ಮುನಿರಾಬಾದ್ | ಸಿಹಿ ನೀರಿನ ಹಳ್ಳದ ಸ್ವಚ್ಛತೆ

ಈ ಬಗ್ಗೆ ಮಾಹಿತಿ ನೀಡಿರುವ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಬಸವರಾಜ ಕೊರವರ್, ಮನರೇಗಾ ಯೋಜನೆಯ ಅಡಿ ಇದಕ್ಕೂ ಮುಂಚೆ ಕೆರೆಯ ಹೂಳನ್ನು ಎತ್ತಿಸಲಾಗಿದೆ. ಕೆರೆಗೆ ನೀರಿನ ಮೂಲವಾಗಿರುವ ಹಳ್ಳ ಜಾಲಿ, ಕಳೆ ಗಿಡಗಳಿಂದ ತುಂಬಿ ನೀರು ಸರಾಗವಾಗಿ ಹರಿಯದಂತಾಗಿತ್ತು. ಗ್ರಾಮಸ್ಥರ ಮತ್ತು ರೈತರ ಮನವಿಯ ಮೇರೆಗೆ ಹಳ್ಳ ಸ್ವಚ್ಛಗೊಳಿಸುವ ಕೆಲಸ ಕೈಗೊಂಡಿದ್ದೇವೆ. ಸುಮಾರು 375ಕ್ಕೂ ಹೆಚ್ಚು ಕೂಲಿ ಕಾರ್ಮಿಕರು ಜಂಗಲ್‍ಕಟಿಂಗ್, ಹಳ್ಳದ ಹೂಳು ತೆಗೆಯುವಲ್ಲಿ ನಿರತರಾಗಿದ್ದಾರೆ ಎಂದರು.

ಗ್ರಾಮದ ಸಮಾಜ ಸೇವಕ ಈರಣ್ಣ ಕೋಮಲಾಪುರ ಮಾತನಾಡಿ, ಗ್ರಾಮಕ್ಕೆ ನೀರಿನ ಮೂಲವಾಗಿರುವ ಸಿಹಿ ನೀರಿನ ಹಳ್ಳ ಮತ್ತು ಕೆರೆ ಕೆಲವು ಭಾಗದಲ್ಲಿ ಒತ್ತುವರಿಯಾಗಿದೆ. ಒತ್ತುವರಿ ತೆರವು ಮಾಡಿ ಹಳ್ಳದಲ್ಲಿ ನೀರು ಹರಿದರೆ ಅಕ್ಕಪಕ್ಕದ ರೈತರ ಕೊಳವೆಬಾವಿಗಳಿಗೆ ನೀರು ಸಿಗುತ್ತದೆ. ಇದರಿಂದ ಅಂತರ್ಜಲಮಟ್ಟ ಹೆಚ್ಚಾಗಿ ರೈತರಿಗೆ ಅನುಕೂಲವಾಗುತ್ತದೆ.

ಹಳ್ಳದ ದಂಡೆಯಲ್ಲಿ ಗಿಡ– ಮರ ಬೆಳೆಸಿದರೆ ಪಶು, ಪಕ್ಷಿ ಪ್ರಾಣಿಗಳಿಗೆ ಆಹಾರ ನೀಡಿದಂತಾಗುತ್ತದೆ. ಗ್ರಾಮದ ಮುಖಂಡರೊಂದಿಗೆ ಚರ್ಚಿಸಿ ಕೆಲಸ ಆರಂಭಿಸಲಾಗಿದ್ದು, ಗ್ರಾಮ ಪಂಚಾಯಿತಿ, ತಾಲ್ಲೂಕು ಪಂಚಾಯಿತಿ ಅಧಿಕಾರಿಗಳು ಸಹಕಾರ ನೀಡಿದ್ದಾರೆ ಎಂದು ಬಸವರಾಜ ಕೊರವರ್ ಹೇಳಿದರು.

ತಾಲ್ಲೂಕು ಪಂಚಾಯಿತಿ ಕಾರ್ಯ ನಿರ್ವಹಣಾಧಿಕಾರಿ ಟಿ.ವೆಂಕೋಬಪ್ಪ, ಪಿಡಿಒ ಗೀತಾಕುಮಾರಿ ಗುರುವಾರ ಸ್ಥಳಕ್ಕೆ ಭೇಟಿ ನೀಡಿ ಕಾಮಗಾರಿ ವೀಕ್ಷಿಸಿದರು.