ನೆಮ್ಮದಿ ಕಸಿದುಕೊಂಡ ರಸ್ತೆ ಗುಂಡಿಗಳು

ದಾವಣಗೆರೆ: ಇದು ಅಚ್ಚು ಕಟ್ಟಾಗಿ ಕಟ್ಟಿದ ಮನೆಗಳಿರುವ ಬಡಾವಣೆ. ಆದರೆ, ಜನ ಮನೆಯಿಂದ ಹೊರಗೆ ಹೆಜ್ಜೆಯಿಡಲೂ ಅಂಜಿಕೊಳ್ಳುವ ಪರಿಸ್ಥಿತಿ. ಇಲ್ಲಿನ ಜನ ಬೆಚ್ಚಗಿನ ಮನೆಗಳನ್ನೇನೋ ಕಟ್ಟಿಕೊಂಡಿದ್ದಾರೆ. ಆದರೆ, ರಸ್ತೆ, ಚರಂಡಿ ಅವ್ಯವಸ್ಥೆ ಇಲ್ಲಿನ ನಿವಾಸಿಗಳ ನೆಮ್ಮದಿಯ ಜೀವನಕ್ಕೆ ಅಡ್ಡಿಯಾಗಿದೆ.

ನಗರದ ಪಿ.ಬಿ. ರಸ್ತೆಯ ಮಗ್ಗುಲಲ್ಲೇ ಇರುವ 18ನೇ ವಾರ್ಡ್‌ನ ದೇವರಾಜ ಅರಸು ಬಡಾವಣೆ ‘ಎ’ ಬ್ಲಾಕ್‌ನ ಬಹಳಷ್ಟು ರಸ್ತೆಗಳ ಸ್ಥಿತಿಯಿದು. ದುರಸ್ತಿ ಕಾಣದ ರಸ್ತೆಗಳು, ಸ್ವಚ್ಛತೆಯಿಲ್ಲದ ಚರಂಡಿಗಳು ಜನರನ್ನು ಕಾಡುತ್ತಿವೆ. ಗುಂಡಿ ಬಿದ್ದ ರಸ್ತೆಗಳಲ್ಲಿ ಪರದಾಡುತ್ತ ಓಡಾಡುವುದಕ್ಕಿಂತ ಮನೆಯಲ್ಲಿರು ವುದೇ ಲೇಸು ಎಂಬ ಅಸಹಾಯಕತೆ ಜನರಲ್ಲಿದೆ.

ದೇವರಾಜ ಅರಸು ಬಡಾವಣೆ ‘ಎ’ ಬ್ಲಾಕ್‌, ಶಂಕರ ವಿಹಾರ ಬಡಾವಣೆ, ವಿನಾಯಕನಗರ, ಜೈನ್‌ ಲೇಔಟ್, ವಿನೋಬನಗರ 7ನೇ ಮುಖ್ಯರಸ್ತೆಯಿಂದ 4ನೇ ತಿರುವು ವರೆಗಿನ ಭಾಗಗಳು 18ನೇ ವಾರ್ಡ್‌ಗೆ ಸೇರುತ್ತವೆ. ವಾರ್ಡ್‌ನಲ್ಲಿ 1,836 ಮನೆಗಳಿದ್ದು, 8,246 ಜನ ನೆಲೆ ಕಂಡುಕೊಂಡಿದ್ದಾರೆ. ಆದರೆ, ವಾರ್ಡ್‌ನ ಪ್ರಮುಖ ರಸ್ತೆಗಳನ್ನು ಹೊರತುಪಡಿಸಿ ಒಳರಸ್ತೆಗಳು ಅಭಿವೃದ್ಧಿ ಕಂಡಿಲ್ಲ.

ಜೈನ್‌ ಲೇಔಟ್‌ನಲ್ಲಿ ಬಹುತೇಕ ರಸ್ತೆಗಳಿಗೆ ಕಾಂಕ್ರೀಟ್‌ ಹಾಕಲಾಗಿದೆ. ಆದರೆ, ಪಕ್ಕದಲ್ಲೇ ಇರುವ ವಿನಾಯಕ ನಗರದ ರಸ್ತೆಗಳು ಟಾರ್‌ ಕೂಡ ಕಂಡಿಲ್ಲ. ಶಂಕರ ವಿಹಾರ ಬಡಾವಣೆ ಯಲ್ಲೂ ಪರಿಸ್ಥಿತಿ ಹೀಗೆಯೇ ಇದೆ. ಗ್ಯಾರೇಜ್‌ಗಳು, ಸಣ್ಣ ಕೈಗಾರಿಕೆ ಗಳು ಹೆಚ್ಚಿರುವ ಈ ಬಡಾವಣೆಯಲ್ಲಿ ರಸ್ತೆ, ಚರಂಡಿ ಅವ್ಯವಸ್ಥೆ ಜನರ ಬೆನ್ನು ಹತ್ತಿದೆ.

