ಕೊಡಗು: ಅಳಿವಿನತ್ತ ಸಾಗುತ್ತಿವೆ ಪಾರಂಪರಿಕ ತಾಣಗಳು!

ಪಾರಂಪರಿಕ ತಾಣಗಳೆಂದರೆ ಕ್ರಿಸ್ತಪೂರ್ವಕ್ಕೆ ಸೇರಿದ ಕಟ್ಟಡಗಳಷ್ಟೇ ಆಗಿರಬೇಕಿಲ್ಲ. 100 ವರ್ಷ ಪೂರೈಸಿದ ಕಟ್ಟಡಗಳನ್ನು ಪಾರಂಪರಿಕ ಕಟ್ಟಡಗಳೆಂದೇ ವ್ಯಾಖ್ಯಾನಿಸಲಾಗುತ್ತದೆ. ಅದಕ್ಕೆ ಏನಾದರೂ ಐತಿಹಾಸಿಕ ಧಾರ್ಮಿಕ ಸಾಮಾಜಿಕ ಮಹತ್ವ ಇದ್ದರೆ ಅದನ್ನು ಸಂರಕ್ಷಿಸಲಾಗುತ್ತದೆ. ಈ ಕುರಿತು ಅರಿವು ಇಲಾಖೆಯ ಅಧಿಕಾರಿಗಳಲ್ಲೇ ಇಲ್ಲದಿರುವುದು ವಿಪರ್ಯಾಸ. ಏಕೆಂದರೆ ಯಾವುದೇ ಒಂದು ಇಲಾಖೆಯೂ ಸಹ ಇದುವರೆಗೂ ತಮ್ಮ ಇಲಾಖಾ ವ್ಯಾಪ್ತಿಯ ಇಂತಹ ಕಟ್ಟಡ ನೂರು ವರ್ಷ ಪೂರೈಸಿದ್ದು ಅದನ್ನು ಪಾರಂಪರಿಕ ಕಟ್ಟಡ ಎಂದು ಘೋಷಿಸಿ ಎಂಬ ಪ್ರಸ್ತಾವವನ್ನು ಪುರಾತತ್ವ ಸಂಗ್ರಹಾಲಯಗಳು ಮತ್ತು ಪರಂಪರೆ ಇಲಾಖೆಗೆ ಸಲ್ಲಿಸಿಲ್ಲ. ಉದಾಹರಣೆಗೆ ಮಡಿಕೇರಿಯಲ್ಲಿರುವ ಸುದರ್ಶನ ಅತಿಥಿ ಗೃಹ ಜಿಲ್ಲೆಯಲ್ಲಿರುವ ಅನೇಕ ಶಾಲೆಗಳು ನಗರಸಭೆ ವ್ಯಾಪ್ತಿಯಲ್ಲಿನ ಕಟ್ಟಡಗಳು ಲೋಕೋಪಯೋಗಿ ಇಲಾಖೆ ವ್ಯಾಪ್ತಿಯಲ್ಲಿನ ಸೇತುವೆಗಳು ಹೀಗೆ ಅನೇಕ ತಾಣಗಳಿಗೆ ನೂರಿನ್ನೂರು ವರ್ಷಗಳು ತುಂಬಿವೆ. ಹಾಗಿದ್ದರೂ ಅವುಗಳ ಬಗ್ಗೆ ಸಂಬಂಧಿಸಿದ ಇಲಾಖೆಯ ಅಧಿಕಾರಿಗಳು ದಿವ್ಯ ನಿರ್ಲಕ್ಷ್ಯ ತೋರಿದ್ದಾರೆ.

ಜಿಲ್ಲೆಯಲ್ಲಿರುವ ಅನೇಕ ಸ್ಮಾರಕಗಳನ್ನು ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ ಸಂರಕ್ಷಿತ ಪಾರಂಪರಿಕ ತಾಣವೆಂದು ಘೋಷಿಸಿಲ್ಲ. ಪುರಾತತ್ವ ಸಂಗ್ರಹಾಲಯಗಳು ಮತ್ತು ಪರಂಪರೆ ಇಲಾಖೆಯೂ ಘೋಷಿಸಿಲ್ಲ ಮಾತ್ರವಲ್ಲ ಪ್ರಸ್ತಾವದಲ್ಲೂ ಅನೇಕ ಸ್ಮಾರಕಗಳಿಗೆ ಸ್ಥಾನ ನೀಡಿಲ್ಲ. ವಿರಾಜಪೇಟೆಯ ದೊಡ್ಡಗಡಿಯಾರ ಕುಶಾಲನಗರದ ಹಳೆಯ ಸೇತುವೆ ಮಡಿಕೇರಿ ಹೊರವಲಯದಲ್ಲಿರುವ ರಾಜಾಸೀಟ್‌ನಿಂದ ತೆಗೆದ ಬ್ರಿಟಿಷರ ಗೋರಿಗಳು ಶತಮಾನಗಳನ್ನು ಕಂಡಿರುವ ಅನೇಕ ಚರ್ಚ್‌ಗಳು ದೇಗುಲಗಳು ಮಂಟಪಗಳು ಹೀಗೆ ಇನ್ನೂ ಅನೇಕ ತಾಣಗಳನ್ನು ಹೆಸರಿಸಬಹುದು. ಇವುಗಳ ಸಂರಕ್ಷಣೆಗೆ ಜಿಲ್ಲಾಡಳಿತ ತುರ್ತು ಗಮನ ನೀಡಬೇಕಿದೆ. ಆಗ ಮಾತ್ರವೇ ವಿಶ್ವ ಪಾರಂಪರಿಕ ದಿನಾಚರಣೆಗೂ ಅರ್ಥ ಬರುತ್ತದೆ.