ಗುರುವಾರ , ಅಕ್ಟೋಬರ್ 1, 2020
21 °C
ಆನ್‌ಲೈನ್‌ ಶಿಕ್ಷಣ

ಕಿವಿಯೊಲೆ ಮಾರಿ ಮಗಳಿಗೆ ಸ್ಮಾರ್ಟ್‌ ಫೋನ್‌ ಕೊಡಿಸಿದ ಜೋಗಮ್ಮ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಬೆಳಗಾವಿ: ಎಸ್ಸೆಸ್ಸೆಲ್ಸಿ ಓದುತ್ತಿರುವ ಮಗಳಿಗೆ ಆನ್‌ಲೈನ್‌ ಶಿಕ್ಷಣ ಸಿಗಲೆಂದು ಇಲ್ಲಿನ ಜೋಗತಿಯೊಬ್ಬರು ತಮ್ಮ ಕಿವಿಯೊಲೆಯನ್ನು ಮಾರಿ ಸ್ಮಾರ್ಟ್‌ ಫೋನ್‌ ಕೊಡಿಸಿದ್ದಾರೆ. ಇಲ್ಲಿನ ಕ್ಲಬ್‌ ರೋಡ್‌ನಲ್ಲಿ ತಾತ್ಕಾಲಿಕ ಶೆಡ್‌ ಹಾಕಿಕೊಂಡು ವಾಸ ಮಾಡಿರುವ ಸರೋಜಿನಿ ಬೇವಿನಕಟ್ಟಿ ಅವರೇ ತಮ್ಮ ಕಿವಿಯೊಲೆ ಮಾರಿದವರು.

ಇವರ ಮಗಳು ನಗರದ ಸರ್ದಾರ್‌ ಪ್ರೌಢಶಾಲೆಯಲ್ಲಿ ಎಸ್ಸೆಸ್ಸೆಲ್ಸಿ ಓದುತ್ತಿದ್ದಾಳೆ. ಕೊರೊನಾ ಸೋಂಕಿನ ಹಿನ್ನೆಲೆಯಲ್ಲಿ ಶಾಲೆಯಲ್ಲಿ ಪಾಠ–ಪ್ರವಚನಗಳು ನಡೆಯುತ್ತಿಲ್ಲ. ಆನ್‌ಲೈನ್‌ ಮೂಲಕ ಬೋಧಿಸುತ್ತಿರುವ ಪಾಠಗಳನ್ನು ತಪ್ಪದೇ ಆಲಿಸಬೇಕೆಂದು ಶಿಕ್ಷಕರು ಹೇಳಿದ್ದರು.

ಸರೋಜಿನಿ ಅವರು ಮನೆಮನೆಗೆ ತೆರಳಿ ಭಿಕ್ಷೆ ಬೇಡಿ ಬದುಕು ಸಾಗಿಸುತ್ತಿದ್ದಾರೆ. ದೊಡ್ಡ ಮಗನೊಬ್ಬ ರೈಲ್ವೆ ಅಪಘಾತದಲ್ಲಿ ಕಾಲು ಮುರಿದುಕೊಂಡಿದ್ದಾರೆ. ಯಾವುದೇ ಕೆಲಸ ಮಾಡಲಿಕ್ಕಾಗದ ಅವರು, ದಿನವಿಡೀ ಮನೆಯಲ್ಲಿಯೇ ಕಾಲ ಕಳೆಯುತ್ತಾರೆ. ಭಿಕ್ಷೆಯಿಂದಲೇ ಮಗ ಹಾಗೂ ಮಗಳ ಹೊಟ್ಟೆ ಹೊರೆಯುತ್ತಿದ್ದಾರೆ.

ಇಂತಹ ಸ್ಥಿತಿಯಲ್ಲಿ ಸ್ಮಾರ್ಟ್‌ ಫೋನ್‌ ಖರೀದಿ ಮಾಡುವಷ್ಟು ಹಣ ಅವರ ಬಳಿ ಇರಲಿಲ್ಲ. ಅದಕ್ಕಾಗಿ ತಾಯಿ ನೀಡಿದ್ದ ಬಂಗಾರದ ಕಿವಿಯೊಲೆಯನ್ನು ಮಾರಾಟ ಮಾಡಿ ₹ 10 ಸಾವಿರ ಪಡೆದುಕೊಂಡರು. ಅದೇ ಹಣದಲ್ಲಿ ಸ್ಮಾರ್ಟ್‌ ಫೋನ್‌ ಹಾಗೂ ಸಿಮ್ ಕಾರ್ಡ್‌ ಖರೀದಿಸಿ ಮಗಳಿಗೆ ಕೊಟ್ಟಿದ್ದಾರೆ. ಮಗಳು ಆನ್‌ಲೈನ್‌  ಪಾಠ ಆಲಿಸುತ್ತಿದ್ದಾರೆ.

‘ಸಾಲಿ ಕಲ್ಯಾಕ ಮಗಳಿಗೆ ಯಾವ್‌ ತ್ರಾಸೂ ಆಗಬಾರದ್ರಿ. ಅದ್ಕ ಜುಮ್ಕಿ (ಕಿವಿಯೊಲೆ) ಮಾರಿ ಮೊಬೈಲ್‌ ಕೊಡಿಸೇನ್ರಿ. ಬಾಳ ಕಷ್ಟದಾಗ ಇದೀವಿ. ಸರ್ಕಾರ ನಮಗೊಂದು ಮನಿ, ಮಗನಿಗೊಂದು ಕೆಲ್ಸ ಕೊಟ್ರ ಚಲೋ ಆಗೈತ್ರಿ’ ಎಂದು ಸರೋಜಿನಿ ಮನವಿ ಮಾಡಿಕೊಂಡರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು