ಮೈಸೂರಿನಲ್ಲಿ ಭಾರಿ ಮಳೆ: ರಿಂಗ್ ರಸ್ತೆಯಲ್ಲಿ ಕೊಚ್ಚಿ ಹೋದ ಕಾರು

ಬಹುತೇಕ ಎಲ್ಲ ರಸ್ತೆಗಳಲ್ಲೂ ಕಾಲುವೆಯಂತೆ ನೀರು ಹರಿಯುತ್ತಿದೆ. ರಾಜಕಾಲುವೆಗಳು ಉಕ್ಕಿ ಹರಿಯುತ್ತಿದ್ದು ಸಮೀಪದ ನಿವಾಸಿಗಳು ತಮ್ಮ ತಮ್ಮ ಮನೆಯಿಂದ ಹೊರಬಂದಿದ್ದಾರೆ.

ಉದಯಗಿರಿ, ಸುಭಾಷ್ ನಗರ, ಸಾತಗಳ್ಳಿ, ರಿಂಗ್ ರಸ್ತೆ ಗಳಲ್ಲಿ ಹಲವು ವಾಹನಗಳು ಮುಳುಗಿವೆ.

ಸಿದ್ದಾರ್ಥ‌ನಗರದ ಜಿ ಎಸ್ ಟಿ ಭವನದ ಸಮೀಪ ವ್ಯಕ್ತಿಯೊಬ್ಬರು ಕಾಲು ಜಾರಿ ಚರಂಡಿಗೆ ಬಿದ್ದರು. ನೋಡನೋಡುತ್ತಿದ್ದಂತೆ ಕೊಚ್ಚಿಕೊಂಡು ಹೋದರು ಎಂದು ಸ್ಥಳೀಯರು ತಿಳಿಸಿದ್ದಾರೆ. ಸ್ಥಳಕ್ಕೆ ಬಂದಿರುವ ಅಗ್ನಿಶಾಮಕ ಮತ್ತು ತುರ್ತು ಸೇವೆಗಳ ವಾಹನವು ಹುಡುಕಾಟದಲ್ಲಿ ತೊಡಗಿದೆ.

ಮಳೆ ತಡರಾತ್ರಿಯವರೆಗೂ ಬಿರುಸಾಗಿಯೇ ಮುಂದುವರಿದಿತ್ತು.