ಬೆಂಗಳೂರು: ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಗಳಲ್ಲಿ ನಗದುರಹಿತ ದಂಡ ವಸೂಲಿಗೆ ಹಲವು ಮಾರ್ಗ ಕಂಡುಕೊಂಡಿರುವ ಪೊಲೀಸರು, ಇದೀಗ ಪೇಟಿಎಂ ಆ್ಯಪ್ ಮೂಲಕ ದಂಡ ಸಂಗ್ರಹಕ್ಕೆ ಮುಂದಾಗಿದ್ದಾರೆ.
ಸ್ಥಳದಲ್ಲೇ ದಂಡ ವಿಧಿಸಲು ಜನರಿಗೆ ಅನುಕೂಲವಾಗುವಂತೆ ಪೇಟಿಎಂ ಆ್ಯಪ್ ವ್ಯವಸ್ಥೆ ರೂಪಿಸಲಾಗಿದ್ದು, ನಗರ ಪೊಲೀಸ್ ಕಮಿಷನರ್ ಕಮಲ್ ಪಂತ್ ಸೋಮವಾರ ಚಾಲನೆ ನೀಡಿದರು. ಸಂಚಾರ ವಿಭಾಗದ ಜಂಟಿ ಕಮಿಷನರ್ ಬಿ.ಆರ್. ರವಿಕಾಂತೇಗೌಡ, ಪೇಟಿಎಂ ಹಿರಿಯ ಸಲಹೆಗಾರ ವೇಣುಗೋಪಾಲ್, ಟೆಲಿಬ್ರಹ್ಮ ಕಂಪನಿಯ ರವಿ ಇದ್ದರು.
‘ತಂತ್ರಜ್ಞಾನಕ್ಕೆ ತಕ್ಕಂತೆ ದಂಡ ವಸೂಲಿ ಪ್ರಕ್ರಿಯೆಯಲ್ಲೂ ಬದಲಾವಣೆ ಮಾಡಲಾಗುತ್ತಿದೆ. ಬೆಂಗಳೂರು ಒನ್ ಕೇಂದ್ರ, ಜಾಲತಾಣ, ಪಿಡಿಎ ಯಂತ್ರಗಳ ಮೂಲಕ ದಂಡ ಪಾವತಿಸಲು ಇದುವರೆಗೂ ಅವಕಾಶವಿತ್ತು. ಇದೀಗ ಪೇಟಿಎಂ ಮೂಲಕವೂ ದಂಡ ಪಾವತಿಗೆ ವ್ಯವಸ್ಥೆ ಮಾಡಲಾಗಿದೆ. ಮೊಬೈಲ್ ಬಳಕೆದಾರರೇ ಹೆಚ್ಚಿರುವ ಇಂದಿನ ದಿನಗಳಲ್ಲಿ ಹೊಸ ವ್ಯವಸ್ಥೆಯಿಂದ ಹಲವರಿಗೆ ಉಪಯೋಗವಾಗಲಿದೆ’ ಎಂದು ಪಂತ್ ಹೇಳಿದರು.
‘ಟೆಲಿಬ್ರಹ್ಮ ಸಾಫ್ಟ್‌ವೇರ್ ಕಂಪನಿ ಸಹಯೋಗದಲ್ಲಿ ಪೇಟಿಎಂ ಕಂಪನಿ ಜೊತೆ ಸೇರಿ ಈ ಹೊಸ ವ್ಯವಸ್ಥೆ ರೂಪಿಸಲಾಗಿದೆ’ ಎಂದರು.
