ವರ್ಷದ ಮೊದಲ ಹಬ್ಬಕ್ಕೆ ತಯಾರಿ ಜೋರು: ಸಂಕ್ರಾಂತಿ ಸ್ವಾಗತಿಸಲು ಮೈಸೂರು ಸಜ್ಜು

ಬರಗಾಲದ ನಡುವೆಯೂ, ಬೆಳೆ ಕೈ ಸೇರಿದ ಖುಷಿಯಲ್ಲಿರುವ ರೈತ ಕುಟುಂಬಗಳು ಹೊಸ ಬಟ್ಟೆ ಖರೀದಿಸಲು ಸಿದ್ಧತೆ ನಡೆಸಿವೆ. ದೇವಸ್ಥಾನಗಳಲ್ಲಿ ವಿಶೇಷ ಪೂಜೆಗಳು ನಡೆಯಲಿವೆ. ಮಧ್ಯಾಹ್ನ ವಿಶೇಷ ಖಾದ್ಯಗಳು ತಯಾರಾಗುತ್ತವೆ. ಸಂಜೆಯಾಗುತ್ತಿದ್ದಂತೆ ಹೊಸ ಬಟ್ಟೆ ತೊಟ್ಟ ಹೆಣ್ಣು ಮಕ್ಕಳು ನೆರೆಯ ಮನೆಗಳಿಗೆ ತೆರಳಿ ಸಂಕ್ರಾಂತಿ ಎಳ್ಳನ್ನು ಪರಸ್ಪರ ಹಂಚಿ ಶುಭಾಶಯ ಕೋರುವ ಸಂಪ್ರದಾಯ ಹಳೆ ಮೈಸೂರು ಭಾಗದಲ್ಲಿದೆ.

ಗ್ರಾಮೀಣ ಭಾಗದಲ್ಲಿ ಸಂಕ್ರಾಂತಿ ಬರ ಮಾಡಿಕೊಳ್ಳಲು ವಿಶೇಷ ರೀತಿಯ ಸಿದ್ಧತೆ ನಡೆಯುತ್ತಿದೆ. ಮನೆಗಳಲ್ಲಷ್ಟೇ ಅಲ್ಲದೆ ಮಹಿಳಾ ಸಂಘಟನೆಗಳು ಹಾಗೂ ಶಾಲಾ– ಕಾಲೇಜುಗಳಲ್ಲೂ ಸಂಕ್ರಾಂತಿ ಸಂಭ್ರಮ ಕಳೆಗಟ್ಟಿದೆ.

ನಗರದ ಪ್ರಮುಖ ಮಾಲ್‌ಗಳಲ್ಲೂ ಸಂಕ್ರಾಂತಿಗೆ ಶುಭಕೋರುವ ಪ್ರತಿಕೃತಿಗಳನ್ನು ಜೋಡಿಸಿಡಲಾಗಿದೆ. ಗ್ರಾಮೀಣ ಭಾಗಗಳಿಂದ ಬಂದಿರುವ ಕಬ್ಬು, ಸೇವಂತಿಗೆ ಪ್ರಮುಖ ರಸ್ತೆ ಬದಿಯಲ್ಲಿ ರಾಶಿ ಹಾಕಿ ಮಾರಾಟ ಮಾಡುತ್ತಿರುವುದು ಹಬ್ಬದ ಸಂಭ್ರಮಕ್ಕೆ ರಂಗು ತುಂಬಿದೆ.

ಎಚ್‌.ಡಿ ಕೋಟೆಯ ಗಡಿ ಭಾಗದಲ್ಲಿ ಸಂಕ್ರಾಂತಿಯೊಂದಿಗೆ, ಪೊಂಗಲ್‌ ಹಬ್ಬಕ್ಕೂ ತಯಾರಿ ನಡೆದಿವೆ. ಆ ಭಾಗದಲ್ಲಿರುವ ತಮಿಳು ನಿವಾಸಿಗಳು ಮನೆಯಲ್ಲೇ ಪೊಂಗಲ್‌ ಆಚರಿಸಲು ಸಿದ್ಧತೆ ನಡೆಸಿದ್ದಾರೆ.

ಗುಡ್ಡೆ ಬಾಡು: ಪಿರಿಯಾಪಟ್ಟಣ ತಾಲ್ಲೂಕಿನ ಕೆಲವು ಗ್ರಾಮಗಳಲ್ಲಿ ಸಂಕ್ರಾಂತಿ ಹಬ್ಬದ ಅಂಗವಾಗಿ ಮಾಂಸಾಹಾರಿಗಳು ಕುರಿ, ಆಡು ಮೇಕೆಗಳನ್ನು ಕಡಿದು ಗುಡ್ಡೆ ಬಾಡು ಹಂಚಿಕೊಳ್ಳುವ ಪದ್ಧತಿ ಈಗಲೂ ಚಾಲ್ತಿಯಲ್ಲಿದೆ. ಗ್ರಾಮಸ್ಥರು ಒಂದೇ ಕಡೆ ಸೇರಿ ಹಬ್ಬ ಆಚರಿಸುವ ತವಕದಲ್ಲಿದ್ದಾರೆ.

ತಿ.ನರಸೀಪುರ ಪಟ್ಟಣದ ಖಾಸಗಿ ಬಸ್ ನಿಲ್ದಾಣದ ಬಳಿ ರೈತರು ಹಸುಗಳಿಗೆ ಕಿಚ್ಚು ಹಾಯಿಸುತ್ತಾರೆ. ರಾಸುಗಳನ್ನು ಪಟ್ಟಣದ ಲಿಂಕ್ ರಸ್ತೆಯಲ್ಲಿ ಮೆರವಣಿಗೆಯಲ್ಲಿ ಕರೆ ತಂದು ಖಾಸಗಿ ಬಸ್ ನಿಲ್ದಾಣದಲ್ಲಿ ಜಮಾವಣೆಗೊಂಡ ಬಳಿಕ ಸಂಭ್ರಮಾಚರಣೆ ನಡೆಯಲಿದೆ.

ನಂಜನಗೂಡು, ವರುಣ ಹಾಗೂ ಕೆ.ಆರ್‌ ನಗರದ ಗ್ರಾಮೀಣ ಭಾಗದಲ್ಲೂ ಹಸುಗಳಿಗೆ ಕಿಚ್ಚು ಹಾಯಿಸಲು ಜನ ಸಿದ್ಧತೆಯಲ್ಲಿ ತೊಡಗಿದ್ದಾರೆ.

Highlights -