ಕೊಪ್ಪಳ: ಥಾಯ್ಲೆಂಡ್‌ನಲ್ಲಿ ನಡೆದ ಕ್ರಿಸಾಲಿಸ್ ಫೋಟೊ ಸರ್ಕ್ಯೂಟ್-2022 ಅಂತರರಾಷ್ಟ್ರೀಯ ಛಾಯಾಗ್ರಹಣ ಸ್ಪರ್ಧೆಯಲ್ಲಿ ನಗರದ ಛಾಯಾಗ್ರಾಹಕ ಪ್ರಕಾಶ ಕಂದಕೂರ ಅವರ ‘ಸ್ಪ್ರಿಂಕಲ್ಸ್ ಆಫ್ ಅನಾಯ್ಟಿಂಗ್’ (ಅಭಿಷೇಕದ ಸಿಂಚನ) ಶೀರ್ಷಿಕೆಯ ಚಿತ್ರ `ಫೋಟೋವಿವೋ’ ಚಿನ್ನದ ಪದಕ ಪಡೆದುಕೊಂಡಿದೆ.
ಸ್ಪರ್ಧೆಯ `ಹ್ಯೂಮನ್ ಆ್ಯಕ್ಟಿವಿಟಿ’ ವಿಭಾಗದಲ್ಲಿ ಪ್ರಶಸ್ತಿ ಗಳಿಸಿರುವ ಈ ಚಿತ್ರವನ್ನು 12 ವರ್ಷಗಳಿಗೊಮ್ಮೆ ಶ್ರವಣಬೆಳಗೊಳದಲ್ಲಿ ನಡೆಯುವ ಮಹಾಮಸ್ತಕಾಭಿಷೇಕದ ಸಂದರ್ಭದಲ್ಲಿ ಸೆರೆಹಿಡಿಯಲಾಗಿತ್ತು. ಆ ಬೃಹತ್ ಏಕಶಿಲಾ ಬಾಹುಬಲಿ ಮೂರ್ತಿಯ ಅಭಿಷೇಕದ ಸಿಂಚನದ ಸ್ಪರ್ಶದಿಂದ ಪುಳಕಿತರಾಗುತ್ತಿರುವ ಭಕ್ತ ಸಮೂಹವನ್ನು ಚಿತ್ರದಲ್ಲಿ ಕಾಣಬಹುದಾಗಿದೆ.
ಕಂದಕೂರ ಅವರ `ದಿ ಫೀಯರ್’ ಹಾಗೂ `ಓಲ್ಡೇಜ್ ಆರ್ಫನ್’ ಚಿತ್ರಗಳೂ ಸಹ ಇದೇ ಸ್ಪರ್ಧೆಯಲ್ಲಿ ಫೋಟೋವಿವೊ ಚಿನ್ನದ ಪದಕಗಳನ್ನು ಪಡೆದುಕೊಂಡಿವೆ. ಅ. 20ರಂದು ಬಹುಮಾನ ವಿತರಣಾ ಸಮಾರಂಭ ಹಾಗೂ ಛಾಯಾಚಿತ್ರಗಳ ಪ್ರದರ್ಶನ ನಡೆಯಲಿದೆ.
