ಸ್ವಚ್ಛ ಭಾರತ ಯೋಜನೆಗೆ ಹಿನ್ನಡೆ: ತುಕ್ಕು ಹಿಡಿಯುತ್ತಿವೆ ಕಸದ ವಾಹನಗಳು

ಗಜೇಂದ್ರಗಡ: ಕಸವನ್ನು ವೈಜ್ಞಾನಿಕವಾಗಿ ವಿಲೇವಾರಿ ಮಾಡುವ ಉದ್ದೇಶದಿಂದ ಸ್ವಚ್ಛ ಭಾರತ ಯೋಜನೆಯಡಿ ಒಣ, ಹಸಿಕಸ ಹಾಕಲು ಸರ್ಕಾರ ಪ್ರತಿ ಮನೆಗಳಿಗೆ ಪ್ಲಾಸ್ಟಿಕ್‌ ಬಕೆಟ್‌ ಹಾಗೂ ಅದನ್ನು ತೆಗೆದುಕೊಂಡು ಹೋಗಲು ಪ್ರತಿ ಗ್ರಾಮ ಪಂಚಾಯ್ತಿಗೆ ವಾಹನ ವ್ಯವಸ್ಥೆ ಕಲ್ಪಿಸಿದೆ. ಆದರೆ, ವಾಹನ ಬಳಕೆಯಾಗದೆ ತುಕ್ಕು ಹಿಡಿಯುತ್ತಿದ್ದು, ಪ್ಲಾಸ್ಟಿಕ್‌ ಬಕೆಟ್‌ಗಳು ಅನ್ಯ ಕೆಲಸಗಳಿಗೆ ಬಳಕೆಯಾಗುತ್ತಿವೆ.

ಗಜೇಂದ್ರಗಡ ತಾಲ್ಲೂಕಿನಲ್ಲಿ ರಾಮಾಪುರ, ಗೋಗೇರಿ, ಕುಟೋಂಜಿ, ರಾಜೂರ, ಸೂಡಿ, ಲಕ್ಕಲಕಟ್ಟಿ, ಶಾಂತಗೇರಿ, ಹಾಲಕೆರೆ, ನಿಡಗುಂದಿ, ಮಾರನಬಸರಿ, ಇಟಗಿ, ಮುಶಿಗೇರಿ, ಶಾಂತಗೇರಿ ಒಟ್ಟು 13 ಗ್ರಾಮ ಪಂಚಾಯ್ತಿಗಳಿದ್ದು, ಪಂಚಾಯ್ತಿಗಳ ಕೇಂದ್ರ ಸ್ಥಾನ ಒಳಗೊಂಡಂತೆ ಗಜೇಂದ್ರಗಡ ತಾಲ್ಲೂಕಿನಲ್ಲಿ ಒಟ್ಟು 46 ಗ್ರಾಮಗಳಿವೆ.

ತಾಲ್ಲೂಕಿನ ಪ್ರತಿ ಗ್ರಾಮ ಪಂಚಾಯ್ತಿಗೆ ಒಂದರಂತೆ ಹಂತ ಹಂತವಾಗಿ ಸ್ವಚ್ಛ ಭಾರತ್‌ ಮಿಷನ್‌ ಹಾಗೂ ಗ್ರಾಮ ಪಂಚಾಯ್ತಿಯ 14ನೇ ಮತ್ತು 15ನೇ ಹಣಕಾಸಿನಲ್ಲಿ ಸುಮಾರು ₹5.80 ಲಕ್ಷ ವೆಚ್ಚದಲ್ಲಿ ಕಸ ವಿಲೇವಾರಿ ವಾಹನ ಖರೀದಿಸಲಾಗಿದೆ. ಕೆಲ ಪಂಚಾಯ್ತಿಗಳಲ್ಲಿ ವಾಹನ ಖರೀದಿಸಿ ಮೂರು ವರ್ಷ ಕಳೆದರೂ ಕೆಲ ಪಂಚಾಯ್ತಿಗಳಲ್ಲಿ ಒಂದು ದಿನವೂ ಬಳಕೆಯಾಗಿಲ್ಲ. ಕೆಲವು ಪಂಚಾಯ್ತಿಗಳಲ್ಲಿ ಕೆಲವು ಸರ್ಕಾರಿ ಕಾರ್ಯಕ್ರಮಗಳ ಕುರಿತು ಜಾಗೃತಿ ಹಾಗೂ ಪ್ರಚಾರಕ್ಕಾಗಿ ಆಗಾಗ ಬಳಸಲಾಗುತ್ತಿದೆ. ಆದರೆ ಬಹುತೇಕ ಪಂಚಾಯ್ತಿಗಳಲ್ಲಿ ವಾಹನಗಳನ್ನು ಪಂಚಾಯ್ತಿ ಮುಂದೆ ಅಥವಾ ಖಾಸಗಿ ಜಾಗೆಯಲ್ಲಿ ನಿಲ್ಲಿಸಲಾಗಿದ್ದು, ದೂಳು ಹಿಡಿದು ತುಕ್ಕು ಹಿಡಿಯುವ ಹಂತಕ್ಕೆ ತಲುಪುತ್ತಿವೆ.