‘ನ್ಯಾಯಾಲಯ ಸಂಕೀರ್ಣ, ವಾಣಿಜ್ಯ ತೆರಿಗೆ ಇಲಾಖೆ, ದೂಡಾ, ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಗಳ ಕಚೇರಿಗಳು ದೇವರಾಜ ಅರಸು ಬಡಾವಣೆಯ ‘ಎ’ ಬ್ಲಾಕ್‌ನಲ್ಲಿಯೇ ಇವೆ. ಹೀಗಾಗಿ ಈ ಭಾಗದಲ್ಲಿ ಅಧಿಕಾರಿಗಳು, ಜನಪ್ರತಿನಿಧಿಗಳು ಓಡಾಡುತ್ತಲೇ ಇರುತ್ತಾರೆ. ಇಷ್ಟಾದರೂ ಬಡಾವಣೆಯ ಒಳ ರಸ್ತೆಗಳು ಅಭಿವೃದ್ಧಿ ಕಾಣದಿರು ವುದು ವಿಪರ್ಯಾಸ’ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ ನಿವಾಸಿ ಸುಧಾ.

ಕುಡಿಯುವ ನೀರು ರಸ್ತೆಯಲ್ಲಿ ಪೋಲು: ‘ವಿನಾಯಕನಗರದಲ್ಲಿ ಹಾದು ಹೋಗುವ ಕುಂದವಾಡ ಕೆರೆ ರಸ್ತೆಯಲ್ಲಿ ನೀರಿನ ಕೊಳವೆ ಒಡೆದು ಸಾವಿರಾರು ಲೀಟರ್‌ ಕುಡಿಯುವ ನೀರು ಪೋಲಾಗುತ್ತಿದೆ. ಅಪಾರ ಪ್ರಮಾಣದ ನೀರು ಉಕ್ಕಿಹರಿದು ರಸ್ತೆಯಲ್ಲಿ ಗುಂಡಿ ಬಿದ್ದಿವೆ. ಪಾಲಿಕೆ ಆಯುಕ್ತರಿಗೆ ಖುದ್ದು ಮನವಿ ಸಲ್ಲಿಸಿದರೂ ಪ್ರಯೋಜನ ವಾಗಿಲ್ಲ. ನೀರು ಪೋಲಾಗುವುದೂ ನಿಂತಿಲ್ಲ ಎಂದು ಅಸಮಾಧಾನ’ ವ್ಯಕ್ತಪಡಿಸುತ್ತಾರೆ ಜನಸಾಮಾನ್ಯರ ಸೇವಾ ಸಂಸ್ಥೆ ಅಧ್ಯಕ್ಷ ಪ್ರಸನ್ನ ಬೆಳಕೇರಿ.

ಹಂದಿಗಳ ಸಾಮ್ರಾಜ್ಯ: ‘18ನೇ ವಾರ್ಡ್‌ಗೆ ಸೇರುವ ವಿನೋಬನಗರದ ರಸ್ತೆಗಳು ಹಂದಿಗಳ ರಾಜಧಾನಿಯಂತಾ ಗಿದೆ. ಇಲ್ಲಿನ ಒಳ ಚರಂಡಿಗಳನ್ನು ಸ್ವಚ್ಛಗೊಳಿಸಿ ದಶಕಗಳೇ ಕಳೆದಿವೆ. ಚಪ್ಪಡಿಕಲ್ಲು ಮುಚ್ಚಿದ ಚರಂಡಿಯೊಳಗೆ ಹಂದಿಗಳ ಸಾಮ್ರಾಜ್ಯವೇ ಅಡಗಿದೆ. ಹಂದಿಗಳು ಚರಂಡಿಯೊಳಗೆ ಬಿಲ ಕೊರೆದು ಮನೆ ಮಾಡಿಕೊಂಡಿವೆ. ಹೀಗಾಗಿ ನೀರು ನಿಂತು ಅಸಹನೀಯ ವಾಸನೆ ಬರುತ್ತಿದೆ’ ಎಂದು ಪರಿಸ್ಥಿತಿ ಬಿಚ್ಚಿಡುತ್ತಾರೆ ಇಲ್ಲಿನ ನಿವಾಸಿ ಸುರೇಶ್‌.

