ಬೆಂಗಳೂರು: ಕೃಷಿ ಮೇಳದಲ್ಲಿ ಪುಟ್ಟ ಬೈಕ್ ಎಲ್ಲರ ಗಮನ ಸೆಳೆಯುತ್ತಿದೆ. ಈ ಬೈಕ್ ಅನ್ನು 8 ವರ್ಷದ ಬಾಲಕನೊಬ್ಬ ಓಡಿಸುತ್ತಿದ್ದರೆ, ಎಲ್ಲರೂ ಅದರತ್ತ ದೃಷ್ಟಿ ನೆಟ್ಟಿದ್ದರು. ಅದನ್ನು ಆವಿಷ್ಕರಿಸಿದ್ದು ಕೋಲಾರ ಜಿಲ್ಲೆ ಕೆಜಿಎಫ್‌ನ ಐವರಹಳ್ಳಿಯ ಸುಕುಮಾರ್‌.
ಇವರು ಬಿ.ಇ ಪದವೀಧರರರು. 2012ರಲ್ಲಿ ಎಂಜಿನಿಯರ್ ವೃತ್ತಿಗೆ ವಿದಾಯ ಹೇಳಿ ಯಂತ್ರಗಳ ಆವಿಷ್ಕಾರಕ್ಕೆ ಮುಂದಾದರು. ಕೆಜಿಎಫ್‌ನಲ್ಲಿ ಸಾಯಿ ಅಗ್ರೋಟೆಕ್‌ ಹೆಸರಿನ ಯಂತ್ರೋಪಕರಣ ಅಂಗಡಿ ನಡೆಸುತ್ತಿದ್ದಾರೆ. ತಾವೇ ಆವಿಷ್ಕರಿಸಿದ ಕೃಷಿ ಯಂತ್ರೋಪಕರಣ ಮಾರಾಟ ಮಾಡುತ್ತಾರೆ. ಕೃಷಿಮೇಳಕ್ಕೂ ಅವರು ಯಂತ್ರೋಕರಣ ತಂದಿದ್ದರು.
‘ಪುಟ್ಟ ಬೈಕ್‌ಗೆ ಮರ ಕತ್ತರಿಸುವ ಯಂತ್ರಕ್ಕೆ ಬಳಸುವ ಚೈನ್‌ ಸಾ ಮೋಟರ್‌ ಅಳವಡಿಸಲಾಗಿದೆ. ಥೈವಾನ್‌ನಿಂದ ಬಿಡಿಭಾಗ ತರಿಸಲಾಗಿತ್ತು. ಬೈಕ್‌ಗೆ ₹ 27 ಸಾವಿರ ಬೆಲೆಯಿದೆ. ರಸ್ತೆಗಳಲ್ಲಿ ಓಡಿಸಲು ಅನುಮತಿ ಇಲ್ಲ. ಮನೆಯ ಎದುರು ಹಾಗೂ ಸ್ವಂತ ಜಮೀನಿನಲ್ಲಿ ಮಕ್ಕಳು ಈ ಬೈಕ್ ಬಳಸಬಹುದು’ ಎಂದು ಸುಕುಮಾರ್‌ ಹೇಳಿದರು.
ಸದ್ಯಕ್ಕೆ ಎರಡು ಬೈಕ್ ಮಾತ್ರ ತಯಾರಿಸಿದ್ದು, ಬೇಕಾದವರು ತಿಳಿಸಿದರೆ ಬೈಕ್ ಅನ್ನು ತಯಾರಿಸಿ ಕೊಡಲಾಗುವುದು ಎಂದು ಹೇಳಿದರು.
