ಗದಗ– ಲಕ್ಷ್ಮೇಶ್ವರ ರಾಜ್ಯ ಹೆದ್ದಾರಿ ದುಸ್ಥಿತಿ: ಕನಸಾಗಿಯೇ ಉಳಿದ ಸರ್ವಋತು ರಸ್ತೆ

ಮುಳಗುಂದ: ಗದಗ- ಲಕ್ಷ್ಮೇಶ್ವರ ರಾಜ್ಯ ಹೆದ್ದಾರಿ ಹಾಳಾಗಿ ಹಲವು ವರ್ಷಗಳು ಕಳೆದಿದ್ದು, ಈವರೆಗೆ ದುರಸ್ತಿ ಕಾರ್ಯ ನಡೆದಿಲ್ಲ. 2008ರಲ್ಲಿ ಸರ್ವಋತು ರಸ್ತೆ ನಿರ್ಮಾಣದ ಗುರಿ ಹೊಂದಲಾಗಿತ್ತು, ಆದರೆ ಅದು ಈವರೆಗೂ ಈಡೆರಲ್ಲ. ಯೋಜನೆ ಮುಗಿದು, ಸುಗಮ ಸಂಚಾರ ಯಾವಾಗ ಎನ್ನುವ ಪ್ರಶ್ನೆ ಸಾರ್ವಜನಿಕರನ್ನು ಈಗಲೂ ಕಾಡುತ್ತಿದೆ.

ರಸ್ತೆ ಹಾಳಾದ ಪರಿಣಾಮ ವಾಹನ ಸವಾರರು ನಿತ್ಯ ತೊಂದರೆ ಅನುಭವಿಸುವುದು ತಪ್ಪದಾಗಿದೆ. ಮುಳಗುಂದ ಗದಗ ನಡುವಿನ ಮುಖ್ಯ ರಸ್ತೆ ಹಾಳಾಗಿದ್ದು, ಸುಗಮ ಸಂಚಾರಕ್ಕೆ ಕಂಟಕವಾಗಿ ಪರಿಣಮಿಸಿದೆ. ಮಳೆ ಆಗುವ ಪೂರ್ವದಲ್ಲೇ ರಸ್ತೆ ತಗ್ಗು ಬಿದ್ದು ಹಾಳಾಗಿತ್ತು. ಈಗ ಮತ್ತಷ್ಟು ಹಾಳಾಗಿದೆ. ಕಳೆದ ಒಂದು ತಿಂಗಳಿಂದ ನಿರಂತರ ಮಳೆ ಆಗುತ್ತಿರುವ ಕಾರಣ ಹರ್ತಿ ಗ್ರಾಮದಿಂದ ನಾಗಾವಿ ಕ್ರಾಸ್‌ವರೆಗೆ 10 ಕಿ.ಮೀ. ಡಾಂಬರ ರಸ್ತೆ ಕಿತ್ತು, ದಾರಿ ಉದ್ದಕ್ಕು ಗುಂಡಿಗಳು ಬಿದ್ದು, ಹೊಂಡಗಳು ಸೃಷ್ಟಿಯಾಗಿವೆ. ಮಾಗಡಿ ಹತ್ತಿರ ರಸ್ತೆ ಸಂಪೂರ್ಣ ಹಾಳಾಗಿದೆ. ಬೈಕ್, ವಾಹನ ಸವಾರರು ಎದ್ದು ಬಿದ್ದು ಹೋಗುವ ಸ್ಥಿತಿ ನಿರ್ಮಾಣವಾಗಿದೆ.

2022ರಲ್ಲಿ ಅಭಿವೃದ್ದಿಪಡಿಸಿದ್ದ ಡಾಂಬರು ರಸ್ತೆ ಹೆಚ್ಚುದಿನ ಬಾಳಿಕೆ ಬಾರದೆ ಹಾಳಾಗಿದೆ. ವಾಹನಗಳ ವೇಗಕ್ಕೆ ತಡೆಯೊಡ್ಡುವಂತೆ ತಗ್ಗು ದಿಣ್ಣೆಗಳು ಬಿದ್ದಿವೆ. ಸಕಾಲದಲ್ಲಿ ದುರಸ್ತಿ ಕಾರ್ಯ ಕೈಗೊಂಡಿಲ್ಲ, ಸಂಬಂಧಪಟ್ಟ ಲೋಕೋಪಯೋಗಿ ಇಲಾಖೆ ಕೂಡ ನಿರ್ಲಕ್ಷ್ಯ ವಹಿಸಿದೆ. 2022ರಲ್ಲಿ ಹರ್ತಿಯಿಂದ ಬಸಾಪೂರ ಕ್ರಾಸ್‌ವರೆಗೆ ಅಂದಾಜು 5 ಕಿ.ಮೀ ರಸ್ತೆ ಹಾಗೂ ನಾಗಾವಿ ಕ್ರಾಸ್‌ನಿಂದ ಮುಳಗುಂದವರೆಗೆ ರಸ್ತೆ ಅಭಿವೃದ್ದಿ ಪಡಿಸಲಾಗಿತ್ತು. ಕಾಮಗಾರಿ ಮುಕ್ತಾಯವಾದ ಕೆಲವೇ ದಿನಗಳಲ್ಲಿ ರಸ್ತೆ ಹಾಳಾಗಿದೆ. ಈ ಭಾಗದ ರಸ್ತೆ ಅಭಿವೃದ್ದಿ ಕಾಮಗಾರಿಗಳು ಯೋಜನಾ ಬದ್ದವಾಗಿ ನಡೆದಿಲ್ಲ ಎಂದು ಸಾರ್ವಜನಕರು ದೂರಿದ್ದಾರೆ.

ಈಚಲಹಳ್ಳದ ಸೇತುವೆ ಹತ್ತಿರ ದೊಡ್ಡ ಕಂದಕ ಉಂಟಾಗಿದೆ. ಮುಳಗುಂದ ದ್ವಾರ ಬಾಗಿಲ ಹತ್ತಿರ ರಸ್ತೆ ಕಿತ್ತು ಹೋಗಿದ್ದು, ರಾತ್ರಿ ವೇಳೆ ಬೈಕ್‌, ವಾಹನ ಸಂಚಾರಕ್ಕೆ ತೊಂದರೆ ಆಗುತ್ತಿದೆ. ಶೀತಾಲಹರಿ ಕ್ರಾಸ್ ಹತ್ತಿರ ರಸ್ತೆ ನಡುವೆ ದೊಡ್ಡ ಗುಂಡಿಬಿದ್ದು ನೀರು ನಿಂತಿದೆ. ಬೇಸಿಗೆಯಲ್ಲಿ ದುರಸ್ತಿ ಕಾಮಗಾರಿ ಮಾಡದಿರುವ ಪರಿಣಾಮ ರಸ್ತೆ ಹಾಳಾಗಿದೆ ಎಂದು ರಾಘವೇಂದ್ರ ಕುಂಬಾರಗೇರಿ ಲೋಕೋಪಯೋಗಿ ಇಲಾಖೆ ವಿರುದ್ದ ಆರೋಪ ಮಾಡಿದ್ದಾರೆ.