ದಾವಣಗೆರೆ: ಪೊಲೀಸ್‌ ಇಲಾಖೆಗೆ ‘ತುಂಗಾ 2’ ಬಲ

ಜಿಲ್ಲಾ ಪೊಲೀಸ್‌ ಶ್ವಾನ ದಳದಲ್ಲಿ ಈ ಹಿಂದೆ ಕಾರ್ಯ ನಿರ್ವಹಿಸಿದ್ದ ಶ್ವಾನ ‘ತುಂಗಾ’ ರಾಜ್ಯಮಟ್ಟದಲ್ಲಿ ಪ್ರಸಿದ್ಧಿ ಪಡೆದಿತ್ತು. 2011ರಲ್ಲಿ ಅಪರಾಧ ವಿಭಾಗಕ್ಕೆ ಸೇರಿದ್ದ ಡಾಬರ್ಮನ್ ಫಿಂಚರ್ ತಳಿಯ ತುಂಗಾ ತನ್ನ ಸೇವಾವಧಿಯಲ್ಲಿ 71 ಕೊಲೆ ಪ್ರಕರಣ 35ಕ್ಕೂ ಹೆಚ್ಚು ಕಳವು ಪ್ರಕರಣಗಳನ್ನು ಭೇದಿಸಿತ್ತು. 650ಕ್ಕೂ ಹೆಚ್ಚು ಪ್ರಕರಣಗಳಲ್ಲಿ ತನ್ನ ಚಾತುರ್ಯ ಪ್ರದರ್ಶಿಸಿತ್ತು. 2019ರಲ್ಲಿ ಸೂಳೆಕೆರೆ ಬಳಿ ನಡೆದಿದ್ದ ಕೊಲೆ ಪ್ರಕರಣದಲ್ಲಿ 11 ಕಿ.ಮೀ. ಓಡಿ ಆರೋಪಿಯನ್ನು ಗುರುತಿಸಿತ್ತು. 2018ರಲ್ಲಿ ನ್ಯಾಮತಿ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದ್ದ ಕೊಲೆ ಪ್ರಕರಣದಲ್ಲಿ ಜನರ ಮಧ್ಯದಲ್ಲೇ ಇದ್ದ ಆರೋಪಿಯನ್ನು ಗುರುತಿಸಿತ್ತು. ‘ತುಂಗಾ’ ಭೇದಿಸಿದ 2 ಪ್ರಕರಣಗಳಲ್ಲಿ ಗಲ್ಲು ಶಿಕ್ಷೆ ಹಾಗೂ 4 ಪ್ರಕರಣಗಳಲ್ಲಿ ಜೀವಾವಧಿ ಶಿಕ್ಷೆಯಾಗಿದೆ. 2022ರಲ್ಲಿ ಅನಾರೋಗ್ಯದಿಂದ ತುಂಗಾ ಮೃತಪಟ್ಟಿತ್ತು. ಸೇವೆಗೆ ಸೇರಿದ ಮತ್ತೊಂದು ಶ್ವಾನಕ್ಕೆ ಅದರ ಸ್ಮರಣಾರ್ಥ ತುಂಗಾ– 2 ಎಂಬ ಹೆಸರಿಡಲಾಗಿದ್ದು ಆ ಹೆಸರಿನ ಈ ಶ್ವಾನವೂ ಸಾಧನೆಯ ಹಾದಿಯಲ್ಲೇ ಮುನ್ನಡೆದಿದೆ.