ಬೆಂಗಳೂರು: ಕೋಣನಕುಂಟೆ ಠಾಣೆ ವ್ಯಾಪ್ತಿಯ ಮನೆಯೊಂದರಲ್ಲಿ ಸಂಗ್ರಹಿಸಿಟ್ಟಿದ್ದ ₹ 25 ಲಕ್ಷ ಮೌಲ್ಯದ 48 ಕೆ.ಜಿ 950 ಗ್ರಾಂ ಗಾಂಜಾವನ್ನು ಪೊಲೀಸರು ಜಪ್ತಿ ಮಾಡಿದ್ದು, ಡ್ರಗ್ಸ್ ಮಾರಾಟ ಆರೋಪದಡಿ ಇಬ್ಬರನ್ನು ಬಂಧಿಸಿದ್ದಾರೆ.
ಕೊಳ್ಳೇಗಾಲದ ಸುರೇಶ್ ಎಂ. (30) ಹಾಗೂ ಆಂಧ್ರಪ್ರದೇಶದ ಬಂಟು ತಾತಾರಾಮ್ (41) ಬಂಧಿತರು.
‘ಠಾಣೆ ವ್ಯಾಪ್ತಿಯಲ್ಲಿರುವ ಬ್ರೂಕ್ಸ್ ಹೆವೆನ್ ಲೇಔಟ್ ಬಳಿಯ ರಸ್ತೆಯಲ್ಲಿ ಆರೋಪಿ ಸುರೇಶ್, ವಿದ್ಯಾರ್ಥಿಗಳು ಸೇರಿ ಹಲವರಿಗೆ ಗಾಂಜಾ ಮಾರುತ್ತಿದ್ದ. ಅದೇ ವೇಳೆ ದಾಳಿ ಮಾಡಿ ಆತನನ್ನು ಬಂಧಿಸಲಾಯಿತು. ಆತನ ಬಳಿ 1040 ಗ್ರಾಂ ತೂಕದ ಗಾಂಜಾ ಪತ್ತೆಯಾಯಿತು. ಆತನೇ ಮತ್ತೊಬ್ಬ ಆರೋಪಿ ಬಂಟು ಬಗ್ಗೆ ಸುಳಿವು ನೀಡಿದ್ದ’ ಎಂದು ಪೊಲೀಸರು ಹೇಳಿದರು.
‘ಬಂಟು ವಾಸವಿದ್ದ ಜೆ.ಪಿ.ನಗರ 8ನೇ ಹಂತದ ಜಂಬೂ ಸವಾರಿ ದಿಣ್ಣೆ ಬಳಿಯ ವೆಂಕಟೇಶ್ವರ ಲೇಔಟ್‌ನಲ್ಲಿರುವ ಮನೆ ಮೇಲೆ ದಾಳಿ ಮಾಡಲಾಯಿತು. ಆತನ ಮನೆಯಲ್ಲೂ 48 ಕೆ.ಜಿ. 950 ಗ್ರಾಂ ಗಾಂಜಾ ಸಿಕ್ಕಿತು’ ಎಂದೂ ವಿವರಿಸಿದರು.
ಆಂಧ್ರಪ್ರದೇಶದಿಂದ ತರುತ್ತಿದ್ದ ಗಾಂಜಾ; ‘ಆರೋಪಿ ಬಂಟು, ಆಂಧ್ರಪ್ರದೇಶದವ. ಉದ್ಯೋಗ ಹುಡುಕಿಕೊಂಡು ನಗರಕ್ಕೆ ಬಂದಿದ್ದ ಆತ, ಗಾಂಜಾ ಮಾರಾಟದಲ್ಲಿ ತೊಡಗಿದ್ದ. ಆಂಧ್ರಪ್ರದೇಶದಿಂದ ಗಾಂಜಾ ಖರೀದಿಸಿ ನಗರಕ್ಕೆ ತರುತ್ತಿದ್ದ. ಉಪ ಪೆಡ್ಲರ್‌ಗಳ ಮೂಲಕ ಮಾರಾಟ ಮಾಡುತ್ತಿದ್ದ’ ಎಂದೂ ಪೊಲೀಸರು ಹೇಳಿದರು.
