ನಗರದಲ್ಲಿ ಯಹೂದಿಗಳ ಬೆಳಕಿನ ಹಬ್ಬ ಆಚರಣೆ
ಬೆಂಗಳೂರು: ಭಾರತೀಯರು ದೀಪಗಳ ಹಬ್ಬ ದೀಪಾವಳಿ ಆಚರಿಸುವಂತೆ ಇಸ್ರೇಲಿನ ಯಹೂದಿಗಳು ‘ಹನುಖ್ಖಾ’ ಅಂದರೆ ಬೆಳಕಿನ ಹಬ್ಬ ಆಚರಿಸುತ್ತಾರೆ. ನಗರದ ಶಾಂಗ್ರಿಲಾ ಹೋಟೆಲ್‌ನ 18ನೇ ಮಹಡಿಯಲ್ಲಿ ಇತ್ತೀಚೆಗೆ ಸೂರ್ಯಾಸ್ತದ ವೇಳೆಗೆ, ದಕ್ಷಿಣ ಭಾರತದಲ್ಲಿರುವ ಇಸ್ರೇಲ್‌ ರಾಯಭಾರ ಕಚೇರಿಯ ಅಧಿಕಾರಿಗಳು ‘ಹನುಖ್ಖಾ’ ಆಚರಿಸಿದರು.
ಪಡುವಣದಲ್ಲಿ ಸೂರ್ಯ ಮುಳುಗುವುದನ್ನೇ ಕಾಯುತ್ತಿದ್ದ ಅಧಿಕಾರಿಗಳು ‘ಹನುಕ್ಕಿಯಾ’ ದೀಪದ ಮೇಲೆ ವಿವಿಧ ಬಣ್ಣಗಳ ಎಂಟು ಮೋಂಬತ್ತಿಗಳನ್ನು ಬೆಳಗಿಸಿ, ದೇವರಿಗೆ ಪ್ರಾರ್ಥನೆ ಸಲ್ಲಿಸಿದರು. ಕಾನ್ಸುಲ್‌ ಜನರಲ್‌ ದಾನ ಖರ್ಷ್‌ ಯಹೂದಿಗಳ ಬೆಳಕಿನ ಹಬ್ಬದ ಕುರಿತು ವಿವರಣೆ ನೀಡಿದರು. ಬಳಿಕ ಅಲ್ಲಿ ಸೇರಿದವರಿಗೆ ಹಣ್ಣುಗಳ ಮಿಶ್ರಣದ ಪಾನೀಯ ಸಮಾರಾಧನೆ ನಡೆಯಿತು.
ಪ್ರಾಚೀನ ಇಸ್ರೇಲ್‌ನಲ್ಲಿ ಸೆಲ್ಯುಸಿಡ್‌ ಚಕ್ರವರ್ತಿಯ ಕಾಲದಲ್ಲಿ ಆತನ ವಿರುದ್ಧ ಬಂಡಾಯ ನಡೆಯಿತು. ಅದನ್ನು ಮಕ್ಕಾಬೀನ್ ಬಂಡಾಯ ಎನ್ನಲಾಗುತ್ತದೆ. ಇದರ ಸ್ಮರಣೆಯಲ್ಲಿ ಜೆರೆಸಲೇಮ್‌ನಲ್ಲಿ ಎರಡನೇ ದೇಗುಲವನ್ನು ನಿರ್ಮಿಸಲಾಯಿತು. ಇದರ ಸಂತಸದಲ್ಲಿ ಬೆಳಕಿನ ಹಬ್ಬವನ್ನು ಆಚರಿಸಲಾಗುತ್ತದೆ. ಈ ಹಬ್ಬವನ್ನು ಎಂಟು ರಾತ್ರಿ ಮತ್ತು ಹಗಲು ಆಚರಿಸಲಾಗುತ್ತದೆ.
ಮನದಲ್ಲಿ ಶಾಂತಿ:ಬೆಂಗಳೂರಿನ ಆರ್ಚ್‌ ಬಿಷಪ್‌ ಪೀಟರ್‌ ಮಚಾಡೊ ಮಾತನಾಡಿ, ‘ಪ್ರತಿಯೊಬ್ಬರ ಮನಸ್ಸಿನಲ್ಲಿ ಶಾಂತಿ ನೆಲೆಸಿದರೆ, ಹೊರಗೂ ಶಾಂತಿಯ ವಾತಾವರಣ ಸೃಷ್ಟಿ ಆಗುತ್ತದೆ. ನಮ್ಮಲ್ಲೂ ಶಾಂತಿ ಇರಬೇಕು ಇತರರಲ್ಲೂ ಶಾಂತಿ ಇರಬೇಕು ಎಂಬ ಅಪೇಕ್ಷೆ ಹೊಂದಿರಬೇಕು’ ಎಂದು ಹೇಳಿದರು.
‘ಕ್ರೈಸ್ತರು, ಮುಸ್ಲಿಮರು ಮತ್ತು ಯಹೂದಿಗಳ ಮೂಲ ಒಂದೇ. ಅಬ್ರಹಾಂ ನಮ್ಮ ಪೂರ್ವಜ. ಮೂರೂ ಧರ್ಮಗಳು ಸಹೋದರರು. ಸಹೋದರರಂತೇ ಬಾಳಬೇಕು. ಶಾಲೋಮ್‌ ಎಂದರೆ ಶಾಂತಿ, ಬೈಬಲ್‌ನಲ್ಲೂ ಈ ಪದ 400 ಬಾರಿ ಉಲ್ಲೇಖಗೊಂಡಿದೆ. ಆದರೆ, ಶಾಂತಿ ಪದವನ್ನು ರಾಜಕೀಯಕರಣಗೊಳಿಸಲಾಗಿದೆ. ಬೇರೆ ಅರ್ಥಗಳಲ್ಲಿ ಬಳಸಲಾಗುತ್ತಿದೆ’ ಎಂದು ಅವರು ಹೇಳಿದರು.
ಕಾರ್ಯಕ್ರಮದಲ್ಲಿ ಅಖಿಲ ಭಾರತ ಇಮಾಮ್‌ಗಳ ಸಂಘಟನೆಯ ಮುಖ್ಯಸ್ಥ ಇಮಾಮ್ ಉಮರ್‌ ಅಹಮದ್‌ ಇಲ್ಯಾಸಿ ಮಾತನಾಡಿ, ಇಡೀ ವಿಶ್ವ ಶಾಂತಿಗಾಗಿ ಮೊರೆ ಇಡುತ್ತಿದೆ. ಪರಸ್ಪರ ಅರ್ಥೈಸುವಿಕೆಯ ಮೂಲಕ ಶಾಂತಿ ಮತ್ತು ಏಕತೆ ಕಂಡುಕೊಳ್ಳಲು ಸಾಧ್ಯ ಎಂದರು.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.