ಕಲಬುರಗಿ: ಮುಳ್ಳುಕಂಟಿಯ ನಡುವೆ ಮರೆಯಾದ ಬದುಕು

ದಾಖಲೆಗಳಿಲ್ಲದ ಕಾರಣ ಇಲ್ಲಿನ ಬಹುತೇಕ ಮಕ್ಕಳು ಶಿಕ್ಷಣದಿಂದ ವಂಚಿತರಾಗಿದ್ದಾರೆ. ಪಾಟಿ ಚೀಲದ ಬದಲು ಚಿಂದಿ ಚೀಲ ಚಿಕ್ಕ ಹೆಗಲುಗಳನ್ನೇರಿದೆ. ಪಾಲಕರು ಪ್ಲಾಸ್ಟಿಕ್ ಕೊಡ ಮಾರಲು ಹಾಗೂ ಕೂಲಿ ಕೆಲಸಕ್ಕೆ ತೆರಳಿದರೆ ಮಕ್ಕಳು ನಗರದ ನೆಹರೂ ಗಂಜ್‌ ಸೂಪರ್ ಮಾರುಕಟ್ಟೆ ಸೇರಿ ಸುತ್ತಮುತ್ತಲ ಪ್ರದೇಶಗಳಲ್ಲಿ ಚಿಂದಿ ಆಯುತ್ತಾರೆ.

‘ಹೆಚ್ಚಿನ ಜನರು ಸ್ಟೀಲಿನ ಹಂಡೆ ಕೊಂಡುಕೊಳ್ಳುವ ಕಾರಣ ಪ್ಲಾಸ್ಟಿಕ್ ಬಿಂದಿಗೆಗೆ ಬೇಡಿಕೆ ಕಡಿಮೆಯಾಗಿದೆ’ ಎಂದು ಇಲ್ಲಿನ ನಿವಾಸಿ ರಮೇಶ ತಿಳಿಸಿದರು. ‘ನಗರದಲ್ಲಿ ಯಾರೂ ತೆಗೆದುಕೊಳ್ಳುವುದಿಲ್ಲ. ಬೈಕಿನ ಮೇಲೆ ಜಿಲ್ಲೆಯ ಗ್ರಾಮೀಣ ಪ್ರದೇಶಕ್ಕೆ ತೆರಳಿ ಬಿಂದಿಗೆ ಮಾರಾಟ ಮಾಡಿ ಬರುತ್ತೇವೆ. ದಿನವಿಡೀ ತಿರುಗಿ ಮಾರಾಟ ಮಾಡಿದರೆ ಪೆಟ್ರೊಲ್ ಖರ್ಚು ಕಳೆದು ₹200ರಿಂದ ₹300 ಮಿಕ್ಕುತ್ತದೆ. ಇದರಿಂದ ಜೀವನ ನಿರ್ವಹಣೆ ಮಾಡುತ್ತೇವೆ’ ಎಂದು ಹೇಳಿದರು.