ಕಸ ತುಂಬುವ ವಾಹನ ಓಡಿಸಲು ಎಸ್ಸೆಸ್ಸೆಲ್ಸಿ ಅಥವಾ ಪಿಯುಸಿ ಮುಗಿಸಿದ ಹಾಗೂ ಕಸ ಸಂಗ್ರಹಣೆ, ಘನತ್ಯಾಜ್ಯ ನಿರ್ವಹಣೆಗೆ ಸ್ವ ಸಹಾಯ ಗುಂಪಿನ 3 ಜನ ಮಹಿಳಾ ಸಿಬ್ಬಂದಿಯನ್ನು ನೇಮಿಸಿ, ಅವರಿಗೆ ಸೂಕ್ತ ತರಬೇತಿ ನೀಡಿ, ಕಸ ಸಂಗ್ರಹಣೆ ಆರಂಭಿಸಬೇಕು. ಆರಂಭದಲ್ಲಿ 3 ತಿಂಗಳು ವಾಹನಕ್ಕೆ ಇಂಧನ ಹಾಗೂ ಮಹಿಳಾ ಸಿಬ್ಬಂದಿಗೆ ಗ್ರಾಮ ಪಂಚಾಯ್ತಿ ವತಿಯಿಂದ ಸಂಬಳ ನೀಡಬೇಕು. ಬಳಿಕ ಸಂಸ್ಕರಣಾ ಘಟಕದಿಂದ ಬರುವ ಆದಾಯ ಹಾಗೂ ಕಸ ಸಂಗ್ರಹಿಸುವ ಮನೆಯಿಂದ ತೆರಿಗೆ ಸಂಗ್ರಹಿಸಿ ಅದರಲ್ಲಿಯೇ ವಾಹನಕ್ಕೆ ಇಂಧನ ಹಾಗೂ ಸಿಬ್ಬಂದಿ ವೇತನ ಹಂಚಿಕೆ ಮಾಡಬೇಕೆಂಬ ಆದೇಶವಿದೆ. ಹೀಗಾಗಿ ಹಲವು ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿ ಸ್ವ ಸಹಾಯ ಗುಂಪಿನ ಮಹಿಳೆಯರಿಗೆ ತರಬೇತಿ ನೀಡಲಾಗಿದೆ. ಆದರೆ ಕಸ ಸಂಗ್ರಹಣೆ, ನಿರ್ವಹಣೆ ಕಾರ್ಯ ಮಾತ್ರ ಆರಂಭವಾಗಿಲ್ಲ.

ಕಾರ್ಯಾರಂಭ ಮಾಡಿಲ್ಲ:

ತಾಲ್ಲೂಕಿನ 13 ಗ್ರಾಮ ಪಂಚಾಯ್ತಿಗಳಲ್ಲಿ ಘನತ್ಯಾಜ್ಯ ವಿಲೇವಾರಿ ಘಟಕಗಳನ್ನು ಪಂಚಾಯತ್‌ ರಾಜ್‌ ಎಂಜಿನಿಯರಿಂಗ್‌ ವಿಭಾಗ ಅನುಷ್ಟಾನಗೊಳಿಸುತ್ತಿದ್ದು, ಗೋಗೇರಿ, ಕುಂಟೋಜಿ, ಸೂಡಿ, ಇಟಗಿ, ನಿಡಗುಂದಿ, ಶಾಂತಗೇರಿ, ಮುಶಿಗೇರಿ, ಹಾಲಕೆರೆ ಗ್ರಾಮ ಪಂಚಾಯ್ತಿಗಳಲ್ಲಿ ಘನತ್ಯಾಜ್ಯ ವಿಲೇವಾರಿ ಘಟಕ ನಿರ್ಮಾಣದ ಕಾಮಗಾರಿ ಪೂರ್ಣಗೊಂಡಿವೆ.

ರಾಜೂರ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿ ನಾಗರಿಕ ಸೌಲಭ್ಯದಲ್ಲಿ ಘಟಕ ನಿರ್ಮಿಸಲು ಜಾಗ ಗುರುತಿಸಲಾಗಿದೆ. ರಾಮಾಪುರ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯ ಚಿಲಝರಿ ಗ್ರಾಮದ ನಾಗರಿಕ ಸೌಲಭ್ಯದಲ್ಲಿ ಘಟಕ ನಿರ್ಮಾಣ ಕಾಮಗಾರಿ ಆರಂಭಿಸಲಾಗಿತ್ತು. ಆದರೆ ತಕರಾರು ಬಂದಿದ್ದರಿಂದ ಕಾಮಗಾರಿ ಅರ್ಧಕ್ಕೆ ನಿಂತಿದೆ. ಲಕ್ಕಲಕಟ್ಟಿ ಗ್ರಾಮ ಪಂಚಾಯ್ತಿಯಲ್ಲಿ ಅರಣ್ಯ ಭೂಮಿಯಲ್ಲಿ ಘಟಕ ನಿರ್ಮಿಸಲಾಗಿತ್ತು. ಹೀಗಾಗಿ ಅರಣ್ಯ ಇಲಾಖೆಯವರು ಘಟಕವನ್ನು ತೆರವುಗೊಳಿಸಿದ್ದಾರೆ. ಗುಳಗುಳಿ ಗ್ರಾಮ ಪಂಚಾಯ್ತಿಯಲ್ಲಿ ಜಾಗ ಗುರುತಿಸಿಲ್ಲ.