಗವಾಕ್ಷಿ ಸಭೆಗಳಲ್ಲಿ 608 ಯೋಜನೆಗಳಿಗೆ ಅನುಮೋದನೆ ನೀಡಲಾಗಿತ್ತು. ಇವೆಲ್ಲವುಗಳಿಂದ ₹2.83 ಲಕ್ಷ ಕೋಟಿ ಬಂಡವಾಳ ಹೂಡಿಕೆಗೆ ನಿರ್ಧಾರವಾಗಿತ್ತು. ಇನ್ನೊಂದಡೆ, ಒಟ್ಟು 57 ಒಡಂಬಡಿಕೆಗಳಿಗೆ ಸಹಿ ಹಾಕಲಾಗಿತ್ತು. ಇದೆಲ್ಲದರಿಂದ ₹5.41ಲಕ್ಷ ಕೋಟಿ ಹೂಡಿಕೆ, 2.81ಲಕ್ಷ ಉದ್ಯೋಗ ಸೃಷ್ಟಿಯ ನಿರೀಕ್ಷೆ ಹೊಂದಲಾಗಿತ್ತು. ಸಮಾವೇಶ ನಡೆದು ಎರಡೂವರೆ ವರ್ಷಗಳಾಗುತ್ತಾ ಬಂದಿದೆ. 57 ಒಡಂಬಡಿಕೆಗಳಲ್ಲಿ ಅನುಮೋದನೆ ಸಿಕ್ಕಿರುವುದು 6 ಕಂಪನಿಗಳಿಗೆ ಮಾತ್ರ. ಇವುಗಳಿಂದ ಒಟ್ಟು ₹67,963 ಕೋಟಿ ಬಂಡವಾಳ ನಿರೀಕ್ಷೆ ಹೊಂದಲಾಗಿದೆ. 13,365 ಉದ್ಯೋಗ ಸಿಗುವ ಸಾಧ್ಯತೆಗಳಿವೆ. ಈ ಕಂಪನಿಗಳೂ ವಿವಿಧ ಇಲಾಖೆಗಳ ಅನುಮತಿ ಪಡೆಯುವ ಅನುಪಾಲನೆಯಲ್ಲಿ ತೊಡಗಿವೆ. ಈ ಕಂಪನಿಗಳೂ ಕಾರ್ಯರೂಪಕ್ಕೆ ಬರಲು ಕೆಲ ವರ್ಷಗಳೇ ಬೇಕಾಗುತ್ತವೆ.