‘ದುಬೈನಿಂದ ನ.5ರಂದು ಪ್ರಯಾಣಿಸಿದ್ದ ವ್ಯಕ್ತಿಯೊಬ್ಬರನ್ನು ಲೋಹಶೋಧಕ ಯಂತ್ರದಲ್ಲಿ ತಪಾಸಣೆಗೆ ಒಳಪಡಿಸಿದಾಗ, ಆತನ ಬಳಿ 24 ಕ್ಯಾರೆಟ್‌ ಚಿನ್ನ ಇರುವುದು ಖಚಿತವಾಗಿತ್ತು. ಆತನ ಟ್ರಾಲಿ ಬ್ಯಾಗ್‌ನಲ್ಲಿದ್ದ ಎಕ್ಲ್ಯಾರಿಸ್‌ ಬ್ರಾಂಡ್‌ನ ಏಳು ಚಾಕಲೇಟ್‌ ಪೊಟ್ಟಣಗಳನ್ನು ತಪಾಸಣೆಗೆ ಒಳಪಡಿಸಿದ್ದೆವು. ಅದರಲ್ಲಿ ಚಿನ್ನದ ಬಣ್ಣದ ಹುಡಿಯನ್ನು ಬೇರೆ ರಾಸಾಯನಿಕ ಸಂಯುಕ್ತದ ಜೊತೆ ಬೆರೆಸಿ, ಅದನ್ನು ಬೆಳ್ಳಿ ಬಣ್ಣದ ಪೊಟ್ಟಣದಲ್ಲಿ ಚಾಕೊಲೆಟ್‌ಗಳ ನಡುವೆ ಅಡಗಿಸಿಟ್ಟಿರುವುದು ಪತ್ತೆಯಾಗಿದೆ. ಅದರಿಂದ ಒಟ್ಟು 420 ಗ್ರಾಂ ಚಿನ್ನವನ್ನು ವಶಪಡಿಸಿಕೊಳ್ಳಲಾಗಿದೆ. ಇದರ ಮೌಲ್ಯವನ್ನು ₹ 25.49 ಲಕ್ಷ ಎಂದು ಅಂದಾಜಿಸಲಾಗಿದೆ’ ಎಂದು ಕಸ್ಟಮ್ಸ್‌ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
