ಕಲ್ಯಾಣ ಕರ್ನಾಟಕ: ಬಜೆಟ್‌ನಲ್ಲಿ ಸಿಗಲಿದೆಯೇ ಕೈಗಾರಿಕೆಗೆ ಉತ್ತೇಜನ?

ಕಲ್ಯಾಣ ಕರ್ನಾಟಕದ ಹೆಬ್ಬಾಗಿಲು ಎನಿಸಿಕೊಂಡ ಕಲಬುರಗಿ ಪ್ರಾದೇಶಿಕ ಕೇಂದ್ರವೂ ಹೌದು. ರಾಜ್ಯದ ಇತರ ಪ್ರಾದೇಶಿಕ ಕೇಂದ್ರಗಳಾದ ಮೈಸೂರು ಮಂಗಳೂರು ಬೆಳಗಾವಿಗೆ ಹೋಲಿಸಿದರೆ ತೀವ್ರ ನಿರಾಸೆ ಕಾಡುತ್ತಿದೆ. ನಗರದ ಕೇಂದ್ರ ಬಸ್ ನಿಲ್ದಾಣದ ಎದುರಿನ ತಗ್ಗು ಗುಂಡಿಗಳ ರಸ್ತೆ ಜಿಲ್ಲೆಯ ಜನಪ್ರತಿನಿಧಿಗಳು ಅಧಿಕಾರಿಗಳು ನಗರದ ಸೌಂದರೀಕರಣದ ಬಗ್ಗೆ ವಹಿಸಿರುವ ನಿರ್ಲಕ್ಷ್ಯಕ್ಕೆ ಕನ್ನಡಿ ಹಿಡಿಯುತ್ತದೆ. ನಗರದ ಬಹುತೇಕ ಬಡಾವಣೆಗಳಿಗೆ ಪೂರೈಕೆಯಾಗುವ ಕಲುಷಿತ ನೀರು ಕಸ ವಿಲೇವಾರಿ ಘನತ್ಯಾಜ್ಯ ವಿಲೇವಾರಿಯಲ್ಲಿನ ಸಮಸ್ಯೆ ನಗರಗಳು ಬೆಳೆದರೂ ಒಳಚರಂಡಿ ಒಳರಸ್ತೆಗಳು ಸುಧಾರಿಸದಿರುವುದು ಬಡಾವಣೆಗಳ ಉದ್ಯಾನಗಳು ನಿರ್ವಹಣೆಯಿಲ್ಲದೇ ಸೊರಗಿರುವುದು ನಾಗರಿಕರಲ್ಲಿ ತೀವ್ರ ನಿರಾಸೆಯನ್ನೂ ಜುಗುಪ್ಸೆಯನ್ನೂ ಮೂಡಿಸುತ್ತದೆ. ಇನ್ನು ನಗರದ ಕೊಳಚೆಪ್ರದೇಶಗಳ ಜನರ ಗೋಳನ್ನು ಕೇಳುವವರೇ ಇಲ್ಲ ಎಂಬಂತಾಗಿದೆ. ಜಿಲ್ಲೆಯಲ್ಲಿ ಪ್ರವಾಸೋದ್ಯಮ ಬೆಳವಣಿಗೆಗೆ ಸಾಕಷ್ಟು ಅವಕಾಶಗಳಿದ್ದರೂ ಅದನ್ನು ಬಳಸಿಕೊಳ್ಳದೇ ಇರುವುದು ಸಹ ಜಿಲ್ಲೆಯ ಮಟ್ಟಿಗೆ ಪ್ರಮುಖ ಹಿನ್ನಡೆಯಾಗಿದೆ.  ಹೀಗಾಗಿ ಕಲಬುರಗಿ ನಗರಕ್ಕೆ ಮೂಲಸೌಕರ್ಯ ಕಲ್ಪಿಸಲು ಒಂದು ಪ್ರತ್ಯೇಕ ಪ್ಯಾಕೇಜ್ ಘೋಷಿಸಬೇಕು ಎಂಬುದು ಜನತೆಯ ಹಂಬಲ.