ಚಿಕ್ಕಬಳ್ಳಾಪುರ | ಸೇಠ್‌ದಿನ್ನೆ ಬಳಿ ಅಪಘಾತ; ಮೂವರ ಸಾವು

ಮುಹಮ್ಮದುಲ್ ಬರಿ (40), ರಜಿಯಾ ಶಾಹಿನ್ (50) ಮತ್ತು ಎಂ.ಡಿ.ಶಾ ಅಲಂ (55) ಮೃತರು. ಇನ್ನೂ ಆರು ಮಂದಿ ಗಾಯಗೊಂಡಿದ್ದಾರೆ. ಮೃತರು ಬಿಹಾರ ಮೂಲದವರಾಗಿದ್ದಾರೆ. ಕೋಲಾರ ಮಸೀದಿಯಲ್ಲಿ ಮುಹಮ್ಮದುಲ್ ಬರಿ ಇಮಾಮ್ ಆಗಿ ಕೆಲಸ ಮಾಡುತ್ತಿದ್ದರು. 

ಒಟ್ಟು 9 ಮಂದಿ ಕೋಲಾರದಿಂದ ಟಾಟಾ ಸುಮೊದಲ್ಲಿ ಆಂಧ್ರಪ್ರದೇಶದ ಪೆನುಗೊಂಡಕ್ಕೆ ತೆರಳುತ್ತಿದ್ದರು. ಸೇಠ್‌ದಿನ್ನೆ ಬಳಿ ಮುಂದೆ ಸಾಗುತ್ತಿದ್ದ ಲಾರಿಯನ್ನು ಹಿಂದಿಕ್ಕಲು ಟಾಟಾ ಸುಮೊ ಚಾಲಕ ಯತ್ನಿಸಿದ್ದಾರೆ. ಈ ವೇಳೆ ಲಾರಿಗೆ ಟಾಟಾ ಸುಮೊ ಡಿಕ್ಕಿಯಾಗಿದೆ. ಇಬ್ಬರು ಸ್ಥಳದಲ್ಲಿಯೇ ಮೃತಪಟ್ಟರೆ ಒಬ್ಬರು ಆಸ್ಪತ್ರೆಗೆ ಕರೆದೊಯ್ಯುವ ವೇಳೆ ಮೃತಪಟ್ಟಿದ್ದಾರೆ. 

ಚಿಕ್ಕಬಳ್ಳಾಪುರ ಗ್ರಾಮಾಂತರ ಠಾಣೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.