ಶನಿವಾರಸಂತೆ: ಘಟಕ ನಿರ್ಮಿಸಿದರೂ ಕರಗದ ಕಸದ ರಾಶಿ

ಪಟ್ಟಣದ ಪ್ರವೇಶದ್ವಾರದಲ್ಲೇ ರಾಶಿ ರಾಶಿ ಕಸವು ಪ್ರಯಾಣಿಕರನ್ನು ಸ್ವಾಗತಿಸುತ್ತಿದೆ. ಪಟ್ಟಣದ ಮುಖ್ಯರಸ್ತೆಯ ಒಂದು ಬದಿಯಲ್ಲಿ ಕಸದ ರಾಶಿಯನ್ನೇ ಹಾಕಲಾಗಿದೆ. ಸಮೀಪದಲ್ಲೇ ಇರುವ ಹೊಳೆಗೇ ತಡೆಗೋಡೆ ಇಲ್ಲ. ಹೀಗಾಗಿ, ಕಸವೆಲ್ಲವೂ ನಿಧಾನವಾಗಿ ಹೊಳೆಯ ಪಾಲಾಗುತ್ತಿದೆ.  ಇಲ್ಲಿನ ಜಲಚರಗಳು ಕೂಡ ಬದುಕಲು ಅಸಾಧ್ಯವಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ನೀರು ಕಾವೇರಿಯ ಉಪನದಿ ಹೇಮಾವತಿಯನ್ನು ಸೇರುತ್ತಿದೆ. ಒಂದು ವೇಳೆ ಇಲ್ಲಿರುವ ಕಸವನ್ನು ತೆಗೆಯದೇ ಹೋದರೆ ಮುಂಗಾರುಪೂರ್ವದಲ್ಲಿ ಬೀಳುವ ಭಾರಿ ಮಳೆಗೆ ಕಸವೆಲ್ಲವೂ ಹೊಳೆ ಸೇರುವ ಸಂಭವವೂ ಇದೆ.

ಈ ಕಸದ ರಾಶಿಗೆ ಕೂಗಳತೆ ದೂರದಲ್ಲೇ ಸಮುದಾಯ ಆರೋಗ್ಯ ಕೇಂದ್ರ ಇದ್ದರೂ, ಸರ್ಕಾರಿ ಪ್ರಾಥಮಿಕ ಶಾಲೆ, ಪದವಿಪೂರ್ವ ಕಾಲೇಜು, ಪದವಿ ಕಾಲೇಜುಗಳು ಇದ್ದರೂ ಯಾರೊಬ್ಬರ ಹೃದಯಗಳು ಕರಗಿಲ್ಲ. ನಿತ್ಯವೂ ರೋಗಿಗಳು, ವಿದ್ಯಾರ್ಥಿಗಳು, ಸಾರ್ವಜನಿಕರು ಕಸದ ವಾಸನೆಯಲ್ಲೇ ಸಂಚರಿಸಬೇಕಾದ ಸ್ಥಿತಿ ಇದೆ.

ವಿಚಿತ್ರ ಎಂದರೆ, ಈಗಾಗಲೇ ಇಲ್ಲಿಗೆ 2 ಕಿ.ಮೀ ದೂರದಲ್ಲೇ ಕಸ ವಿಲೇವಾರಿ ಘಟಕ ಉದ್ಘಾಟನೆಯಾಗಿದ್ದರೂ ಸಮಸ್ಯೆ ಮಾತ್ರ ಇನ್ನೂ ಜೀವಂತ ಇದೆ. ಘಟಕಕ್ಕೆ ತಡೆಗೋಡೆ ಇಲ್ಲದೆ ಬೀದಿ ನಾಯಿಗಳು, ಗೋವುಗಳು, ಪ್ರಾಣಿ ಪಕ್ಷಿಗಳು ವಾಸ ಸ್ಥಾನವಾಗಿ ಮಾಡಿಕೊಂಡಿವೆ. 

ಈ ಘಟಕವು ದುಂಡಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಸ್ಥಾಪನೆಯಾಗಿದೆ. ಅಲ್ಲಿನ ಗ್ರಾಮಸ್ಥರು ಘಟಕಕ್ಕೊಂದು ಕಾಂಪೌಂಡ್ ಬೇಕು ಎಂದು  ಒತ್ತಾಯಿಸಿದ್ದಾರೆ. ಕಾಂಪೌಂಡ್ ಸಹ ಇನ್ನೂ ನಿರ್ಮಾಣವಾಗಿಲ್ಲ. ಇದರಿಂದ ಕಸ ಅಲ್ಲಿ ವಿಲೇವಾರಿಯಾಗುತ್ತಿಲ್ಲ. ಘಟಕ ಉದ್ಘಾಟನೆಯಾಗುವುದಕ್ಕೂ ಮುಂಚೆ ಇದ್ದ ಪರಿಸ್ಥಿತಿಯೇ ಈಗಲೂ ಮುಂದುವರಿದಿದೆ.

ನಾರುತ್ತಿದೆ ಗುಡುಗಳಲೆ:

ಗುಡುಗಳಲೆ ಗ್ರಾಮದಲ್ಲೂ ಕಸದ ಸಮಸ್ಯೆ ತೀವ್ರವಾಗಿದೆ. ಗುಡುಗಳಲೆ ಜಂಕ್ಷನ್‌ನಲ್ಲಿ ಕಸವನ್ನು ರಸ್ತೆಬದಿಯಲ್ಲಿ ಹಾಕಲಾಗುತ್ತಿದೆ. ಮುಖ್ಯರಸ್ತೆಯಿಂದ ಬಂದವರನ್ನು ಕಸದ ರಾಶಿಯೇ ಸ್ವಾಗತಿಸುತ್ತಿದೆ. ಹಂಡ್ಲಿ ಗ್ರಾಮ ಪಂಚಾಯಿತಿ ಅವರು ಕೂಡಲೇ ಗಮನಹರಿಸಿ ಇಲ್ಲಿ ಕಸ ಸುರಿಯುವುದನ್ನು ತಡೆಯಬೇಕಿದೆ. ಕನಿಷ್ಠ ಫಲಕಗಳನ್ನಾದರೂ ಅಳವಡಿಸಿ ಜನರಲ್ಲಿ ಇಲ್ಲಿ ಕಸ ಹಾಕದಂತೆ ಜಾಗೃತಿ ಮೂಡಿಸಬೇಕಿದೆ. ನಂತರವೂ ಕಸ ಸುರಿದರೆ ಅವರ ವಿರುದ್ಧ ನಿರ್ದಾಕ್ಷಿಣ್ಯವಾದ ಕ್ರಮಗಳನ್ನು ಕೈಗೊಳ್ಳಬೇಕಿದೆ ಎಂದು ಈ ಭಾಗದ ಸಾರ್ವಜನಿಕರು ಒತ್ತಾಯಿಸಿದ್ದಾರೆ.