ಮಂಗಳೂರು: ರೋಚಕ ಟೈಬ್ರೇಕರ್‌ನಲ್ಲಿ ಕೊನೆಗೊಂಡ ಪಂದ್ಯದಲ್ಲಿ ಸೇಂಟ್ ಅಲೋಶಿಯಸ್ ಪಿಯು ಕಾಲೇಜು ತಂಡ ಮಿಲಾಗ್ರಿಸ್ ಪಿಯು ಕಾಲೇಜು ತಂಡವನ್ನು ಮಣಿಸಿ ಜಿಲ್ಲಾ ಫುಟ್ಬಾಲ್ ಸಂಸ್ಥೆ ಆಯೋಜಿಸಿರುವ ಇಂಡಿಪೆಂಡೆನ್ಸ್ ಕಪ್ ಫುಟ್ಬಾಲ್ ಟೂರ್ನಿಯ ಫೈನಲ್‌ ಪ್ರವೇಶಿಸಿತು.
ನಗರದ ನೆಹರು ಮೈದಾನದಲ್ಲಿ ನಡೆಯುತ್ತಿರುವ ಟೂರ್ನಿಯ ಮತ್ತೊಂದು ಸೆಮಿಫೈನಲ್ ಪಂದ್ಯದಲ್ಲಿ ಯೆನೆಪೋಯ ಕಾಲೇಜು ತಂಡ ಅಲ್‌ಫುರ್ಖಾನ್ ತಂಡವನ್ನು 4–0ಯಿಂದ ಮಣಿಸಿತು. ಪದವಿ ವಿಭಾಗದ ಫೈನಲ್‌ನಲ್ಲಿ ಯೆನೆಪೋಯ ತಂಡ ಸೇಂಟ್ ಫಿಲೋಮಿನಾ ತಂಡವನ್ನು ಎದುರಿಸಲಿದೆ. ನಾಲ್ಕರ ಘಟ್ಟದ ಪಂದ್ಯದಲ್ಲಿ ಯೆನೆಪೋಯ 2–1ರಲ್ಲಿ ಸೇಂಟ್ ಅಲೋಶಿಯಸ್ ತಂಡವನ್ನು ಮತ್ತು ಸೇಂಟ್ ಫಿಲೋಮಿನಾ ಟೈಬ್ರೇಕರ್‌ನಲ್ಲಿ ಯೆನೆಪೋಯದ ಮತ್ತೊಂದು ತಂಡವನ್ನು ಮಣಿಸಿತು.
ಹೈಸ್ಕೂಲ್ ವಿಭಾಗದಲ್ಲಿ ಪ್ರೆಸ್ಟೀಜ್ ಇಂಟರ್‌ನ್ಯಾಷನಲ್ ಸ್ಕೂಲ್ ಟೈಬ್ರೇಕರ್‌ನಲ್ಲಿ (5–4) ಸೇಂಟ್ ಅಲೋಶಿಯಸ್ ತಂಡವನ್ನು ಮತ್ತು ಯೆನೆಪೋಯ 5–0ಯಿಂದ ಫಲಾ ಶಾಲಾ ತಂಡವನ್ನು ಸೋಲಿಸಿತು.
