ಮೊಳಕಾಲ್ಮುರು | ಬಿಸಿಲು: ಮೇವಿಲ್ಲದೇ ಜಾನುವಾರು ಹೈರಾಣು

ಕಳೆದ ವರ್ಷ ಇಲ್ಲಿ ನಿರೀಕ್ಷೆಯಂತೆ ಮಳೆಯಾಗಲಿಲ್ಲ. ಬಹುತೇಕ ಕೆರೆಗಳು ಖಾಲಿಯಾಗಿವೆ. ರಂಗಯ್ಯನದುರ್ಗ ಜಲಾಶಯದಲ್ಲಿ ನೀರು ಡೆಡ್‌ ಸ್ಟೋರೇಜ್‌ ಮುಟ್ಟಿದೆ. ಕೋವಿಡ್‌ ನಂತರ 2 ವರ್ಷಗಳಿಂದ ಉತ್ತಮ
ಮಳೆಯಾಗಿ ಅಂತರ್ಜಲ ತುಸು ಸುಧಾರಣೆಯಾಗಿತ್ತು. 500 ಅಡಿ ಆಸುಪಾಸಿನಲ್ಲಿ ದೊರೆಯುತ್ತಿದ್ದ ಕೊಳವೆಬಾವಿ ನೀರು ಮತ್ತೆ 800-1000 ಅಡಿ ಆಳಕ್ಕೆ ಕುಸಿದಿದೆ. ಅದೂ ಸಿಗುವ ಗ್ಯಾರೆಂಟಿ ಕಳೆದುಕೊಂಡಿದೆ.

ಕುಡಿಯುವ ನೀರಿನ ಸಮಸ್ಯೆ:

ಅಂತರ್ಜಲ ಮಟ್ಟ ಕುಸಿಯುತ್ತಿರುವ ಪರಿಣಾಮ ಅನೇಕ ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉಲ್ಬಣವಾಗಿದೆ. ಬಿ.ಜಿ.ಕೆರೆ, ಕೊಂಡ್ಲಹಳ್ಳಿ, ರಾಂಪುರ, ನಾಗಸಮುದ್ರದಂತಹ ದೊಡ್ಡ ಗ್ರಾಮಗಳಲ್ಲಿ ನೀರಿಗಾಗಿ ಪ್ರತಿಭಟನೆಗಳು ನಡೆದಿವೆ. 20 ದಿನಗಳಲ್ಲಿ ಮಳೆ ಬಾರದಿದ್ದಲ್ಲಿ ನೀರಿಗಾಗಿ ಹಾಹಾಕಾರ ಉಂಟಾಗಲಿದೆ ಎಂದು ಅಧಿಕಾರಿಗಳು ಆತಂಕ ವ್ಯಕ್ತಪಡಿಸಿದರು.

ಮೊಳಕಾಲ್ಮುರು ಪಟ್ಟಣಕ್ಕೆ ನೀರು ಪೂರೈಸಲು ಆಧಾರವಾಗಿರುವ ರಂಗಯ್ಯನದುರ್ಗ ಜಲಾಶಯ ಡೆಡ್‌ ಸ್ಟೋರೇಜ್‌ ಮುಟ್ಟಿದ್ದು, ನೀರು ವಾಸನೆಯಿಂದ ಕೂಡಿ, ಕುಡಿಯಲು ಬಳಸಬಾರದು ಎಂದು ಪಟ್ಟಣ ಪಂಚಾಯಿತಿ ಸೂಚಿಸಿದೆ. ಹಳೆ ಪಟ್ಟಣದ ಬಡಾವಣೆಗಳ ನೆಲದಲ್ಲಿ ಬೃಹತ್‌ ಬಂಡೆ ಇರುವ ಕಾರಣ ಮನೆಯವರು ಸ್ವಂತವಾಗಿ ಬೋರ್‌ ಹಾಕಿಸಿಕೊಳ್ಳಲು ಸಾಧ್ಯವಿಲ್ಲ. ಇಲ್ಲಿ ಬೇರೆ ಕಡೆಗೆ ಹೋಲಿಸಿದಲ್ಲಿ ನೀರಿನ ಸಮಸ್ಯೆ ಗಂಭೀರವಾಗಿದೆ ಎಂದು ನಿವಾಸಿಗಳು ತಿಳಿಸಿದ್ದಾರೆ.

ಜಾನುವಾರುಗಳಿಗೆ ಸಂಕಷ್ಟ:

ಬೆಳೆ ಕೈಕೊಟ್ಟ ಹಿನ್ನೆಲೆಯಲ್ಲಿ ರೈತರ ಬಳಿ ಮೇವಿನ ಲಭ್ಯತೆ ಇಲ್ಲವಾಗಿದೆ. ಅನೇಕರು ಜಾನುವಾರು ಸಹವಾಸ ಸಾಕು ಎಂದು ಮಾರಾಟ ಮಾಡಿದ್ದಾರೆ. ಕಾರಣ ಗೋಶಾಲೆಗಳಲ್ಲಿ ಜಾನುವಾರುಗಳ ಸಂಖ್ಯೆ ಕ್ಷೀಣಿಸಿದೆ.

