ಪರಶುರಾಂಪುರ | ಹಾಸ್ಟೆಲ್ ಕೊಠಡಿ ಶಿಥಿಲ: ಭೀತಿಯಲ್ಲಿ ವಿದ್ಯಾರ್ಥಿನಿಯರು

ಈ ವಸತಿನಿಲಯದಲ್ಲಿ53 ವಿದ್ಯಾರ್ಥಿನಿಯರು ಇದ್ದಾರೆ. ಸುತ್ತಲಿನ ಹಳ್ಳಿಗಳಾದ ಬೀರನಹಳ್ಳಿ, ಪುಟ್ಲೋರಹಳ್ಳಿ, ಕ್ಯಾದಿಗುಂಟೆ, ಕೊರ್ಲಕುಂಟೆ, ದೊಡ್ಡಚೆಲ್ಲೂರು, ಜಗ ಜೀವನರಾಂ ಕಾಲೊನಿ ಸೇರಿ ಹಲವೆಡೆಯಿಂದ ವಿದ್ಯಾರ್ಥಿನಿಯರು ಹಾಸ್ಟೆಲ್‌ನಲ್ಲಿ ತಂಗಿದ್ದಾರೆ. ವಸತಿನಿಲಯದಲ್ಲಿ 9 ಕೊಠಡಿಗಳಿವೆ. ಒಂದೆರೆಡು ಕೊಠಡಿಗಳನ್ನು ಹೊರತುಪಡಿಸಿ ಉಳಿದವು ಶಿಥಿಲಗೊಂಡಿದೆ.ಮೂಲ ಸೌಲಭ್ಯವೂ ಮರೀಚಿಕೆ ಎಂಬುದು ಪಾಲಕರ ಆರೋಪ.

53 ವಿದ್ಯಾರ್ಥಿಗಳಿಗೆ ಒಂದೇ ಶೌಚಗೃಹ: ಹಾಸ್ಟೆಲ್‌ನಲ್ಲಿ 53 ವಿದ್ಯಾರ್ಥಿಗಳಿದ್ದು, ಒಂದು ಶೌಚಾಲಯ, ಎರಡು ಸ್ನಾನದ ಕೊಠಡಿಗಳಿವೆ. ಇದರಿಂದ ವಿದ್ಯಾರ್ಥಿನಿಯರು ಪರದಾಡಬೇಕು. ಶೌಚಾಲಯಗಳ ಚಾವಣಿಯೂ ಕುಸಿದಿದೆ.

ಊಟದ ಸಭಾಂಗಣ ಸುಸ್ಥಿತಿಯಲ್ಲಿದೆ. ಹೀಗಾಗಿ ವಿದ್ಯಾರ್ಥಿನಿಯರು ಶಿಥಿಲ ಕೊಠಡಿಗಳಲ್ಲಿ ಮಲಗಲು ಸಾಧ್ಯವಾಗದೆ
ಎಲ್ಲರೂ ಈ ಊಟದ ಹಾಲ್‌ನಲ್ಲೇ ಮಲಗುತ್ತಾರೆ ಎಂದು ಸ್ಥಳೀಯರಾದ ನಾಗರಾಜ್‌ದೂರಿದರು.

****

ಹಾಸ್ಟೆಲ್ ಕಟ್ಟಡ ಶಿಥಿಲಗೊಂಡಿದ್ದು, ಇಲಾಖೆಯಿಂದ ಕಟ್ಟಡ ನೆಲಸಮ ಮಾಡಲು ಒಪ್ಪಿಗೆ ಕೇಳಿ ಪತ್ರ ಬರೆದಿದ್ದೇವೆ. ಶೀಘ್ರದಲ್ಲಿ ಬೇರೆ ಕಟ್ಟಡಕ್ಕೆ ಸ್ಥಳಾಂತರ ಮಾಡಿ ನೂತನ ಕಟ್ಟಡ ನಿರ್ಮಿಸಲು ಕ್ರಮ ವಹಿಸಲಾಗುವುದು.

-ಮಂಜುನಾಥ ಎನ್., ತಾಲ್ಲೂಕು ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿ

****

ಕೂಡಲೇ ಹಾಸ್ಟೆಲ್ ಸ್ಥಳಾಂತರ ಮಾಡಬೇಕು. ಅನಾಹುತ ಸಂಭವಿಸುವ ಮುನ್ನವೇ ಅಧಿಕಾರಿಗಳು ಎಚ್ಚೆತ್ತುಕೊಳ್ಳಬೇಕು.

-ಎ. ನಾಗರಾಜ್, ಗ್ರಾಮಸ್ಥ