‌ಆಳಂದ | ಬಸ್‌ ಸಂಚಾರ ಸ್ಥಗಿತ; ಶುಕ್ರವಾಡಿ ಗ್ರಾಮಕ್ಕೆ ಸಂಪರ್ಕವೇ ದುಸ್ತರ!

ಆಳಂದ ಪಟ್ಟಣದಿಂದ 7 ಕಿಮೀ ದೂರದಲ್ಲಿರುವ ಪುಟ್ಟಗ್ರಾಮ ಶುಕ್ರವಾಡಿ. ಅಂದಾಜು 1600 ಜನರು ವಾಸ ಮಾಡುತ್ತಿದ್ದಾರೆ. ಹೊನ್ನಳ್ಳಿ ಮಾರ್ಗವಾಗಿ ಶುಕ್ರವಾಡಿವರೆಗೆ 3 ಕಿ.ಮೀ ರಸ್ತೆ ಇದೆ. ಈಗ 1.5 ಕಿ.ಮೀ ರಸ್ತೆ ದುರಸ್ತಿಗೆ ಅಕ್ಕಪಕ್ಕದ ರೈತರು ಕಳೆದ 12 ವರ್ಷದಿಂದ ಅಡ್ಡಿ ಪಡಿಸುತ್ತಿದ್ದಾರೆ. ನಮ್ಮ ಜಮೀನಿನಲ್ಲಿ ಯಾವುದೇ ರಸ್ತೆ ಮಾರ್ಗ ಇಲ್ಲ. ಗ್ರಾಮದ ಹಳೆಯ ಸಂಪರ್ಕ ರಸ್ತೆ ದುರಸ್ತಿ ಕೈಗೊಂಡು ಬಳಕೆ ಮಾಡಬೇಕು ಎಂಬುವದು ರೈತರ ವಾದ. 1972ರಲ್ಲಿ ಬರಗಾಲದ ಸಂದರ್ಭದಲ್ಲಿ ನಿರ್ಮಾಣವಾದ ಈ ರಸ್ತೆಯು 1996ರಲ್ಲಿ ಒಮ್ಮೆ ಡಾಂಬರೀಕರಣಗೊಂಡಿದೆ. ಪುನರ್ ನಿರ್ಮಾಣ ಸಂದರ್ಭದಲ್ಲಿ ರೈತರು ಕೋರ್ಟ್‌ ಮೂಲಕ ತಡೆಯಾಜ್ಞೆ ತಂದ ಹಿನ್ನೆಲೆಯಲ್ಲಿ ಸಮಸ್ಯೆ ಮುಂದುವರಿದಿದೆ. ಕಳೆದ 12 ವರ್ಷದಿಂದ ಗ್ರಾಮದ 1.5 ಕಿಮೀ ರಸ್ತೆ ದುರಸ್ತಿ ಕಂಡಿಲ್ಲ. ಇದರಿಂದ ಗ್ರಾಮಸ್ಥರು ನಿರಂತರ ಸಮಸ್ಯೆ ಎದುರಿಸುವಂತಾಗಿದೆ. ಈಗ ದೊಡ್ಡವಾಹನ ಸಂಚಾರಕ್ಕೆ ಗ್ರಾಮಸ್ಥರು ತಡಕಲ ಹಳ್ಳಿ ಸಲಗರ ಮಾರ್ಗದಲ್ಲಿ ಸಂಚರಿಸುತ್ತಾರೆ. ಕಳೆದ ಲೋಕಸಭೆ ಚುನಾವಣೆ ಸಂದರ್ಭದಲ್ಲಿ ಗ್ರಾಮಸ್ಥರು ಸಾಮೂಹಿಕ ಮತದಾನ ಬಹಿಷ್ಕಾರಕ್ಕೆ ಮುಂದಾಗಿದ್ದರು. ಆಗ ಚುನಾವಣಾಧಿಕಾರಿಗಳು ಪೊಲೀಸ್‌ ಅಧಿಕಾರಿಗಳು ಗ್ರಾಮಸ್ಥರ ಮನವೊಲಿಸುವಲ್ಲಿ ಯಶಸ್ವಿಯಾಗಿದ್ದರು. ಈಗ ಮತ್ತೆ ಬಸ್‌ ಸಂಚಾರ ಸ್ಥಗಿತ ಹಾಗೂ ರಸ್ತೆ ಸಂಪೂರ್ಣ ಹಾಳಾಗಿ ಸಣ್ಣಪುಟ್ಟ ಅವಘಡಗಳು ಹೆಚ್ಚುತ್ತಿರುವದರಿಂದ ಗ್ರಾಮಸ್ಥರು ಮತ್ತೆ ತಮ್ಮೂರು ರಸ್ತೆ ದುರಸ್ತಿಗೆ ತಹಶೀಲ್ದಾರ್‌ ಹಾಗೂ ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದರು.