ಶಿರಹಟ್ಟಿ | ಉಪನ್ಯಾಸಕರ ಕೊರತೆ: ಕುಸಿಯುತ್ತಿದೆ ಶೈಕ್ಷಣಿಕ ಗುಣಮಟ್ಟ

ತಾಲ್ಲೂಕಿನಲ್ಲಿ ಒಟ್ಟು 9 ಪಿಯು ಕಾಲೇಜುಗಳಿದ್ದು, ಅದರಲ್ಲಿ 6 ಸರ್ಕಾರಿ, 3 ಖಾಸಗಿ ಕಾಲೇಜುಗಳಿವೆ. ಕಾಯಂ ಉಪನ್ಯಾಸಕರಿಲ್ಲದೇ ಅತಿಥಿ ಉಪನ್ಯಾಸಕರ ಬರುವಿಕೆಗಾಗಿ ಕಾಲೇಜುಗಳು ಬಕ ಪಕ್ಷಿಯಂತೆ ಕಾಯುವುದು ಪ್ರತಿವರ್ಷವೂ ಸಾಮಾನ್ಯವಾಗಿದೆ. ಶಿಕ್ಷಣ ಇಲಾಖೆ ಅತಿಥಿ ಉಪನ್ಯಾಸಕರನ್ನು ತಡವಾಗಿ ನೇಮಕ ಮಾಡುತ್ತಿರುವುದರಿಂದ ಶೈಕ್ಷಣಿಕ ಗುಣಮಟ್ಟ ಸುಧಾರಣೆ ಆಗುತ್ತಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.

ತಾಲ್ಲೂಕಿನಲ್ಲಿರುವ ಒಟ್ಟು 6 ಸರ್ಕಾರಿ ಪಿಯು ಕಾಲೇಜುಗಳ ಪೈಕಿ ಸ್ಥಳೀಯ ಫಕ್ಕಿರಪ್ಪ ಭರಮಪ್ಪ ಪೂಜಾರ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಒಟ್ಟು 11 ಜನ ಸಿಬ್ಬಂದಿ ಬೇಕಾಗಿದ್ದು, ಅದರಲ್ಲಿ ಪ್ರಾಚಾರ್ಯರನ್ನೊಳಗೊಂಡು ಕೇವಲ 3 ಜನ ಕಾಯಂ ಸಿಬ್ಬಂದಿ ಇದ್ದಾರೆ. 8 ಖಾಲಿ ಹುದ್ದೆಗಳಿದ್ದು, 3 ಜನ ಅತಿಥಿ ಉಪನ್ಯಾಸಕರನ್ನು ನೇಮಕ ಮಾಡಲಾಗಿದೆ. ಕಳೆದ ವರ್ಷ ಇಲ್ಲಿ ಕಲಾ, ವಾಣಿಜ್ಯ ಹಾಗೂ ವಿಜ್ಞಾನ ಸೇರಿ 330 ವಿದ್ಯಾರ್ಥಿಗಳು ಪ್ರವೇಶಾತಿ ಪಡೆದಿದ್ದರು.

ಕಡಕೋಳ ಗ್ರಾಮದ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಕಲಾ ವಿಭಾಗ ಮಾತ್ರ ಇದ್ದು, 6 ಕಾಯಂ ಹುದ್ದೆಗಳಿವೆ. ಅದರಲ್ಲಿ 2 ಕಾಯಂ ಹಾಗೂ 4 ಜನ ಅತಿಥಿ ಉಪನ್ಯಾಸಕರನ್ನು ನೇಮಕ ಮಾಡಿಕೊಳ್ಳಲಾಗಿತ್ತು. ಇಲ್ಲಿ ಪ್ರಭಾರ ಪ್ರಾಚಾರ್ಯರು ಕಾರ್ಯನಿರ್ವಹಿಸುತ್ತಿದ್ದು, ಕಳೆದ ವರ್ಷ 67 ಜನ ವಿದ್ಯಾರ್ಥಿಗಳು ಇದ್ದರು.

ತಾಲ್ಲೂಕಿನ ಬೆಳ್ಳಟ್ಟಿಯ ಸರ್ಕಾರಿ ಪಿಯು ಕಾಲೇಜಿನಲ್ಲಿ ಇರಬೇಕಾದ 11 ಹುದ್ದೆಗಳಲ್ಲಿ ಕೇವಲ 5 ಜನ ಕಾಯಂ ಉಪನ್ಯಾಸಕ, ಸಿಬ್ಬಂದಿ ಇದ್ದಾರೆ. 3 ಜನ ಅತಿಥಿ ಉಪನ್ಯಾಸಕರನ್ನು ತೆಗೆದುಕೊಳ್ಳುವ ಪ್ರಸ್ತುತ ಕಾಲೇಜಿನಲ್ಲಿ ಕಲಾ ಹಾಗೂ ವಾಣಿಜ್ಯ ವಿಭಾಗ ಇದೆ. ಕಳೆದ‌ ವರ್ಷ 223 ಜನ ವಿದ್ಯಾರ್ಥಿಗಳು ಇದ್ದರು.

ತಾಲ್ಲೂಕಿನ ಹೊಳೆ-ಇಟಗಿ ಗ್ರಾಮದಲ್ಲಿನ ಕಲಾ ವಿಭಾಗದ ಸರ್ಕಾರಿ ಪಿಯು ಕಾಲೇಜಿನಲ್ಲಿ ಕಾಯಂ ಉಪನ್ಯಾಸಕರೇ ಇಲ್ಲ. ಬೇಕಾಗಿರುವ 9 ಉಪನ್ಯಾಸಕರ ಪೈಕಿ 5 ಜನ ಅತಿಥಿ ಉಪನ್ಯಾಸಕರನ್ನು ಮಾತ್ರ ನೇಮಕ ಮಾಡಲಾಗಿದೆ. ಪ್ರಭಾರ ಪ್ರಾಚಾರ್ಯರನ್ನು ಹೊಂದಿದ ಪ್ರಸ್ತುತ ಕಾಲೇಜಿನಲ್ಲಿ ಕಳೆದ ವರ್ಷ 34 ಜನ ವಿದ್ಯಾರ್ಥಿಗಳು ಇದ್ದರು.

ತಾಲ್ಲೂಕಿನ ಹೆಬ್ಬಾಳ ಗ್ರಾಮದ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಕಲಾ ವಿಭಾಗವಿದ್ದು, ಒಟ್ಟು 9 ಹುದ್ದೆಗಳಿವೆ. ಅದರಲ್ಲಿ ಪ್ರಾಚಾರ್ಯರನ್ನು ಹೊರತುಪಡಿಸಿ 6 ಜನ ಅತಿಥಿ ಉಪನ್ಯಾಸಕರು, 1 ದ್ವಿತೀಯ ದರ್ಜೆ ಸಹಾಯಕ ಹಾಗೂ 1 ಡಿ ದರ್ಜೆ ನೌಕರ ಇದ್ದಾರೆ. ಕಳೆದ ವರ್ಷ 49 ಜನ ವಿದ್ಯಾರ್ಥಿಗಳಿದ್ದರು. ಪ್ರಸ್ತುತ ವರ್ಷ ಇರುವ ಪ್ರಾಚಾರ್ಯರೂ ವರ್ಗಾವಣೆಗೊಳ್ಳಲಿದ್ದು, ಅತಿಥಿ ಉಪನ್ಯಾಸಕರನ್ನು ನೇಮಕ ಮಾಡಿಕೊಳ್ಳುವವರೆಗೆ ಕಾಲೇಜಿಗೆ ದೇವರೇಗತಿ ಎಂಬುದು ಗ್ರಾಮಸ್ಥರ ಅಳಲು.

ತಾಲ್ಲೂಕಿನ ಮಾಗಡಿ ಪದವಿಪೂರ್ವ ಕಾಲೇಜಿನಲ್ಲಿ ಬೇಕಾಗಿರುವ 9 ಹುದ್ದೆಗಳಲ್ಲಿ 7 ಜನ ಕಾಯಂ ಉಪನ್ಯಾಸಕರಿದ್ದಾರೆ. ಕೇವಲ ಒಬ್ಬರನ್ನು ಮಾತ್ರ ಅತಿಥಿ ಉಪನ್ಯಾಸಕರ ನೇಮಕ ಮಾಡಿಕೊಳ್ಳಲಾಗಿದೆ.

ಶೌಚಾಲಯಗಳ ಕೊರತೆ: ತಾಲ್ಲೂಕಿನ ಬಹುತೇಕ ಸರ್ಕಾರಿ ಹಾಗೂ ಖಾಸಗಿ ಪಿಯು ಕಾಲೇಜಿನಲ್ಲಿ ವಿದ್ಯಾರ್ಥಿಗಳು ಶೌಚಾಲಯ ಸಮಸ್ಯೆ ಎದುರಿಸುತ್ತಿದ್ದಾರೆ. ಮಾಗಡಿ ಹಾಗೂ ಬೆಳ್ಳಟ್ಟಿಯ ಸರ್ಕಾರಿ ಪಿಯು ಕಾಲೇಜಿಗೆ ಪಿಂಕ್‌ ಶೌಚಾಲಯ ನಿರ್ಮಾಣ ಮಾಡಲು 3 ವರ್ಷಗಳ ಹಿಂದೆಯೇ ಅನುದಾನ ಬಿಡುಗಡೆಯಾಗಿದೆ. ಆದರೆ ಇಲಾಖೆ ಹಾಗೂ ಜನಪ್ರತಿನಿಧಿಗಳ ಬೇಜವಾಬ್ದಾರಿಯಿಂದ ಶೌಚಾಲಯ ನಿರ್ಮಾಣವಾಗಿಲ್ಲ. ಇದರಿಂದ ವಿದ್ಯಾರ್ಥಿನಿಯರ ಗೋಳಂತೂ ಹೇಳತೀರದಾಗಿದೆ.

ಕಾಲೇಜು ಪಕ್ಕದಲ್ಲಿನ ಗೋಡೆ, ಇಲ್ಲವೇ ಗಿಡಗಂಟಿಗಳ ಮರೆಯಲ್ಲಿ ಮೂತ್ರ ವಿಸರ್ಜನೆ ಮಾಡುವ ದುಃಸ್ಥಿತಿ ಬಂದೊದಗಿದೆ ಎಂದು ವಿದ್ಯಾರ್ಥಿನಿಯರ ಪೋಷಕರು ಆಕ್ರೋಶ ಹೊರಹಾಕಿದ್ದಾರೆ.