ಅನ್ಯೂರಿಸಮ್‌ ಸಮಸ್ಯೆಗೆ ಯಶಸ್ವಿ ಶಸ್ತ್ರಚಿಕಿತ್ಸೆ

ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಶಸ್ತ್ರಚಿಕಿತ್ಸಕ ಶರಣ ಹಳ್ಳದ ‘ಶಿಕ್ಷಕರಾಗಿದ್ದ ಭಾವಸಾಹೇಬ್‌ ಎಂಬುವರಿಗೆ ಮಹಪಧಮನಿಯ ಹಿಗ್ಗುವಿಕೆ ಹೆಚ್ಚಾಗಿ ರಕ್ತಸ್ರಾವವಾಗಿತ್ತು. ಇದರಿಂದಾಗಿ ಅವರ ರಕ್ತ ಹಾಗೂ ರಕ್ತದೊತ್ತಡ ಎರಡೂ ಕಡಿಮೆಯಾಗಿ ಆರೋಗ್ಯ ಪರಿಸ್ಥಿತಿ ಗಂಭೀರಗೊಂಡಿತ್ತು. ಮೂತ್ರಪಿಂಡಗಳು ಸಹ ದುರ್ಬಲಗೊಂಡಿದ್ದವು. ಅನ್ಯೂರಿಸಮ್‌ ಆರು ಸೆಂಟಿಮೀಟರ್‌ನಲ್ಲಿ ಗಾತ್ರ ಹೊಂದಿದ್ದು, ಬೇರೆ ಬೇರೆ ವಿಭಾಗಗಳ ವೈದ್ಯರ ಶಸ್ತ್ರಚಿಕಿತ್ಸೆಗಳ ಮೂಲಕ ಆರೋಗ್ಯ ಸರಿಪಡಿಸಲಾಯಿತು’ ಎಂದರು.

‘ರೋಗಿಗೆ ಎಂಟು ತಾಸು ಶಸ್ತ್ರಚಿಕಿತ್ಸೆ ಮಾಡಿದ ಬಳಿ ಒಂದು ವಾರ ಐಸಿಯುನಲ್ಲಿ ಚಿಕಿತ್ಸೆ ನೀಡಲಾಯಿತು. ಒಟ್ಟು 24 ದಿನ ಆಸ್ಪತ್ರೆಯಲ್ಲಿದ್ದರು’ ಎಂದರು.

‘ಅನ್ಯೂರಿಸಮ್‌ ಲಕ್ಷಣಗಳು ಹೇಗಿರುತ್ತವೆ ಎನ್ನುವುದು ಆರಂಭದಲ್ಲಿ ಗೊತ್ತಾಗುವುದಿಲ್ಲ. ಭಾವಸಾಹೇಬ್‌ ಅಂತಿಮ ಹಂತದಲ್ಲಿದ್ದಾಗ ನಮ್ಮ ಆಸ್ಪತ್ರೆಗ ಬಂದಿದ್ದರು. ತಜ್ಞ ವೈದ್ಯರು ತುರ್ತಾಗಿ ಸ್ಪಂದಿಸಿದ್ದರಿಂದ ಅವರ ಜೀವ ಉಳಿಯಿತು. ರೋಗಿಯ ಎಡಭಾಗದ ಮೂತ್ರಪಿಂಡದ ರಕ್ತನಾಳ ತೀವ್ರ ಒತ್ತಡದಲ್ಲಿತ್ತು. ರಕ್ತದ ಒತ್ತಡ ಏರುಪೇರು ಆಗದಂತೆ ಅರಿವಳಿಕೆ ತಜ್ಞ ರಮೇಶ ಠಿಕಾರಿ ಶಸ್ತ್ರಚಿಕಿತ್ಸೆ ಮೂಲಕ ತಡೆದರು’ ಎಂದು ತಿಳಿಸಿದರು. ಶರಣ ಹಳ್ಳದ, ಷಣ್ಮುಖ ಹಿರೇಮಠ, ಶ್ರೀಶೈಲ್‌ ಚಿನಿವಾಲರ ಮತ್ತು ಮೂತ್ರಪಿಂಡ ತಜ್ಞ ಚೇತನ ಮುದ್ರಬೆಟ್ಟು ಅವರನ್ನು ಒಳಗೊಂಡ ವೈದ್ಯರ ತಂಡ ಶಸ್ತಚಿಕಿತ್ಸೆ ನೆರವೇರಿಸಿದೆ.

ಚೇತನ ಮುದ್ರಬೆಟ್ಟು ಮಾತನಾಡಿ ‘ರೋಗಿಯ ಮೂತ್ರಪಿಂಡಗಳು ದುರ್ಬಲವಾಗಿದ್ದರಿಂದ ಅವರನ್ನು ಕೆಲವು ದಿನಗಳ ಕಾಲ ತುರ್ತು ನಿಗಾ ಘಟಕದಲ್ಲಿಟ್ಟು ಚಿಕಿತ್ಸೆ ನೀಡಲಾಯಿತು. ಸೂಕ್ಷ್ಮ ಸ್ಥಿತಿಯಲ್ಲಿದ್ದ ಕಾರಣ ಸಾಮಾನ್ಯ ಬದಲು ಸಿಆರ್‌ಆರ್‌ಟಿ ಎಂಬ ವಿಶೇಷ ಡಯಾಲಿಸಸ್‌ ಚಿಕಿತ್ಸೆ ನೀಡಲಾಯಿತು’ ಎಂದು ತಿಳಿಸಿದರು.