ಇಷ್ಟು ಮಾತ್ರವಲ್ಲದೆ, ಈ ಬಯಲು ಕುಡುಕರು ಕೃಷಿಕ ಮಹಿಳೆಯರ ಭಯಕ್ಕೆ ಕಾರಣರಾಗಿದ್ದಾರೆ. ಹುಲ್ಲು ಹೊಟ್ಟಿಗಾಗಿ ಹೋಗುವ ಮಹಿಳೆಯರು ಗಿಡಮರಗಳ ಕೆಳಗೆ ಕುಳಿತು ಕುಡಿಯುವ ಜನರನ್ನು ಕಂಡು ದೂರ ಹೋಗಬೇಕಾದ ಅನಿವಾರ್ಯತೆ ಉಂಟಾಗಿದೆ. ಹೀಗೆ ಕುಡಿಯುವವರಲ್ಲಿ ಯುವಕರ ಸಂಖ್ಯೆಯೇ ಹೆಚ್ಚು. ಇನ್ನು ಕಳೆದ ಗ್ರಾಮ ಪಂಚಾಯಿತಿ ಚುನಾವಣೆ ಸಂದರ್ಭದಲ್ಲಂತೂ ಬಯಲು ಪಾರ್ಟಿಗಳು ಸಾಮಾನ್ಯವಾಗಿದ್ದವು ಎಂದು ಜನರು ಮಾತನಾಡಿಕೊಳ್ಳುತ್ತಾರೆ. ಇವೆಲ್ಲವೂ ಗುಮಾನಿಗೂ ಸಿಗದ ಗುಟ್ಟಿನ ಪಾರ್ಟಿಗಳಾಗಿದ್ದವು ಎನ್ನುವುದಲ್ಲಿ ಎರಡು ಮಾತಿಲ್ಲ.