ವಾರಕ್ಕೊಮ್ಮೆ ಮಾತ್ರ ನೀರು: ‘ವಾರಕ್ಕೆ ಒಂದು ದಿನ ನೀರು ಸರಬರಾಜು ಮಾಡುತ್ತಾರೆ. ವಾರಕ್ಕೆ ಕನಿಷ್ಠ ಮೂರು ಬಾರಿಯಾದರೂ ನೀರು ನೀಡಿದರೆ ಅನುಕೂಲ ಆಗುತ್ತದೆ. ಅಲ್ಲದೇ ರಾತ್ರಿ ಹೊತ್ತಿನಲ್ಲಿ ನಲ್ಲಿ ನೀರು ಸರಬರಾಜು ಮಾಡಲಾಗುತ್ತಿದೆ. ಇದರಿಂದ ತೊಂದರೆ ಆಗುತ್ತಿದೆ. ಬೆಳಗಿನ ಸಮಯ ದಲ್ಲಿ ನೀರು ಸರಬರಾಜು ಮಾಡಿ, ಅನುಕೂಲ ಕಲ್ಪಿಸಬೇಕು’ ಎಂದು ಒತ್ತಾಯಿಸುತ್ತಾರೆ ಶಿಕ್ಷಕಿ ಮದಿಹಾ.

‘ಪಾಲಿಕೆ ಸಿಬ್ಬಂದಿ ವಾರಕ್ಕೊಮ್ಮೆ ನೀರು ಸರಬರಾಜು ಮಾಡುತ್ತಾರೆ. ನಾವು ಅವರಿಗೆ ಫೋನ್‌ ಮಾಡಿ, ದುಂಬಾಲು ಬೀಳುವವರೆಗೂ ನೀರು ಬಿಡುವುದಿಲ್ಲ. ಶಂಕರ ವಿಹಾರ ಬಡಾವಣೆ ಜನರು ಕುಡಿಯುವ ನೀರಿಗೆ ಪರದಾಡುವಂತಾಗಿದೆ’ ಎಂದು ಸಮಸ್ಯೆ ಬಿಚ್ಚಿಡುತ್ತಾರೆ ಅಬ್ದುಲ್‌ ರೆಹಮಾನ್‌.

‘ಎಷ್ಟೇ ಜಾಗೃತಿಯಿಂದ ವಾಹನ ಚಲಾಯಿಸಿದರೂ ದ್ವಿಚಕ್ರ ವಾಹನ ಸವಾರರು ಅಪಘಾತಗಳಿಂದ ಪಾರಾಗಲು ಸಾಧ್ಯವಾಗುವುದಿಲ್ಲ. ಸಣ್ಣ ಪುಟ್ಟ ಅಪಘಾತಗಳು ಇಲ್ಲಿ ಲೆಕ್ಕಕ್ಕಿಲ್ಲ’ ಎಂದು ಸ್ವಾಮಿ ಆಕ್ರೋಶ ವ್ಯಕ್ತಪಡಿಸಿದರು.

**
‌‘ಕಸ ವಿಲೇವಾರಿಗೆ ಕ್ರಮ’
‘12ನೇ ವಾರ್ಡ್‌ನಲ್ಲಿ ಸ್ವಚ್ಛತೆ ಮರೀಚಿಕೆ, ಹಂದಿಗಳ ಹಾವಳಿಗೆ ನಾಗರಿಕರು ಹೈರಾಣ; ಕಿಷ್ಕಿಂದೆಯಂಥ ಗಲ್ಲಿಗಳಲ್ಲಿ ಸಮಸ್ಯೆಗಳ ಸುಳಿ’ ಎಂಬ ಶೀರ್ಷಿಕೆಯಡಿ ವಿಶೇಷ ವರದಿ ಪ್ರಕಟಿಸಿದ ಬಳಿಕ ಸ್ಥಳ ಪರಿಶೀಲನೆ ನಡೆಸಿದ್ದೇವೆ. ಪಾಲಿಕೆಯ ಪೌರ ಕಾರ್ಮಿಕರಿಂದ ನಿತ್ಯ ಕಸ ವಿಲೇವಾರಿ ಮಾಡಿಸುತ್ತಿದ್ದೇವೆ.