ಮಳೆಗಾಲದಲ್ಲೂ ಕುಡಿಯುವ ನೀರಿಗೆ ಅಭದ್ರತೆ!

ದಾವಣಗೆರೆ: ಮಧ್ಯಕರ್ನಾಟಕ ನಗರಿ ದಾವಣಗೆರೆಗೆ ಕುಡಿಯುವ ನೀರಿನ ಆಸರೆಯಾದ ಕುಂದವಾಡ, ಟಿ.ವಿ.ಸ್ಟೇಷನ್‌ ಕೆರೆಗಳು ಈಗ ಖಾಲಿ--–ಖಾಲಿ.
ಕುಂದವಾಡ ಮತ್ತು ಟಿ.ವಿ.ಸ್ಟೇಷನ್ ಕೆರೆಗಳ ನೀರಿನ ಸಂಗ್ರಹ ಗಣನೀಯವಾಗಿ ಕುಸಿಯುತ್ತಿದ್ದು, ಭದ್ರಾ ಜಲಾಶಯದಿಂದ ಹರಿಸುವ ನೀರಿಗಾಗಿ ಕಾಯುವಂತಾಗಿದೆ.

ಕುಂದವಾಡ ಮತ್ತು ಟಿ.ವಿ.ಸ್ಟೇಷನ್‌ ಕೆರೆಗಳ ನೀರಿನ ಪ್ರಮಾಣ ಕ್ರಮವಾಗಿ 2.8 ಮೀಟರ್‌ ಹಾಗೂ 3.25 ಮೀಟರ್‌ ನಷ್ಟಿದ್ದು, ನೀರಿನ ಸಂಗ್ರಹ ದಿನೇದಿನ ಕಡಿಮೆಯಾಗುತ್ತಿದೆ.

ಟಿ.ವಿ.ಸ್ಟೇಷನ್‌ ಕೆರೆಯಲ್ಲಿ ಈಗ ಇರುವ ನೀರು 10ರಿಂದ 12ದಿನಗಳವರೆಗೆ ಮಾತ್ರ ಸಾಕಾಗಬಹುದು. ಹೀಗಾಗಿ, ಈ ಕೆರೆಯನ್ನು ಅವಲಂಬಿಸಿರುವ ವಿದ್ಯಾನಗರ, ತರಳಬಾಳು ಬಡಾವಣೆ, ವಿನಾಯಕ ಬಡಾವಣೆ, ಶಿವಕುಮಾರ ಬಡಾವಣೆ ಮೊದಲ ಮತ್ತು ಎರಡನೇ ಹಂತ, ಜಯನಗರ ನಿಟುವಳ್ಳಿ ಬಡಾವಣೆಗಳಿಗೆ 4–5 ದಿನಗಳಿಗೊಮ್ಮೆ ಮಾತ್ರ ನೀರು ಸರಬರಾಜು ಮಾಡಲಾಗುತ್ತಿದೆ.

ನಗರದ ಮೂರನೇ ಒಂದು ಭಾಗಕ್ಕೆ ಕುಡಿಯುವ ನೀರು ಸರಬರಾಜು ಮಾಡುವ ಕುಂದವಾಡ ಕೆರೆಗೆ ತುಂಗಭದ್ರಾ ನದಿಯಿಂದ ನಿತ್ಯ 20 ಮಿಲಿಯನ್‌ ಲೀಟರ್‌ ನೀರು ಪಂಪ್‌ ಮಾಡಲಾಗುತ್ತಿದೆ. ಆದರೆ, ಕೆರೆಗೆ ಬರುತ್ತಿರುವುದಕ್ಕಿಂತ ಹೆಚ್ಚಿನ ಪ್ರಮಾಣದ ಕುಡಿಯುವ ನೀರನ್ನು ಸರಬರಾಜು ಮಾಡಲಾಗುತ್ತಿದೆ. ಹೀಗಾಗಿ ಕುಂದವಾಡ ಕೆರೆಯಲ್ಲೂ ನೀರಿನ ಸಂಗ್ರಹ ಕುಸಿಯುತ್ತಿದೆ.

ಸದ್ಯ ಕುಂದವಾಡ ಕೆರೆ ವ್ಯಾಪ್ತಿಯ ಭಾಗಗಳಿಗೆ ವಾರಕ್ಕೆರಡು ಬಾರಿ ನೀರು ಸರಬರಾಜು ಮಾಡಲಾಗುತ್ತಿದೆ. ಆದರೆ, ಜಲಾಶಯದಿಂದ ನೀರು
ಹರಿಸುವುದು ತಡವಾದರೆ, ಸಮಸ್ಯೆ ಈ ಭಾಗದಲ್ಲೂ ಹೆಚ್ಚುವ ಆತಂಕ ಎದುರಾಗಿದೆ.

ಜಲಾನಯನ ಪ್ರದೇಶದಲ್ಲಿ ಉತ್ತಮ ಎನ್ನುವಷ್ಟು ಮಳೆ ಇನ್ನೂ ಆಗದಿರುವುದರಿಂದ ಕೆರೆಗಳಿಗೆ ನೀರುಣಿಸುವ ಭದ್ರಾ ಜಲಾಶಯದ ಒಡಲು ಬರಿದಾಗಿದೆ. ಹೀಗಾಗಿ, ಮಳೆಗಾಲ ಆರಂಭವಾದರೂ ನಗರದ ಜನತೆಗೆ ಕುಡಿಯುವ ನೀರಿನ ಅಭದ್ರತೆ ಎದುರಾಗಿದೆ.