ತಾಲ್ಲೂಕಿನಲ್ಲಿ ಕಳೆದ ವರ್ಷ 8 ಗೋಶಾಲೆಗಳನ್ನು ಆರಂಭಿಸಲಾಗಿತ್ತು. ಈ ವರ್ಷ 3 ಗೋಶಾಲೆಗಳನ್ನು ತೆರೆಯಲಾಗಿದೆ. ಮೇವು ಬ್ಯಾಂಕ್‌ ತೆರೆಯಬೇಕು ಎಂಬ ಮನವಿಗೆ ಸ್ಪಂದನೆ ಸಿಕ್ಕಿಲ್ಲ. ತೆರೆದಿರುವ ಗೋಶಾಲೆಗಳಲ್ಲಿ ನೆರಳಿನ ಕೊರತೆ ಇದೆ. 25-30 ಕಿ.ಮೀ. ವ್ಯಾಪ್ತಿಗೆ ಒಂದು ಗೋಶಾಲೆ ಆರಂಭಿಸಿದ್ದು, ನಿತ್ಯ ಜಾನುವಾರುಗಳನ್ನು ಗೋಶಾಲೆಗೆ ಹೊಡೆದುಕೊಂಡು ಹೋಗಿ ಬರಲು ಸಾಧ್ಯವೇ ಎಂದು ಪಾಲಕ ರಾಯಾಪುರದ ಸಣ್ಣಪಾಲಯ್ಯ ಪ್ರಶ್ನಿಸಿದರು.

ಗೋಶಾಲೆಗಳಿಗೆ ಆಂಧ್ರಪ್ರದೇಶದಿಂದ ಮೇವು ಪೂರೈಕೆಯಾಗುತ್ತಿದೆ. ಸ್ಥಳೀಯವಾಗಿ ಮೇವು ಸಿಗದ ಕಾರಣ ಇದೇ ಮೇವನ್ನು ಕೊಳ್ಳಬೇಕಿದೆ. ಪ್ರತಿ ಟ್ರ್ಯಾಕ್ಟರ್‌ ಸಪ್ಪೆಗೆ ₹ 6,000ದಿಂದ ₹ 8,000 ಬೆಲೆ ಇದೆ. ಪಟ್ಟಣದ ಹಾನಗಲ್‌ ರಸ್ತೆಯಲ್ಲಿ ನಿತ್ಯ ಆಂಧ್ರದಿಂದ ತಂದು ಮೇವುನ ಮಾರಾಟ ಮಾಡುವುದು ಕಾಣಸಿಗುತ್ತದೆ. ದೇವರ ಎತ್ತುಗಳ ಪರಿಸ್ಥಿತಿ ಹೇಳತೀರದು ಎಂದು ರೈತರು ಬೇಸರ ವ್ಯಕ್ತಪಡಿಸಿದ್ದಾರೆ.

ಒಣಗಿದ ಬೆಳೆ:

ಮಳೆಯ ಕೊರತೆಯಿಂದಾಗಿ ನೀರಾವರಿ ಪ್ರದೇಶದಲ್ಲಿನ ವಾಣಿಜ್ಯ ಬೆಳೆಗಳಾದ ರೇಷ್ಮೆ, ಪಪ್ಪಾಯ, ದಾಳಿಂಬೆ, ಟೊಮೆಟೊ ಬೆಳೆಗಳು ಒಣಗಿವೆ. 800 ಹೆಕ್ಟೇರ್‌ನಷ್ಟಿದ್ದ ರೇಷ್ಮೆ ಬೆಳೆ ಶೇ 50ರಷ್ಟು ಕುಸಿತವಾಗಿದೆ. ಲಕ್ಷಾಂತರ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿರುವ ರೇಷ್ಮೆ ಹುಳು ಸಾಕಣೆ ಮನೆಗಳು ವ್ಯರ್ಥವಾಗಿವೆ ಎಂದು ರೈತ ಸಂಘದ ರವಿಕುಮಾರ್ ತಿಳಿಸಿದರು.

‘ಭದ್ರಾ ಮೇಲ್ದಂಡೆ ಯೋಜನೆಯಿಂದ ನೀರು ತಂದು ಕೆರೆಗಳನ್ನು ತುಂಬಿಸಲಾಗುವುದು’ ಎಂಬ ಜನಪ್ರತಿನಿಧಿಗಳ ಭರವಸೆ ಚುನಾವಣೆ ಸಂದರ್ಭಗಳಲ್ಲಿ ಅಬ್ಬರಿಸುತ್ತದೆ. ವಾಸ್ತವದಲ್ಲಿ ಸದ್ಯ ಯೋಜನೆ ಮೇಲೆ ಯಾವುದೇ ನಂಬಿಕೆ ಇಟ್ಟುಕೊಳ್ಳುವಂತಿಲ್ಲ. ಕೆರೆಗಳನ್ನು ತುಂಬಿಸುವ ಗ್ಯಾರಂಟಿ ನಮಗಿಲ್ಲ’ ಎಂದು ಬೇಸರ ವ್ಯಕ್ತಪಡಿಸಿದರು.