ಆತಂಕ ಸೃಷ್ಟಿಸಿದ ರಸ್ತೆ ಬದಿ ಮರಗಳು: ತೆರವುಗೊಳಿಸಿ, ಹೊಸ ಗಿಡಗಳನ್ನು ನೆಡಲು ಆಗ್ರಹ

ಪುರಾತನ ಕಾಲದಲ್ಲಿ ಭೂಮಿಯಲ್ಲಿ ಆಳದಲ್ಲಿ ಬೇರೂರುವಂತಿದ್ದ ಅತ್ತಿ, ಆಲ, ನೇರಳೆ, ಮಾವಿನಂತಹ ಬಹು ವಾರ್ಷಿಕ ಹಾಗೂ ಗಾಳಿ, ಮಳೆಗೆ ಹೆದರದ ಮರಗಳನ್ನು ರಸ್ತೆ ಬದಿಯಲ್ಲಿ ಬೆಳೆಸುತ್ತಿದ್ದರು. ಈ ಮರಗಳು ಜನಸಾಮಾನ್ಯರಿಗೆ ನೆರಳು ನೀಡುತ್ತಿದ್ದವಲ್ಲದೇ ಹಣ್ಣುಗಳನ್ನು ಆಹಾರವಾಗಿ ಬಳಸುತ್ತಿದ್ದರು. ತೀವ್ರ ಹಳೆಯದಾದ ಮರಗಳು ಮಾತ್ರ ಅತಿಯಾದ ಗಾಳಿಗೆ ಸಿಲುಕಿ ನೆಲಕ್ಕುರುಳುತ್ತಿದ್ದವು.

ಜನಸಂಖ್ಯೆ ಬೆಳೆಯುತ್ತಾ ಹೋದಂತೆ ವಾಹನಗಳ ಓಡಾಟ ಸಂಖ್ಯೆ ಜಾಸ್ತಿಯಾಯಿತು. ರಸ್ತೆಗಳನ್ನು ವಿಸ್ತಾರ ಮಾಡುವ ಸಂದರ್ಭದಲ್ಲಿ ಬದಿಯಲ್ಲಿದ್ದ ಭಾರಿ ಗಾತ್ರದ ಮರಗಳನ್ನು ತೆರವುಗೊಳಿಸಲಾಯಿತು. ಈ ಸಂದರ್ಭದಲ್ಲಿ ಹಳೆ ಕಾಲದ ಜಾತಿ ಮರಗಳನ್ನು ನೆಟ್ಟಿದ್ದರೆ, ಇಂದು ಗಟ್ಟಿಯಾದ ಮರಗಳು ರಸ್ತೆಯಂಚಿನಲ್ಲಿ ಇರುತ್ತಿದ್ದವು. ಭೂಮಿಯಲ್ಲಿ ಆಳವಾಗಿ ಬೇರು ಹೋಗದಂತಹ ಕೆಲ ಹೊಸ ಜಾತಿ ಮರಗಳನ್ನು ರಸ್ತೆ ಬದಿ ನೆಟ್ಟಿರುವ ಪರಿಣಾಮ, ಬೇಸಿಗೆ ಕಾಲದಲ್ಲಿಯೂ ಸ್ವಲ್ಪ ಗಾಳಿಗೆ ಮರಗಳು ಧರೆಗುರುಳುತ್ತಿವೆ ಎಂದು ಜನರು ಹೇಳುತ್ತಿದ್ದಾರೆ.

ಎರಡು ದಿನಗಳ ಹಿಂದೆ ಮಗ್ಗೆ ರಸ್ತೆಯಲ್ಲಿ ಹೊಂಕರವಳ್ಳಿ ಸಮೀಪ ಕಾರೊಂದು ರಸ್ತೆಯಲ್ಲಿ ಚಲಿಸುತ್ತಿದ್ದಾಗ ಆಕಸ್ಮಿಕವಾಗಿ ಬೃಹದಾಕಾರದ ಹಳೆ ಮರವೊಂದು ಕಾರಿನ ಮೇಲೆ ಬಿದ್ದ ಪರಿಣಾಮ, ಕಾರು ಜಖಂ ಆಗಿದೆ. ಚಾಲಕನಿಗೆ ಗಾಯಗಳಾಗಿ ಆಸ್ಪತ್ರೆ ಸೇರಿದ್ದಾರೆ. ಮುಂದಿನ ದಿನಗಳಲ್ಲಿ ಮಳೆ, ಗಾಳಿ ಬೀಸುವ ಸಂದರ್ಭದಲ್ಲಿ, ಇಂತಹ ಪರಿಸ್ಥಿತಿ ನಿರ್ಮಾಣವಾದರೆ ಜನಸಾಮಾನ್ಯರು ಮತ್ತು ವಾಹನಗಳು ಭಯದಿಂದ ಓಡಾಡಬೇಕಾಬೇಕಾಗುತ್ತದೆ ಎನ್ನುತ್ತಾರೆ ಜನರು.

ಅರಣ್ಯ ಇಲಾಖೆ ಎಚ್ಚೆತ್ತುಕೊಂದು ರಸ್ತೆ ಬದಿಯಲ್ಲಿರುವ ಹಳೆ ಮರಗಳನ್ನು ತೆರವುಗೊಳಿಸಿ, ಮುಂಬರುವ ಮಳೆಗಾಲದಲ್ಲಿ ಪುರಾತನ ಕಾಲದ ಮರಗಳನ್ನು ಬೆಳೆಸಲು ಮುಂದಾಗಬೇಕು. ಇಂತಹ ಮರಗಳನ್ನು ಬೆಳೆಸಿದರೆ ಮಾನವ, ಪ್ರಾಣಿ ಮತ್ತು ಪಕ್ಷಿಗಳಿಗೂ ನೆರವಾಗಲಿದೆ ಎಂದು ಜನರು ಒತ್ತಾಯಿಸುತ್ತಿದ್ದಾರೆ.