ಬಾಲಕಿ ದೇಹದಿಂದ 25 ಲೀ. ನೀರು ಹೊರ ತೆಗೆದ ವೈದ್ಯರು

ಬೆಂಗಳೂರು: ಮೂತ್ರಪಿಂಡ ಸಮಸ್ಯೆಯಿಂದ ಬಳಲುತ್ತಿದ್ದ 12 ವರ್ಷದ ಬಾಲಕಿಯ ದೇಹದಿಂದ ಮಾರತ್ತಹಳ್ಳಿಯ ರೈನ್ ಬೋ ಮಕ್ಕಳ ಆಸ್ಪತ್ರೆಯ ವೈದ್ಯರು 25 ಲೀಟರ್ ನೀರು ಹೊರತೆಗೆದು, ಚಿಕಿತ್ಸೆ ನೀಡಿದ್ದಾರೆ. 

ಆಂಧ್ರಪ್ರದೇಶದ ಚಿತ್ತೂರಿನ ಬಾಲಕಿ ಕೆಲ ದಿನಗಳ ಹಿಂದೆ ಮೂತ್ರಪಿಂಡ ಸಮಸ್ಯೆಯಿಂದಾಗಿ ದೇಹದ ತೂಕ ಹೆಚ್ಚಿಸಿಕೊಂಡಿದ್ದಳು. ದೇಹದಲ್ಲಿ ನೀರು ತುಂಬಿದ ಪರಿಣಾಮ ಹೊಟ್ಟೆಯ ಭಾಗ ಊದಿಕೊಂಡಿತ್ತು. ಉಸಿರಾಟದ ಸಮಸ್ಯೆಯನ್ನೂ ಎದುರಿಸುತ್ತಿದ್ದಳು. ಬಾಲಕಿ ಮೂತ್ರಪಿಂಡದ  ಸಮಸ್ಯೆ ಎದುರಿಸುತ್ತಿರುವುದನ್ನು ಆಸ್ಪತ್ರೆಯ ವೈದ್ಯರು ಪತ್ತೆಹಚ್ಚಿದ್ದರು.

‘ 25 ಲೀಟರ್ ನೀರು ತೆಗೆಯಲು ಸತತ ಐದು ದಿನ ಶ್ರಮಿಸಬೇಕಾಯಿತು. ಬಾಲಕಿ ಈಗ ಚೇತರಿಸಿಕೊಂಡಿದ್ದಾಳೆ’ ಎಂದು ಮಕ್ಕಳ ಮೂತ್ರಪಿಂಡ ಕಾಯಿಲೆಗಳ ತಜ್ಞ ಡಾ.ಶೌಮಿಲ್ ಗೌರ್ ತಿಳಿಸಿದರು.