108 ಆಂಬುಲೆನ್ಸ್‌ ಸಿಬ್ಬಂದಿ ಮುಷ್ಕರ ಮುಂದೂಡಿಕೆ

ಬಾಕಿ ವೇತನ ಪಾವತಿಗೆ ಸೋಮವಾರ ರಾತ್ರಿಯವರೆಗೆ ಆಂಬುಲೆನ್ಸ್‌ ಚಾಲಕರು ಮತ್ತು ಸಿಬ್ಬಂದಿ ಗಡುವು ನೀಡಿದ್ದರು. ಚುನಾವಣಾ ನೀತಿಸಂಹಿತೆ ಜಾರಿಯಲ್ಲಿರುವ ಕಾರಣದಿಂದ ತಾವು ನಿರ್ಧಾರ ಕೈಗೊಳ್ಳಲು ಅವಕಾಶವಿಲ್ಲ ಎಂದು ಆರೋಗ್ಯ ಸಚಿವ ದಿನೇಶ್‌ ಗುಂಡೂರಾವ್‌ ಆಂಬುಲೆನ್ಸ್‌ ಚಾಲಕರು ಮತ್ತು ಸಿಬ್ಬಂದಿಯ ಸಂಘಟನೆಗಳ ಪ್ರಮುಖರಿಗೆ ತಿಳಿಸಿದ್ದರು.

‘ಆರೋಗ್ಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಮತ್ತು ಆಯುಕ್ತರು ಚುನಾವಣಾ ಕಾರ್ಯದಿಂದಾಗಿ ಹೊರ ರಾಜ್ಯದಲ್ಲಿದ್ದಾರೆ. ಮಂಗಳವಾರ ಇಬ್ಬರೂ ಬೆಂಗಳೂರಿಗೆ ಮರಳಲಿದ್ದು, ಸಭೆ ನಡೆಸಿ ಸಮಸ್ಯೆ ಪರಿಹರಿಸುವ ಭರವಸೆ ನೀಡಿದ್ದಾರೆ. ಈ ಕಾರಣದಿಂದ ಮುಷ್ಕರ ಆರಂಭಿಸುವುದನ್ನು ಮಂಗಳವಾರ ಸಂಜೆಯವರೆಗೆ ತಾತ್ಕಾಲಿಕವಾಗಿ ಮುಂದೂಡಲಾಗಿದೆ’ ಎಂದು ‘108 ಆರೋಗ್ಯ ಕವಚ’ ನೌಕರರನ್ನು ಪ್ರತಿನಿಧಿಸುವ ಸುವರ್ಣ ಕರ್ನಾಟಕ, ಅಖಲ ಕರ್ನಾಟಕ ಮತ್ತು ಆರೋಗ್ಯ ಕವಚ ನೌಕರರ ಸಂಘಟನೆಗಳ ಪ್ರತಿನಿಧಿಗಳು ತಿಳಿಸಿದ್ದಾರೆ.