ವಾಡಿ: ಮೇವಿಗೆ ಶುಕ್ರದೆಸೆ, ಜೋಳದ ಕಣಿಕಿ -ಶೇಂಗಾ ಹೊಟ್ಟಿನ ಖರೀದಿ ಜೋರು

ಹಿಂಗಾರು ಜೋಳ ಹಾಗೂ ಶೇಂಗಾದ ರಾಶಿ ಮುಗಿದಿದ್ದು ಹಳ್ಳಿಗಳ ರೈತರ ಜಮೀನುಗಳಲ್ಲಿ ಜೋಳದ ಕಣಿಕಿ, ಶೇಂಗಾ ಹೊಟ್ಟಿನ ಖರೀದಿ ಜೋರಾಗಿ ನಡೆಯುತ್ತಿದೆ.

ಮೇವಿಗೆ ಬೇಡಿಕೆ ಹೆಚ್ಚಾಗಿದ್ದು ಮೇವು ಉತ್ಪತ್ತಿ ಮಾಡುವ ಜೋಳ, ಶೇಂಗಾಕ್ಕೆ ಶುಕ್ರದೆಸೆ ಬಂದಿದೆ. ಹೆಸರು, ಹತ್ತಿ, ಮೆಣಸಿನಕಾಯಿಯಂತಹ ವಾಣಿಜ್ಯ ಬೆಳೆಗಳ ಮೊರೆ ಹೋಗಿರುವ ರೈತರಿಗೆ ಮೇವಿನ ಕೊರತೆ ಕಾಡುತ್ತಿದೆ. ಜೋಳದ ಕಣಿಕಿಗಾಗಿ ಹಾಗೂ ಶೇಂಗಾದ ಹೊಟ್ಟಿಗಾಗಿ ಜಮೀನುಗಳಿಗಾಗಿ ಎಡತಾಕುತ್ತಿದ್ದು ಮೇವಿ ಬೇಡಿಕೆ ಹೆಚ್ಚಿಸಿಕೊಂಡಿದೆ.

ದಿನದಿಂದ ದಿನಕ್ಕೆ ಬಿಸಿಲು ಏರುತ್ತಿದೆ. ನೀರಿನ ಅಭಾವದ ಜತೆ ಜಾನುವಾರುಗಳಿಗೆ ಮೇವಿನ ಕೊರತೆ ಎದುರಾಗುವ ಆತಂಕದ ಹಿನ್ನೆಲೆಯಲ್ಲಿ ಮೇವು ಸಂಗ್ರಹಣೆ ಭರದಿಂದ ನಡೆದಿದೆ. ಬೇಡಿಕೆ ಹೆಚ್ಚುತ್ತಿದ್ದಂತೆಯೇ ಮೇವಿನ ಬೆಲೆಯೂ ಗಗನಕ್ಕೇರಿದೆ.

ಜೋಳದ ಕಣಿಕಿ ಪ್ರತಿ ಟ್ರ್ಯಾಕ್ಟರ್‌ಗೆ ₹5–6 ಸಾವಿರಕ್ಕೆ ಖರೀದಿಯಾಗುತ್ತಿದ್ದರೆ ಶೇಂಗಾದ ಹೊಟ್ಟಿನ ಬೆಲೆ ₹12 –13 ಸಾವಿರ ಇದೆ.

ಕಳೆದ ವರ್ಷ ಟ್ರ್ಯಾಕ್ಟರ್‌ಗೆ ₹10 ಸಾವಿರ ಆಸುಪಾಸಿನಲ್ಲಿದ್ದ ಕಣಿಕಿ ಬೆಲೆ ಈ ವರ್ಷ ಕೊಂಚ ಇಳಿದಿದ್ದರೆ ಶೇಂಗಾದ ಹೊಟ್ಟಿಗೆ ಬಂಗಾರದ ಬೆಲೆ ಬಂದಿದೆ.

ಯಾದಗಿರಿ, ವಿಜಯಪುರ, ರಾಯಚೂರು ಹಾಗೂ ಬೀದರ್ ಜಿಲ್ಲೆಗಳಿಂದ ಚಿತ್ತಾಪುರ ತಾಲ್ಲೂಕಿಗೆ ಲಗ್ಗೆ ಇಟ್ಟಿರುವ ರೈತರು ತಮ್ಮ ಜಾನುವಾರುಗಳಿಗಾಗಿ ದುಬಾರಿ ದರ ಆದರೂ ಸರಿ ಖರೀದಿಸಿ ತೆಗೆದುಕೊಂಡು ಹೋಗುತ್ತಿರುವುದು ಕಂಡು ಬರುತ್ತಿದೆ.