ಗುಡಿಬಂಡೆ | ಕಾಲುವೆಯಲ್ಲಿ ಚರಂಡಿ ನೀರು; ಕೆರೆ ಕಲುಷಿತ

ಪ್ರತಿ ವರ್ಷ ಸರ್ಕಾರದಿಂದ ವಿವಿಧ ಅಭಿವೃದ್ಧಿಗೆ ಕೋಟ್ಯಂತರ ಅನುದಾನ ಬರುತ್ತಿದೆ. ಆದರೆ ವರ್ಷಕ್ಕೆ ಒಮ್ಮೆಯಾದರೂ ರಾಜಕಾಲುವೆ ಸ್ವಚ್ಛಗೊಳಿಸಲು ಹಣವಿಲ್ಲ ಎನ್ನುತ್ತಿದೆ ಪಟ್ಟಣ ಪಂಚಾಯಿತಿ. ಹೀಗಾಗಿ ರಾಜಕಾಲುವೆಯಲ್ಲಿ ಕಸ ತುಂಬಿಕೊಂಡು ‌ನೀರು ಸರಾಗವಾಗಿ ಹರಿಯುತ್ತಿಲ್ಲ. ಹೂಳು ತುಂಬಿಕೊಂಡು ರಾಜಕಾಲುವೆ ಮುಚ್ಚಿಹೋಗುತ್ತಿದೆ.

‘ಬೇಲಿಯೇ ಎದ್ದು ಹೊಲ ಮೇಯಿತು’ ಎಂಬ ನಾಣ್ಣುಡಿಯಂತೆ ಪಟ್ಟಣ ಪಂಚಾಯಿತಿ ರಾಜಕಾಲುವೆ ಮೇಲ್ಭಾಗದಲ್ಲಿ ವಾಣಿಜ್ಯ ಮಳಿಗೆ ಮತ್ತು ನಾಲ್ಕು ಕಡೆ ಸಾರ್ವಜನಿಕ ಶೌಚಾಲಯ ನಿರ್ಮಿಸಿದೆ. ಇದರ ಕೆಳಗೆ ತ್ಯಾಜ್ಯ ಅಪಾರ ಪ್ರಯಾಣದಲ್ಲಿ ಸಂಗ್ರಹವಾಗುತ್ತಿದ್ದು, ಕೊಳಚೆ ನೀರು ಸರಾಗವಾಗಿ ಹರಿಯುತ್ತಿಲ್ಲ.

ಪಟ್ಟಣದಲ್ಲಿ 10 ಸಾವಿರ ಜನಸಂಖ್ಯೆ, ಮೂರು ಸಾವಿರ‌ ಮನೆಗಳಿವೆ. ಪ್ರತಿನಿತ್ಯ ಶೇ 70 ರಷ್ಟು ಚರಂಡಿ, ಮುಖ್ಯ ರಸ್ತೆ ಇತರೆ ರಸ್ತೆಗಳ ಮಳೆ ನೀರು ಮತ್ತು ತ್ಯಾಜ್ಯ ಕಾಲುವೆ ಸೇರುತ್ತಿದೆ.

ಪಟ್ಟಣದ ತ್ಯಾಜದ ನೀರು ಹಾಗೂ ನಮಾಜ್ ಗಟ್ಟು, ವಿದ್ಯಾಗಿರಿ, ಸುರಸದ್ಮಗಿರಿ ಬೆಟ್ಟದ ತಪ್ಪಲು ಪ್ರದೇಶದಲ್ಲಿ ಬಿದ್ದ ಮಳೆಯ ನೀರು ಹಾಗೂ  ಕೊಳಚೆ ನೀರು ರಾಜಕಾಲುವೆ ಮೂಲಕ ಅಮಾನಿಬೈರಸಾಗರ ಕೆರೆಯಿಂದ ವಾಟದ ಹೊಸಹಳ್ಳಿ ಕೆರೆಗೆ ಮೂಲಕ ದೊಡ್ಡಕಾಲುವೆ ಸೇರುತ್ತದೆ.

ಪಟ್ಟಣದ ಶೌಚಾಲಯಗಳಿಗೆ ಯುಜಿಡಿ ವ್ಯವಸ್ಥೆ ಇಲ್ಲದೆ ಕೆಲವರು ಗುಂಡಿ ನಿರ್ಮಿಸಿಕೊಂಡಿದ್ದಾರೆ. ಇನ್ನೂ ಕೆಲವರು ಚರಂಡಿಗೆ ಶೌಚಾಲಯ ತ್ಯಾಜ್ಯ ಹರಿಬಿಡುತ್ತಿದ್ದಾರೆ. ಮಳೆ ಬಂದರೆ ಇವೆಲ್ಲ ಒಟ್ಟುಗೂಡಿ ರಾಜಕಾಲುವೆ ಸೇರುತ್ತದೆ.

ಗುಡಿಬಂಡೆಯ ನಾಲ್ಕು ದಿಕ್ಕುಗಳಲ್ಲಿ ಬೆಟ್ಟಗಳಿವೆ. ಇಲ್ಲಿನ ಮಳೆ ನೀರು ಹಾಗೂ ಪಟ್ಟಣದ ಚರಂಡಿ ನೀರು ರಾಜಕಾಲುವೆಯೇ ಸೇರುತ್ತಿದೆ. ಪ್ರತ್ಯೇಕ ಚರಂಡಿ ವ್ಯವಸ್ಥೆ ಇಲ್ಲದೆ ಮಳೆ ನೀರಿನೊಂದಿಗೆ ಕೊಳಚೆ ನೀರು ಕೆರೆ ಸೇರಿ ಅಂತರ್ಜಲ ಕಲುಷಿತಗೊಳ್ಳುತ್ತಿದೆ.

ದಶಕಗಳ ಹಿಂದೆ ಕೃಷಿ ಭೂಮಿಯಾಗಿದ್ದ ವಿದ್ಯಾಗಿರ ತಪ್ಪಲಿನಲ್ಲಿ ತಿರುಮಲ ನಗರ ಈಗ ವಸತಿ ಪ್ರದೇಶದವಾಗಿದೆ. ಪೋಷಕ ಕಾಲುವೆಗಳನ್ನು ಒತ್ತುವರಿ ಮಾಡಿಕೊಂಡು ಮನೆ ನಿರ್ಮಿಸಲಾಗಿದೆ. ಇದರಿಂದ ಕೆಲ ಪೋಷಕ ಕಾಲುವೆಗಳು ಅಸ್ತಿತ್ವ ಕಳೆದುಕೊಂಡರೆ, ಇನ್ನೂ ಕೆಲವು ಚರಂಡಿಗಳಾಗಿ ಮಾರ್ಪಟ್ಟಿವೆ.

ಪಟ್ಟಣ ಪಂಚಾಯಿತಿ ಆಡಳಿತ ಎಚ್ಚೆತ್ತುಕೊಂಡು, ಒತ್ತುವರಿ ತೆರವುಗೊಳಿಸಿ, ಪೋಷಕ ಕಾಲುವೆ ದುರಸ್ತಿಗೊಳಿಸದಿದ್ದರೆ, ಜೋರು ಮಳೆ ಬೀಳುವ ಸಂದರ್ಭ ಇಲ್ಲಿನ ಮನೆಗಳಿಗೆ ನೀರು ನುಗ್ಗಲಿದೆ ಎಂದು ತಿರುಮಲ ನಗರದ ನಿವಾಸಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ.