ವೀಳ್ಯದಲೆ ಕೃಷಿಗೆ ‘ಬಂಗಾರದ ಮನುಷ್ಯ’ನೇ ಪ್ರೇರಣೆ

ಕಡರನಾಯ್ಕನಹಳ್ಳಿ ಸಮೀಪದ ಗುಡ್ಡದ ತುಮ್ಮಿನಕಟ್ಟಿ ಗ್ರಾಮದ ಮಾಳಗಿ ಬಸಣ್ಣ ಅವರು ಮೊದಲು ಅವರಿವರ ಮನೆಯಲ್ಲಿ ಆಳಾಗಿ ಕೆಲಸ ಮಾಡುತ್ತಿದ್ದರು. ‘ಬಂಗಾರದ ಮನುಷ್ಯ’ ಸಿನಿಮಾ ನೋಡಿದ ಅವರಿಗೆ ತಾವೂ ಕೃಷಿ ಮಾಡಬೇಕು ಎಂಬ ಛಲ ಮೂಡಿತು.

ಭೂರಹಿತರಿಗೆ ಜಮೀನು ಹಂಚಿಕೆಯಲ್ಲಿ ಗುಡ್ಡದ ತುಮ್ಮಿನಕಟ್ಟೆ ಮತ್ತು ಕೊಕ್ಕನೂರು ಮದ್ಯದಲ್ಲಿ ಮಟ್ಟಿಕ್ಯಾಂಪ್ (ಗುಡ್ಡದ ಪ್ರದೇಶ) 3 ಎಕರೆ ಜಮೀನು ಮಂಜೂರು ಮಾಡಿಸಿಕೊಂಡರು. ಆದರೆ ಅದು ಬರಿ ಕಲ್ಲು ಬಂಡೆಗಳಿಂದ ತುಂಬಿತ್ತು. ಇದರಲ್ಲಿ ಬೆಳೆ ತೆಗೆಯಲು ಸಾಧ್ಯವೆ ಎಂದು ಹಲವರು ನಕ್ಕಿದ್ದುಂಟು. ಆದರೆ ಛಲ ಬಿಡದೇ ಹಗಲಿರುಳೆನ್ನದೇ ಕಲ್ಲು ಬಂಡೆಗಳನ್ನು ತೆಗೆದು ಅಲ್ಲಿ ಮಣ್ಣು ತುಂಬಿದರು. ಕೊಳವೆ ಬಾವಿ ತಗೆಸಿದರು. ಸಂಪೂರ್ಣ ಒಂದು ಎಕರೆ ಸಮತಟ್ಟು ಮಾಡಿದರು. ಈ ಪ್ರದೇಶದಲ್ಲಿ ವೀಳ್ಯದೆಲೆ ಕೃಷಿ ಉತ್ತಮ ಎಂದು ಮನವರಿಕೆ ಮಾಡಿಕೊಂಡರು.

ಶುಭ ಸಮಾರಂಭಗಳು ನಡೆಯಬೇಕಾದರೆ ವೀಳ್ಯದೆಲೆ ಇರಲೇಬೇಕು. ಉತ್ತರ ಕರ್ನಾಟಕ, ದಾವಣಗೆರೆ, ಕರಾಚಿಯವರೆಗೂ ತಾಂಬೂಲಪ್ರಿಯರಿಗೆ ಇಲ್ಲಿ ಬೆಳೆಯುವ ಎಲೆಗಳೆಂದರೆ ಬಹಳ ಪ್ರೀತಿ. ಮಳೆಗಾಲ, ಬೇಸಿಗೆ ಎಂಬ ಭೇದವಿಲ್ಲದೇ ಎಲ್ಲ ಕಾಲದಲ್ಲಿಯೂ ಈ ಎಲೆ ಬೆಳೆಗಾರರ ಮೊಗದಲ್ಲಿ ಲಾಭದ ಹರ್ಷ ಮೂಡಿಸುತ್ತದೆ.

‘ಧಾರಾಳವಾಗಿ ಬಿಸಿಲು ಬೀಳುವ ಜಾಗ, ಬುಡ ನೆನೆಸುವಷ್ಟು ನೀರು ಇದ್ದರೆ ಬೆಳೆಗಾರನಿಗೆ ವೀಳ್ಯದೆಲೆ ಯಾವಾಗಲೂ ಲಾಭ ತರುವ ಕೃಷಿ. ಪುಟ್ಟದಾದ ಜಾಗದಲ್ಲೂ ಸಾವಿರಾರು ರೂಪಾಯಿ ಆದಾಯ ತರುವ ಈ ಹಸಿರೆಲೆ ಕೃಷಿ ನಿಜಕ್ಕೂ ರೈತನ ಬದುಕಿಗೆ ಹಸಿರು ತುಂಬುತ್ತದೆ’ ಎನ್ನುತ್ತಾರೆ ಮಾಳಗಿ ಬಸಣ್ಣ.

ಮೊದಲು ಎಲೆ ಬಳ್ಳಿಗಳನ್ನು ಹಬ್ಬಿಸಲು ಮುಂಡದ ಸಸಿಗಳನ್ನು ನಾಟಿ ಮಾಡಿದರು. ಒಂದಡಿ ಎತ್ತರವಾಗಿ ಮಣ್ಣನ್ನು ಏರು ಹಾಕಿ ಸಾಲುಗಳನ್ನು ನಿರ್ಮಿಸಿದರು. ನಂತರ ಕರೆ ಎಲೆ ಮತ್ತು ಅಂಬಾಡಿ ಎಂಬ ತಳಿಯನ್ನು ನಾಟಿ ಮಾಡಿದರು. ಆಷಾಢಮಾಸ ಇದರ ನಾಟಿಗೆ ಸೂಕ್ತ ಸಮಯ ಎಂದು ಅವರು ಅಭಿಪ್ರಾಯಪಟ್ಟರು.

ಒಂದು ಎಕರೆಯಲ್ಲಿ 800 ಗುಣಿಗಳಿವೆ. ಒಂದು ಕಟ್ಟಿಗೆ ಸರಾಸರಿ ₹ 50. ಅದರಂತೆ 120 ಕಟ್ಟುಗಳಿಗೆ ಒಂದು ಪೆಂಡಿ. ಅದರ ದರ ₹ 6,000 ಆಗುತ್ತದೆ. ಒಂದು ತಿಂಗಳಿಗೆ ಕನಿಷ್ಠ 8 ಪೆಂಡಿ ವೀಳ್ಯದೆಲೆ ಸಿಗುತ್ತದೆ. ಅಲ್ಲಿಗೆ ಒಟ್ಟು ಮಾಸಿಕ ಆದಾಯ ₹ 48,000. ವಾರ್ಷಿಕ ಆದಾಯ ₹ 5,76,000. ಕೇವಲ ಒಂದು ಎಕರೆಯಲ್ಲಿ ಇಷ್ಟು ಆದಾಯ ಬರುತ್ತದೆ. ಹೀಗಾಗಿ ಇದು ‘ಹಸಿರು ಬಂಗಾರ’ ಎಂದು ಬಸಣ್ಣ ವಿವರಿಸಿದರು.

ಉಳಿದ ಎರಡು ಎಕರೆ ಸ್ವಲ್ಪ ಇಳಿಜಾರಿನಿಂದ ಕೂಡಿದೆ. ಅದರಲ್ಲಿ ಮೆಕ್ಕೆಜೋಳ, ತೊಗರಿ ಮುಂತಾದ ಬೆಳೆಗಳನ್ನು ತೆಗೆಯುತ್ತಾರೆ. ಅದನ್ನು ಸಹ ವೀಳ್ಯದೆಲೆ ಕೃಷಿಗೆ ಸಿದ್ಧಪಡಿಸುವ ಆಲೋಚನೆ ಅವರಿಗೆ ಇದೆ.

‘ವೀಳ್ಯದೆಲೆ ನಡುವೆ ಅಡಿಕೆ ಸಸಿಗಳನ್ನು ನಾಟಿ ಮಾಡಲಾಗಿದೆ. ಮುಂಡದ ಮರಗಳನ್ನು ತೆಗೆದು ನಂತರ ಅಡಿಕೆ ಮರಗಳಿಗೆ ಎಲೆ ಬಳ್ಳಿ ಹಬ್ಬಿಸುವ ಯೋಜನೆ ಇದೆ. ಇದರಿಂದಾಗಿ ಬಹುವಿಧದ ಬೆಳೆಯಾಗಿ ಪರಿವರ್ತನೆಯಾಗುತ್ತದೆ. ಆದಾಯ ದ್ವಿಗುಣವಾಗುತ್ತದೆ’ ಎನ್ನುತ್ತಾರೆ ಬಸಣ್ಣ.