ದಾವಣಗೆರೆ | ಬಾಳೆಹಣ್ಣಿಗೆ ಬರ; ಗಗನಕ್ಕೇರಿದ ದರ

ಏಲಕ್ಕಿ ಬಾಳೆ ಹಣ್ಣು ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿಗೆ ₹130ರವರೆಗೆ ಮಾರಾಟವಾಗುತ್ತಿದೆ. ಪಚ್ಚಬಾಳೆ ಕೆ.ಜಿಗೆ ₹80ರವರೆಗೂ ಮಾರಾಟವಾಗುತ್ತಿದೆ. 

ಕಳೆದ ವರ್ಷ ಏಲಕ್ಕಿ ಬಾಳೆಯನ್ನು ಕೆ.ಜಿಗೆ ₹22ರಿಂದ ₹25ರವರೆಗೆ ರೈತರಿಂದ ಖರೀದಿಸಿ, ಅದನ್ನು ವಾಡೆಗಳಿಗೆ ಹಾಕಿ ಹಣ್ಣು ಮಾಡಿ ವ್ಯಾಪಾರಿಗಳಿಗೆ ₹35ರಂತೆ ಮಾರಾಟ ಮಾಡಲಾಗುತ್ತಿತ್ತು. ಹಾಗೆಯೇ ಪಚ್ಚಬಾಳೆಯನ್ನು ₹15ರಿಂದ ₹16ರವರೆಗೆ ಖರೀದಿಸಿ, ಹಣ್ಣುಮಾಡಿ ಕೆ.ಜಿ.ಗೆ ₹25ನಂತೆ ಮಾರಾಟ ಮಾಡಲಾಗುತ್ತಿತ್ತು. ಆದರೆ ಈ ಬಾರಿ ಏಲಕ್ಕಿ ಬಾಳೆಯನ್ನು ಕೆ.ಜಿ.ಗೆ ₹80ರಂತೆ ಮತ್ತು ಪಚ್ಚಬಾಳೆಯನ್ನು ಕೆ.ಜಿ.ಗೆ ₹40ರಂತೆ ಕೊಯ್ಲು ಮಾಡಿ ರೈತರಿಂದ ಖರೀದಿಸಲಾಗುತ್ತಿರುವುದರಿಂದ ಮಾರುಕಟ್ಟೆಯದಲ್ಲಿ ದರ ಏರಿಕೆಯಾಗಿದೆ. 

‘ಈ ಭಾಗದಲ್ಲಿ ಹಿಂದಿನ ಬಾರಿ ಮಳೆ ಕೊರತೆಯಿಂದ ನಾಟಿ ಕಾರ್ಯಕ್ಕೆ ಹಿನ್ನಡೆಯಾಗಿದ್ದರಿಂದ ಈ ಬಾರಿ ಫಸಲು ಕಡಿಮೆಯಾಗಿದೆ. ಇದರಿಂದ ಈ ವರ್ಷ ಯಾವ ರೈತರೂ ನಮ್ಮ ಮಂಡಿಗೆ ಬಾಳೆ ಕಾಯಿಗಳನ್ನು ತರುತ್ತಿಲ್ಲ. ಅಲ್ಲಲ್ಲಿ ಕೆಲವು ರೈತರು ಅಪರೂಪಕ್ಕೆ ಬೆಳೆದಿದ್ದಾರೆ. ನಾವೇ ಅಂತಹ ರೈತರ ಜಮೀನಿಗೆ ಹೋಗಿ ಕೊಯ್ಲು ಮಾಡಿ ಖರೀದಿಸಿ ತರುತ್ತಿದ್ದೇವೆ. ಕೊಯ್ಲು, ಸಾಗಾಣಿಕೆ ವೆಚ್ಚ, ವಾಡೆಗೆ ಹಾಕಿ ಹಣ್ಣು ಮಾಡಲು ಬರುವ ಖರ್ಚು ಸೇರಿ ಬಾಳೆಹಣ್ಣಿನ ಬೆಲೆ ಸಹಜವಾಗಿ ಏರಿಕೆ ಕಂಡಿದೆ’ ಎನ್ನುತ್ತಾರೆ ಇಲ್ಲಿನ ಸಗಟು ವ್ಯಾಪಾರಿ ಸೈಯದ್‌ ಅಫನ್‌. 

‘ಶ್ರಾವಣ ಮಾಸ ಆರಂಭವಾದ ಬಳಿಕ ಬಾಳೆಹಣ್ಣಿಗೆ ಹೆಚ್ಚಿನ ಬೇಡಿಕೆ ಉಂಟಾಗಿದೆ. ಮುಂದೆ ಬರಲಿರುವ ಗೌರಿ ಗಣೇಶ, ದಸರಾ ಹಾಗೂ ದೀಪಾವಳಿ ಹಬ್ಬಗಳಿಗೆ ಇನ್ನೂ ಹೆಚ್ಚಿನ ಬೇಡಿಕೆ ಇರುತ್ತದೆ. ಈ ವರ್ಷ ಉತ್ತಮವಾದ ಮಳೆ ಬಿದ್ದಿರುವುದರಿಂದ ಮುಂದಿನ ಹೊಸ ಬೆಳೆ ಬಂದ ಮೇಲೆ ದರ ಕಡಿಮೆಯಾಗಬಹುದು’ ಎನ್ನುತ್ತಾರೆ ಇಲ್ಲಿನ ಬಾಳೆ ಹಣ್ಣಿನ ವ್ಯಾಪಾರಿ ಎಂ.ಹಾಲೇಶ್‌.

ಈ ಭಾಗದ ರೈತರು ಎಳೆಯ ಅಡಿಕೆ ಗಿಡಗಳ ಮಧ್ಯೆ ಅಂತರ ಬೆಳೆಯಾಗಿ ಬಾಳೆಯನ್ನು ಬೆಳೆಯುತ್ತಿದ್ದಾರೆ. ಆದರೆ ಕಳೆದ ವರ್ಷ ಮಳೆಯ ಕೊರತೆಯಿಂದ ಅಡಿಕೆ ಗಿಡಗಳಿಗೇ ನೀರು ಸಾಕಾಗಿರಲಿಲ್ಲ.