ಭಾನುವಾರ, ನವೆಂಬರ್ 1, 2020
19 °C

‘ಚಿರತೆ ಉಳಿವಿಗೆ ನೈಸರ್ಗಿಕ ಆವಾಸ ಅವಶ್ಯ’

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಬೆಂಗಳೂರು: ಕಾಡುಗಳು ಮತ್ತು ಕಲ್ಲುಬಂಡೆಗಳಿರುವ ನೈಸರ್ಗಿಕ ಆವಾಸಸ್ಥಾನ ಮತ್ತು ದೊಡ್ಡ ಬಲಿ ಪ್ರಾಣಿಗಳು (20 ಕೆ.ಜಿಗಿಂತ ಹೆಚ್ಚು ತೂಕದ ಗೊರಸುಳ್ಳ ಪ್ರಾಣಿಗಳು) ಚಿರತೆಗಳ ಉಳಿವಿಗೆ ಅಗತ್ಯ ಎಂದು ಸಮೀಕ್ಷೆಯೊಂದು ಹೇಳಿದೆ. 

ನೇಚರ್ ಕನ್ಸರ್ವೇಷನ್ ಫೌಂಡೇಷನ್‌ನ ವನ್ಯಜೀವಿ ವಿಜ್ಞಾನಿ ಸಂಜಯ್ ಗುಬ್ಬಿ ಮತ್ತು ತಂಡದವರು ಸುಮಾರು 24 ಸಾವಿರ ಚದರ ಕಿ.ಮೀ. ಪ್ರದೇಶದಲ್ಲಿ 2,768 ಕಿ.ಮೀ. ದೂರವನ್ನು ನಡಿಗೆಯಲ್ಲಿ ಕ್ರಮಿಸಿ ಈ ಸಮೀಕ್ಷೆ ನಡೆಸಿದ್ದಾರೆ. ಭೂಪ್ರದೇಶದ ವಿಸ್ತಾರವನ್ನು ಪರಿಗಣಿಸಿದರೆ ಚಿರತೆಗಳ ಬಗ್ಗೆ ದೇಶದಲ್ಲಿ ನಡೆಸಿರುವ ಅತ್ಯಂತ ದೊಡ್ಡ ಸಂಶೋಧನೆ ಇದು ಎಂದು ಫೌಂಡೇಷನ್‌ ಹೇಳಿಕೊಂಡಿದೆ. 

ದೇಶದಲ್ಲಿ ವನ್ಯಜೀವಿಧಾಮ ಮತ್ತು ರಾಷ್ಟ್ರೀಯ ಉದ್ಯಾನಗಳಾಚೆಯ ಪ್ರದೇಶಗಳಲ್ಲಿ ಚಿರತೆಗಳ ಬಗೆಗಿನ ತಿಳಿವಳಿಕೆ ಅತ್ಯಲ್ಪ. ಚಿರತೆಗಳ ಇರುವಿನ ಸಂಭವ ಎಲ್ಲಿ ಹೆಚ್ಚಿರುತ್ತದೆಂದು ತಿಳಿಯಲು ವಿಜ್ಞಾನಿಗಳು, ನೈಸರ್ಗಿಕ ಆವಾಸ, ದಟ್ಟ ಜನವಸತಿ ಪ್ರದೇಶಗಳು ಮತ್ತು ಮಿಶ್ರ ಪ್ರದೇಶಗಳನ್ನು ಹೋಲಿಸಿ ನೋಡಿದ್ದಾರೆ. ಈ ಪೈಕಿ, ನೈಸರ್ಗಿಕ ಆವಾಸ ಮತ್ತು ಸಾರಂಗ, ಕೊಂಡುಕುರಿ,  ಕಡವೆ,  ಕಾಡುಕುರಿ,  ಕಾಡುಹಂದಿಯಂತಹ ದೊಡ್ಡ ನೈಸರ್ಗಿಕ ಬಲಿ ಪ್ರಾಣಿಗಳಿರುವಲ್ಲಿಯೇ ಚಿರತೆಗಳ ಇರುವಿಕೆ ಹೆಚ್ಚು ಇರುವುದು ತಿಳಿದುಬಂದಿದೆ ಎಂದು ಸಮೀಕ್ಷೆ ಹೇಳಿದೆ. 

‘ರಕ್ಷಿತಾರಣ್ಯಗಳಾಚೆಗೂ ಚಿರತೆಗಳು ಉಳಿಯಬೇಕಾದರೆ ಅವುಗಳ ಸಂರಕ್ಷಣೆಗೆ ಮತ್ತು ನೈಸರ್ಗಿಕ ಸಂಪನ್ಮೂಲಗಳ ಹೊರತೆಗೆಯುವಿಕೆಗೆ ವೈಜ್ಞಾನಿಕವಾಗಿ ವಲಯಗಳನ್ನು ಗುರುತಿಸಬೇಕು’ ಎನ್ನುತ್ತಾರೆ ಸಂಶೋಧನಾ ಪ್ರಬಂಧದ ಪ್ರಧಾನ ಲೇಖಕ ಸಂಜಯ್ ಗುಬ್ಬಿ. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.